މާލެ އާއި ހުޅުމާލެ އެއް ކަރަންޓް ވިއުގައަކުން ގުޅާލުމުގައި ބާކީ އޮތީ، ކޭބަލްތައް ގުޅުމަށް ކުރަންޖެހޭ މަސައްކަތްތައް ކަމަށް ސްޓެލްކޯއިން ބުނެފިއެވެ.
މި ޕްރޮޖެކްޓްގެ 93 އިންސައްތަ މަސައްކަތް މިހާރު ނިމިފައިވާއިރު ބާކީ ހުރި މަސައްކަތްތައް ކުރިއަށް އޮތް 2 މަހެއްހާ ދުވަހުގެ ތެރޭގައި ނިމޭނެ ކަމަށް ސްޓެލްކޯއިން ބުނެއެވެ. ސްޓެލްކޯއިން ބުނީ މަތިން އަޅަންޖެހޭ 6 ކޭބަލް ވެސް މިހާރު އަޅާ ނިމިފައިވާ ކަމަށާއި، ޑިސްޓްރިބިއުޝަން ސިސްޓަމާއި ޓްރާންސްފޯމަރ ބެހެއްޓުމުގެ މަސައްކަތް ވެސް މިހާރު ނިމިފައިވާކަމަށެވެ
"ގްރޭޓާރ މާލެ އިންޓަރ ކަނެކްޝަން ގްރިޑް ޕްރޮޖެކްޓް" ގެ ނަމުގައި ސްޓެލްކޯއިން ކުރިއަށްގެންދާ މި މަސައްކަތުގެ ދަށުން މާލެ އާއި ހުޅުމާލޭގެ ކަރަންޓު އެއްވިއުގައަކުން ގުޅާލެވި، ހުޅުމާލެ އިން މާލެ އަށް ނުވަތަ މާލެ އިން ހުޅުލެ އަށް ވެސް ބޭނުން ޖެހިއްޖެ ހާލަތެއްގައި ވަގުތުން ކަރަންޓު ފޯރުކޮށްދެވޭނެއެވެ. މިހާރު ހުޅުލެއަށް ސްޓެލްކޯއިން ކަރަންޓްފޯރުކޮށްނުދިން ނަމަވެސް ބޭނުން ޖެހިއްޖެ ހިނދެއްގައި މިވިއުގަ މެދުވެރިކޮށް ކަރަންޓް ދެވޭނެކަމަށް ސްޓެލްކޯއިން މައުލޫމާތުދެއެވެ. މިއާއެކު މާލެސީޓީގެ ކަރަންޓުގެ މައްސަލައަށް ހައްލު ލިބިގެންދާނެއެވެ.
ހުޅުމާލޭގައި އަޅާފައިވާ 50 މެގަވޯޓުގެ އިންޖީނުގެ އިން 50 މެގަވޯޓުގެ ކަރަންޓު އުފައްދާއިރު، މިހާރު ހުޅުމާލެ އަށް ބޭނުން ވަނީ އެންމެ 15 މެގަވޯޓު ކަމަށް ސްޓެލްކޯ އިންވަނީ ބުނެފައެވެ. އެހެންކަމުން، ބާކީ އުފައްދާ ކަރަންޓު މިވިއުގަ މެދުވެރިކޮށް ބަހައިލާނެއެވެ.
މި ޖާގަ އިތުރު ކުރުމަށް އިތުރު 50 މެގަވޯޓުގެ ކަރަންޓު އުފައްދާ އިންޖީނުގެއެއް ހެދުމުގެ މަސައްކަތް ވެސް ސްޓެލްކޯ އިން ހުޅުމާލޭގައި ކުރިއަށް ގެންދާނެއެވެ. މިއާއެކު ހުޅުމާލޭގެ ދެވަނަ ފިޔަވަހީގައި މީހުން އާބާދުވާން ފެށުމުން ވެސް ކަރަންޓުގެ މައްސަލަތަކެއް ކުރިމަތިނުވާނެ ކަމަށް ސްޓެލްކޯއިންވަނީ ބުނެފައެވެ.
މި ޕްރޮޖެކްޓުގެ ދެވަނަ ފިޔަވަހީގެ މަސައްކަތުގެތެރެގައި ހިމެނެނީ، ވިލިމާލެ އާއި ތިލަފުއްޓާއި ގުޅީފަޅު ބްރިޖަކުން ގުޅާލުމުން މިވިއުގައިގެ ތެރެއަށް އެ ރަށްތައް ވެސް ވެއްދުމެވެ. މި ޕްރޮޖެކްޓުގެ މަސައްކަތް ފަށަން ހަމަޖެހިފައިވަނީ ބްރިޖު ނިމުމުންނެވެ.
