ފައިޒާ ވެކްސިންގެ ފޭކު އުފެއްދުންތަކެއް މެކްސިކޯ އާއި ޕޮލޭންޑުން ފެނިއްޖެއެވެ.

ޕޮލެންޑާއި މެކްސިކޯގެ ކަމާ ބެހޭ އިދާރާތަކުން ވަނީ ގިނަ އަދަދެއްގެ ފޭކު ވެކްސިންތަކެއް އަތުލައިގެންފައެވެ. އެ ތަކެތި ޓެސްޓު ކުރިއިރު، ފޭކު ވެކްސިންތަކެއްކަން މިހާރު ވަނީ ޔަގީން ކުރެވިފައެވެ. މެކްސިކޯގައި ފައިޒާ ވެކްސިންގެ ލޭބަލް ޖަހައިގެން ބަޔަކު އަމިއްލައަށް އުފައްދާފައިވާ ވެކްސިނެއް ވިއްކަމުން އަންނައިރު، ޕޮލޭންޑުގައި ފައިޒާ ވެކްސިން ކަމަށް ހަދައިގެން ވިއްކަނީ ހަންގަނޑުން ރޫ ފިލުވުމަށް ބޭނުން ކުރާ ވެކްސިނެކެވެ.

ދުނިޔޭގެ ސިއްހަތު ޖަމުޢިއްޔާ (ޑަބްލިއުއެޗްއޯ) އިން ވަނީ ފޭކު ވެކްސިން ވިއްކުމަކީ ދުނިޔެއަށް ސީރިއަސް ސިއްހީ ނުރައްކަލެއް ކުރިމަތިވެދާނެ ކަމެއް ކަމުގެ އިންޒާރު ދީފައެވެ. އެފަދަ ވެކްސިންތައް ދެނެގަނެ، ބާޒާރުން އެތަކެތި ނެގުމަށް އެ ޖަމުޢިއްޔާއިން ގޮވާލާފައިވެއެވެ.

ޕޮލޭންޑުގެ ހެލްތު މިނިސްޓަރު ވިދާޅުވީ އެ ގައުމުގައި ވިއްކި ފޭކު ވެކްސިނުގެ ސަބަބުން އާއްމު ސިއްހަތަށް އަދި ނުރައްކަލެއް ނެތްކަމަށެވެ. މެކްސިކޯގައި މަދުވެގެން 80 މީހުންނަށް ފޭކު ވެކްސިން ދިން އިރު، އޭގެން ގެއްލުމެއް ވެފައި ނުވިނަމަވެސް އޭގެން ކޮވިޑާ ދެކޮޅަށް ރައްކާތެރިކަމެއް ނުލިބެއެވެ.

މެކްސިކޯގެ ކަމާބެހޭ ފަރާތްތަކުން ބުނީ މެކްސިކޯގައި ފޭކް ވެކްސިން އުޅޭކަން ދެނެގަނެވިފައިވަނީ އެގައުމުގެ ސައިބަރ ސިފައިނަށް އެ ވެކްސިން ޖެހުމަށް ހުށަހެޅުމުން ކަމަށެވެ. މިކަމުގައި ޝާމިލުވާ ބައެއްމީހުން މިހާރުވަނީ ހައްޔަރު ވެސް ކޮށްފައެވެ.

ފައިޒާއިން ބުނީ ވެކްސިންގެ ސަޕްލައިއަށް ވުރެ ޑިމާންޑު މަތިވުމުން ފޭކު އުފެއްދުންތައް ފެންނަމުންދާ ކަމަށާއި ސަޕްލައި އިތުރު ކުރުމުގެ މަސައްކަތް ކުރަމުންދާ ކަމަށެވެ.