މޯލްޑިވްސް މާރކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) ޚިޔާނާތުގެ ލިސްޓުން ނަން އުނިކޮށްދިނުން އެދިވަޑައިގެން ރައްޔިތުންގެ މަޖިލީހުގެ މެދުހެންވޭރު ދާއިރާގެ އެމްޑީޕީ މެމްބަރު އަލީ އާޒިމް, އެސެޓް ރިކަވަރީ ކޮމިޝަނަށް ސިޓީއެއް ހުށައަޅާފައިވާކަމަށް ރާއްޖެއެމްވީއަށް މައުލޫމާތު ލިބިއްޖެއެވެ.

ކުރިން ތަހުގީގީ އިދާރާތަކުން އާންމުކޮށްފައިވާ ލިސްޓުގައި ނުހިމެނޭ 14 މީހުންގެ ނަމާއެކު، އެމްއެމްޕީއާރްސީގެ ޚިޔާނާތުގައި ހިމެނޭ މެންބަރުންގެ އައު ލިސްޓެއް އެސެޓް ރިކަވަރީ ކޮމިޝަނުން މަޖިލީހަށް ފޮނުވާފައިވާއިރު، އެ ލިސްޓުގައި އާޒިމްގެ ނަންވެސް ހިމެނޭކަމަށް ވަނީ އަޑުފެތުރިފައެވެ. އެކަމާ ގުޅިގެން އާޒިމް ވަނީ މަޖިލީހުގައި މި މައްސަލަ ބަލަމުންދާ 241 ކޮމިޓީންވެސް އެކަހެރިވެވަޑައިގެންފައެވެ.

އިތުބާރު ހުރި މަސްދަރަކުން ރާއްޖެއެމްވީއަށް މައުލޫމާތު ދެއްވަމުން ވިދާޅުވީ، އެސެޓް ރިކަވަރީ ކޮމިޝަނުގެ ރައީސް އަހުމަދު އަސްއަދަށް އެޑްރެސް ކުރައްވައި އަންގާރަ ދުވަހު އާޒިމް ސިޓީއެއް ފޮނުއްވާފައިވެއެވެ. އަދި އާޒިމްގެ ނަން ހިމަނުއްވާފައިވަނީ އެއްވެސް އަސާސެއް ނުވަތަ ތަހުގީގެއް ވެސް ނެތިކަން ސިޓީގައި އާޒިމް ފާހަގަ ކުރައްވާފައިވާ ކަމަށް އޭނާ ވިދާޅުވިއެވެ.

މައުލޫމާތު ދެއްވި ފަރާތުން ވިދާޅުވި ގޮތުގައި އާޒިމް ވަނީ ފަހުން އެކުލަވާލި ލިސްޓުގައި އޭނާގެ ނަން ހިމަނާފައިވަނީ ސިޔާސީ ގޮތުން ދައްކާ ވާހަކަތައް ބަލައި ނުގަނެވޭތީ ނަން ކިލަނބުކޮށްލުމުގެ ބޭނުމުގައި ކަމަށް ތުހުމަތު ކުރައްވާފައެވެ.

އޭގެ އިތުރުން، މިއަދާ ހަމައަށްވެސް އެމްއެމްޕީއާރްސީ ޚިޔާނާތާއި ގުޅިގެން އެއްވެސް މުއައްސަސާއަކުން ސުވާލެއް ކޮށްފައިނުވާކަން ފާހަގަ ކުރައްވާފައިވެއެވެ. ރާއްޖެއެމްވީއަށް މައުލޫމާތު ދެއްވި ފަރާތުން ވިދާޅުވީ، އެމްއެމްޕީއާރްސީ ޚިޔާނާތާއި ގުޅިގެން ފައިސާ ލިބުނު ފަރާތްތަކުގެ ލިސްޓު އިސްލާހުކޮށް، ނަން އުނިކޮށްދެއްވުމަށް އާޒިމް އެދިވަޑައިގަންނަވާފައިވާ ކަމަށެވެ. އަދި ރަނގަޅަށް ތަހުގީގު ކުރެއްވުމަށްފަހު، ނަން ހިމަނަންޖެހޭނަމަ ހެއްކާއި ގަރީނާއާއެކު ހިމެނުއްވުމަށްވެސް އާޒިމް ވަނީ އެދިވަޑައިގެންފައެވެ.

ލިސްޓުގައި ނަން ހިމެނޭކަމަށް ވާނަމަ، ނަން އުނިކޮށްދެއްވުމަށް އެދިވަޑައިގެންފައިވާކަން އާޒިމް ވަނީ "ރާއްޖެއެމްވީ"އަށްވެސް ކަށަވަރު ކޮށްދެއްވާފައެވެ. ރާއްޖެއެމްވީއާ ވާހަކަ ދައްކަވަމުން އާޒިމް ވިދާޅުވީ، އެކަމުގައި އޭނާގެ ބައިވެރިވުމެއް ނެތްކަން ޝައްކެއް ވަހުމެއް ނެތް މިންވަރަށް ޔަގީން ކަމަށެވެ. އަދި ބޭނުންވަނީ ރައްޔިތުންނަށްވެސް އެކަން ޔަގީންކޮށްދެއްވުމަށްކަން އާޒިމް ފާހަގަ ކުރެއްވިއެވެ. އާޒިމް ވިދާޅުވީ، 241 ކޮމިޓީން އެކަހެރިވެވަޑައިގަތް މައިގަނޑު ސަބަބަކީވެސް ރައްޔިތުންނަށް ނަޒާހަތްތެރިކަން ކަށަވަރުކޮށްދިނުން ކަމަށެވެ.

އަލީ އާޒިމް 241 ކޮމިޓީން އެކަހެރިވެވަޑައިގަތުމާއެކު، ބަދަލުގައި މަޖިލީހުގެ ނާއިބުރައީސް އީވާ އަބްދުﷲ 241 ކޮމެޓީއާ ގުޅިވަޑައިގެންނެވުމަށް ވަނީ ނިންމަވާފައެވެ.

ޚިޔާނާތުގެ އައު ލިސްޓުގައި އާޒިމްގެ ނަން ހިމެނޭކަމުގެ އަޑުތައް ގަދަވެފައިވާއިރު، އާޒިމްއާއި ކުރީގެ ނާއިބްރައީސް އަހުމަދު އަދީބާ ދެމެދު ދެކެވިފައިވާކަމަށް ބުނާ ވާހަކަތަކެއްގެ ޗެޓްލޮގް ތަކެއްވެސް ދަނީ މީސްމީޑިއާގައި ދައުރުވަމުންނެވެ. އެގޮތުން ކަނބާލިފަރުގެ ކޮންސްޓްރަކްޝަން ލެޓަރ ހޯދުމަށް އަދީބު ގާތުން އެދިފައިވާ މެސެޖުތަކަކާއި، އޭސީސީއަށް މެމްބަރުން އައްޔަން ކުރުމާމެދު ކުރެވިފައިވާ މަޝްވަރާތަކުގެ އިތުރުންވެސް އޭރުގެ ސިޔާސީ މަސްރަޙުގައި ހިނގާފައިވާ މުހިއްމު ކަންކަމާ ގުޅޭގޮތުން ވާހަކަތައް ދެކެވިފައިވާ ޗެޓްލޮގްތަކެއް ދަނީ ދައުރުވަމުންނެވެ.

ޗެޓްލޮގްތަކާއި ގުޅޭގޮތުން ރާއްޖެއެމްވީއާ ވާހަކަ ދައްކަވަމުން އާޒިމް ވަނީ އެއީ ހައްތާވެސް ފިތުނަކަމަށް ސިފަ ކުރައްވާފައެވެ.

އެމްއެމްޕީއާރްސީގެ ޚިޔާނާތުގައި ހިމެނޭ މެންބަރުންގެ އައު ލިސްޓެއް އެސެޓް ރިކަވަރީ ކޮމިޝަނުން މަޖިލީހަށް ފޮނުވާފައިވާއިރު، ރައްޔިތުންގެ މަޖިލީހުގެ ސަލާމަތީ ހިދުމަތްތަކުގެ ކޮމިޓީ (241 ކޮމިޓީ) އާއި ޖުޑިޝަރީ ކޮމިޓީ ގުޅިގެން ގެންދަނީ އެކަން ބަލަމުންނެވެ.

ފަހުގެ ތާރީޚެއްގައި ހިނގި އެންމެ ބޮޑު ޚިޔާނާތުގެ މައްސަލައިގައި ތަހުގީގީ އިދާރާތަކުން ކުރިން އާންމުކުރި ލިސްޓުގައި 267 ބޭފުޅުން ގެ ލިސްޓުގައި، 18 ވަނަ ރައްޔިތުންގެ މަޖިލީހުގެ މެންބަރުންނާއި, ކުރިއަށްމިދާ 19 ވަނަ މަޖިލީހުގެ މެންބަރުންނާއި މިނިވަން މުއައްސަސާތަކުގެ އިސްކޮށް ތިއްބެވި ބޭފުޅުން ހިމެނިވަޑައިގަންނަވައެވެ. ހަމައެއާއެކު ސަރުކާރުގެ މަގާމުތަކުގައި ތިއްބެވި ބޭފުޅުންނާއި, ކުރީ ސަރުކާރުގެ އިސް ބޭފުޅުންނާއި، ފަނޑިޔާރުންނާއި، ސަލާމަތީ ބާރުތަކުގައި ތިއްބެވި އޮފިސަރުންނަށް ވެސް މި ޚިޔާނާތުގެ ފައިސާ ލިބިވަޑައިގަންނަވާފައިވެއެވެ. ފަހުން އެމްއެމްޕީއާރްސީގެ ޚިޔާނާތުގެ މައްސަލައިގައި ތުހުމަތު ކުރެވޭ މީހުންގެ ލިސްޓު މަޖިލީހަށް ފޮނުވިއިރު، އަދަދު އިތުރުވެ 281ށް ވަނީ އަރާފައެވެ.