ރަޝިއާއިން ކޮވިޑް-19 އަށް އުފައްދައިފައިވާ ސްޕަޓްނިކް ވެކްސިން އިންޑިއާގައި ބޭނުން ކުރުމުގެ ހުއްދަ އެގައުމުން ދީފިއެވެ.

ރަޝިއާގެ ގަމަލެޔާ އިންސްޓިޓިއުޓުން އުފައްދާފައިވާ ސްޕަޓްނިކް ފަހެއް ވެކްސިން އަކީ އިންޑިއާގައި ބޭނުން ކުރަން ހުއްދަ ދިން ތިންވަނަ ކޮވިޑް ވެކްސިނެވެ. މީގެ ކުރިން އެގައުމުން ވަނީ އެގައުމުގައި އުފައްދާ ކޮވިޝީލްޑް ވެކްސިނާއި، ކޮވެކްސިން ބޭނުން ކުރަން ހުއްދަ ދީފައެވެ.

އިންޑިއާއިން ވަނީ އެގައުމުގައި މިހާތަނަށް ކޮވިޝީލްޑް އާއި ކޮވެކްސިންގެ 100 މިލިއަން ޑޯޒް ޖަހާފައެވެ. އެގައުމުން ކޮވިޑް ވެކްސިން ޖަހަން ފެށީ މިދިޔަ ޖެނުއަރީ މަހުއެވެ.

ރަޝިއާގެ ސްޕަޓްނިކް ފަހެއް ވެކްސިންގެ ތިން ވަނަ ފިޔަވަހީގެ ޓެސްޓުތަކުގެ ނަތީޖާ ނުލިބެނީސް އެ ވެކްސިން މީހުންގެ ގަޔަށް ޖަހަން ފެށުމުން އެގައުމަށް ފާޑު ކިޔުންތައް އަމާޒުވިއެވެ. އެކަމަކު މިދިޔަ ފެބްރުއަރީ މަހު އެ ވެކްސިންގެ ފަހު ފިޔަވަހީގެ ޓެސްޓުތަކުގެ ވަގުތީ ނަތީޖާ މެޑިކަލް ޖާނަލް ލާންސެޓުގައި ވަނީ ޝާއިއުކޮށްފައެވެ. އަދި ކޮވިޑުން ރައްކާތެރިކުރުމުގައި އެ ވެކްސިން 91.6 ޕަސެންޓު ކާމިޔާބު ކަމަށް ޓެސްޓުތަކުން ވަނީ ދައްކާފައެވެ.

އިންޑިއާއަކީ އެމެރިކާއަށް ފަހު ކޮވިޑް އެންމެ ބޮޑަށް ފެތުރިފައިވާ ގައުމެވެ. އެގައުމުން މިހާތަނަށް 13.5 މިލިއަނަށް ވުރެ ގިނަ މީހުން ކޮވިޑަށް ޕޮޒިޓިވްވެފައިވާއިރު 170،000 ށް ވުރެ ގިނަ މީހުން މި ބަލީގައި މަރުވެފައިވެއެވެ.