އެމްއެމްޕީއާރުސީ މެދުވެރިކޮށް ހިންގި ބޮޑު ޚިޔާނާތުގެ ތަހުގީގަށް ރައްޔިތުންގެ މަޖިލީހުގެ އޭދަފުށީ ދާއިރާގެ މެމްބަރު އަހްމަދު ސަލީމް (ރެޑްވޭވް ސަލީމް) ރިޔާސީ ކޮމިޝަނަށް ހާޒިރުކޮށްފިއެވެ.

އެސެޓް ރިކަވަރީ ކޮމިޝަނަށް އަންގާރަ ދުވަހު ސަލީމު ހާޒިރުކުރިކަން އެ ކޮމިޝަނުގެ ރައީސް އަހްމަދު އަސްއަދު ވަނީ ރާއްޖެއެމްވީއަށް ކަށަވަރު ކޮށްދެއްވާފައެވެ.

ސަލީމް ހާޒިރުކޮށްފައިވަނީ އެސެޓް ރިކަވަރީ ކޮމިޝަނާއި ފުލުހުންނާއި އޭސީސީ ގުޅިގެން ބަލަމުންދާ މައްސަލައެއްގެ ތަހުގީގަށް ސުވާލު ކުރުމަށެވެ.

އެސެޓް ރިކަވަރީ ކޮމިޝަނުން ބަލަމުން ދަނީ 1 ޖަނަވަރީ 2012 އިން ފެށިގެން 17 ނޮވެންބަރު 2018 ގެ ނިޔަލަށް ހިނގާފައިވާ ކަމަށް ބެލެވޭ ޚިޔާނާތުގެ މައްސަލަތަކެވެ. ކޮމިޝަނުން ބަލަމުންދާ މުހިއްމު މައްސަލަތަކުގެ ތެރޭގައި އެމްއެމްޕީއާރްސީ ޚިޔާނާތުގެ މައްސަލައާއި، ޑޮލަރު ގަތުމުގެ ނަމުގައި އެސްއޯއީތައް މެދުވެރިކޮށް ހިންގާފައިވާ ޚިޔާނާތުގެ މައްސަލައާއި ރާއްޖެއަށް ބިދޭސީން ގެނައުމުގައި އިމިގްރޭޝަނުގެ އިސްވެރިން ހިންގާފައިވާ ކަމަށް ބުނާ ޚިޔާނާތުގެ މައްސަލަތައް ހިމެނެއެވެ.

އެސެޓް ރިކަވަރީ ކޮމިޝަނުގެ ފަރާތުން ވަނީ އެ ކޮމިޝަނުން ބަލަމުންގެންދާ މައްސަލަތަކުގެ އެންމެ ފަހުގެ މައުލޫމާތު ހިއްސާކޮށްފައެވެ. އެމްއެމްޕީއާރުސީގެ ޖަރީމާ ހިންގި ގޮތާއި ފައިސާ ބައިއެޅި ގޮތާއި މަންފާ ލިބުނު މީހުންގެ އައު މައުލޫމާތާއި ހެކިތައް ވެސް ތަހުގީގަށް ލިބިފައިވާ ކަމަށް ބުނާ 267 މީހުންގެ ލިސްޓެއް އެބައޮތް ކަމަށް އެ ކޮމިޝަނުން ވަނީ ބުނެފައެވެ. ލިސްޓުގައި މަޖިލީހުގެ ކުރީގެ 44 މެމްބަރަކާއި މިހާރުގެ 16 މެމްބަރަކާއި ސަރުކާރުގައި މިހާރު ވެސް ހިމެނޭ ހަތް ބޭފުޅުންނާއި ކުރީގެ ސަރުކާރުގެ އިސް މަގާމްތަކުގައި ތިއްބެވި 30 ބޭފުޅުންނާއި މިނިވަން މުއައްސަސާތަކުގައި ކުރިން އުޅުއްވި ފަސް މެމްބަރުންނާއި ފަސް ފަނޑިޔާރެއްގެ އިތުރުން ސަލާމަތީ ޚިދުމަތްތަކާ ބެހޭ ހަތް އޮފިސަރުން ހިމެނޭ ކަމަށް ވަނީ ބުނެފައެވެ. އޭގެތެރެއިން އެންމެ އިސްކަންދީގެން ބަލަން ޖެހޭ މައްސަލަތަކުގެ ތަރުތީބެއް އެކުލަވާލާފައިވާ ކަމަށް ވެސް ތަހުގީގީ އިދާރާތަކުން ބުނެއެވެ.