ފާއިތުވި 24 ގަޑިއިރު އައްޑޫ ސިޓީން އިތުރު 03 މީހަކު ކޮވިޑަށް ޕޮޒިޓިވްވެ ޖުމްލަ 277ށް އަރައިފިއެވެ.

އައްޑޫ އިކުއެޓޯރިއަލް ހޮސްޕިޓަލުން ބުނީ ހޮނިިހިރު ދުވަހުގެ އިރުއޮއްސި 6:00ން އާދިއްތަ ދުވަހުގެ އިރުއޮއްސި 6:00ށް ނެގުނު 144 ސާމްޕަލްގެ ތެރެއިން އިތުރު 3 މީހަކު ޕޮޒިޓިވްވެފައިވާ ކަމަށެވެ. އެއީ ހިތަދޫ އިން 02 މީހުންނާއި މަރަދޫއިން އެކަކެވެ. 174 މީހަކު ބަލިން ރަނގަޅުވެފައިވާކަން ފާހަގަކޮށް އިކުއެޓޯރިއަލް ހޮސްޕިޓަލުން ބުނީ ސާމްޕަލް ނެގުމުގެ މަސައްކަތަށް ޚާއްސަ ސަމާލުކަމެއް ދީގެން ކުރިއަށް ގެންދާ ކަމަށާއި، މިމަސައްކަތަށް އާއްމު ރައްޔިތުންގެ ފަރާތުން ވެސް ވަރަށް ބޮޑު އެއްބާރުލުމެއް ލިބޭ ކަމަށެވެ. އެގޮތުން މިހާތަނަށް 4064 ސާމްޕަލެއް ނަގާފައިވާކަން އެ ހޮސްޕިޓަލުން ފާހަގަކުރެއެވެ.

ތަފާސްހިސާބުތަކަށް ބަލާއިރު، ފޭދޫއިން 8 މީހުން، މަރަދޫ-ފޭދޫއިން އެކަކު، މަރަދޫއިން 12، ހިތަދޫއިން 121، ރިސޯޓުތަކުން 2 މީހުން، މީދޫއިން 7 މީހުން، ހުޅުދޫއިން 22 މީހުން އަދި ގަމުން އެކަކު ބައްޔަށް ޕޮޒިޓިވްވެފައިވެއެވެ.

މިހާތަނަށް އައްޑޫ ސިޓީން މި ބަލީގައި ދެމީހަކު ނިޔާވެފައިވާއިރު ހޮސްޕިޓަލުގައި ފަރުވާދެމުންދަނީ އެކަކަށެވެ.

އައްޑޫ ސިޓީ ދެވަނަ ފަހަރަށް މޮނިޓަރިންގެ ހާލަތަށް ގެނައީ 1 މެއި ވީ ހޮނިހިރު ދުވަހުގެ ވަގުތެއްގައެވެ. އޭގެފަހުން ކޮންމެ ދުވަހަކު ވެސް އެސިޓީން ޕޮޒިޓިވް ކޭސްތައް ރިޕޯޓު ކުރެވެއެވެ. އައްޑޫގައި ކޮވިޑްގެ ހާލަތު ރަނގަޅު ނޫން ކަމަށާއި، ކޮންޓްރޯލް ކުރުމަށް އާއްމު ރައްޔިތުންގެ އެއްބާރުލުން ބޭނުންވާ ކަމަށް އައްޑޫ ސިޓީ ކައުންސިލުން ބުނެއެވެ.

ކޮވިޑް ކޮންޓްރޯލް ކުރުމުގެ ގޮތުން ވަނީ ގިނަ ފިޔަވަޅުތަކެއް އަޅާފައެވެ. އެގޮތުން ކޮންމެހެން ނުކުންނަން ޖެހިގެން މެނުވީ ނުނިކުތުމަށް އިލްތިމާސްކޮށްފައިވާއިރު، އަސާސީ ޚިދުމަތްތައް ފޯރުކޮށްދިނުމުގައި ރައްޔިތުންނަށް ލުއި ފަސޭހަވާނެ ގޮތަށް ކަންކަން އިންތިޒާމް ކުރުމުގެ މަސައްކަތް އައްޑޫ ސިޓީ ކައުންސިލުން ދަނީ ކުރަމުންނެވެ.