ރޯދަ މަސް ފެށޭއިރު، ޕޭ ލީވްގަ އާއި އަދި ނޯ ޕޭ ލީވްގައި ތިބޭ މުވައްޒަފުންނަށް ރޯދަ މަހުގެ އިނާޔަތް ނުދިނުމަށް ފިނޭންސް މިނިސްޓްރީން އަންގައިފި އެވެ.

ފިނޭންސް މިނިސްޓަރު އަހުމަދު މުނައްވަރު ސޮއިކުރައްވާ މިދިޔަ އަންގާރަ ދުވަހު ފޮނުވި ސާކިއުލާއެއްގައި ވަނީ ޕޭ ލީވް އާއި ނޯ ޕޭ ލީވްގައި ތިބި މުވައްޒަފުން ފިޔަވައި، އެހެން ހުރިހާ މުވައްޒަފުންނަށް މިމަހުގެ މުސާރައާއެކު ރޯދަ އިނާޔަތް ޖަމާކޮށްދިނުމަށް އަންގާފަ އެވެ. އެގޮތުން ދައުލަތުގެ އެޗްއާރް ސޮފްޓްވެއާ ބޭނުންކޮށްގެން ފޮނުވާފައިވާ އެ ސާކިއުލާގައި ބުނެފައިވާ ގޮތުގައި އެފަދަ ލީވްއެއްގައި ހުންނެވި މުވައްޒަފަކު ރަމަޟާން މަހުގެ ތެރެއިން އެނބުރި ޚިދުމަތަށް ނިކުމެއްޖެނަމަ، އެ ދުވަހަކުން ފެށިގެން ރަމަޟާން މަހުގެ ނިޔަލަށްޖެހޭ އަދަދެއް ބަލައި، އެ އަދަދަށް އިނާޔަތުގެ ފައިސާ ދިނުމަށެވެ. 

މީގެ ކުރިން ޕޭ ލީވްގައި ތިބޭ މުވައްޒަފުންނަށް މުސާރައާ އެއްކޮށް ނުވަތަ ވަކިން ރޯދަ އިނާޔަތް ދިޔައީ ދެމުންނެވެ. މިއީ ޕޭ ލީވްގައި ތިބޭ މުވައްޒަފުންނަށް ރޯދަ އިނާޔަތް ނުދޭން ނިންމި ފުރަތަމަ ފަހަރެވެ.

ވަޒީފާއާ ބެހޭ ގާނޫނުގެ 51 ވަނަ މާއްދާގެ (ހ) ގައި ބުނެފައިވާ ގޮތުގައި ވަޒީފާ އަދާކުރާ ކޮންމެ ދިވެހި މުވައްޒަފަކަށް ރަމަޟާން މަހުގެ އިނާޔަތުގެ ގޮތުގައި ކޮންމެ އަހަރެއްގެ ރަމަޟާން މަސް ފެށުމުގެ ކުރިން  3،000ރ. ދޭންޖެހެ އެވެ.

ވަޒީފާ އަދާކުރާ ބިދޭސީ މުސްލިމް މުވައްޒަފުންނަށް ރަމަޟާން މަހުގެ އިނާޔަތް ދިނުން ގާނޫނުގައި ދޫކޮށްލާފައިވަނީ ވަޒީފާދޭ ފަރާތުގެ އިޚްތިޔާރަށެވެ.

ސަރުކާރުގެ މުވައްޒަފުންނަށް ރޯދަ މަހުގެ އިނާޔަތުގެ ގޮތުގައި ދިނުމަށް މިއަހަރުގެ ބަޖެޓުގައި 117 މިލިއަން ރުފިޔާ ހިމަނާފައިވެ އެވެ. މިއީ މިދިޔަ އަހަރާއި ބަލާއިރު، 0.4 އިންސައްތަ ގިނަ އަދަދެކެވެ. ރޯދަ އިނާޔަތުގެ ގޮތުގައި މުވައްޒަފުންނަށް ދިނުމަށް މިދިޔަ އަހަރުގެ ބަޖެޓުގައި ހިމަނާފައިވަނީ 116.6 މިލިއަން ރުފިޔާ އެވެ.

އެންމެ ފަހުން ގާނޫނަށް ގެނައި އިސްލާހުގެ ދަށުން ވަޒީފާ އަދާކުރާ ކޮންމެ މީހަކަށް ރޯދަ އިނާޔަތުގެ ގޮތުގައި 3،000ރ. ދޭންޖެހެއެވެ.

މިއަހަރުގެ ރަމަޟާން މަހުގެ ފުރަތަމަ ދުވަސް މީލާދީ ގޮތުން ދިމާވަނީ މިމަހުގެ 27 ވަނަ ދުވަހަށެވެ.