ކޮވިޑް-19 އާ ގުޅިގެން ޑެންމާކުގައި އަޅާފައިވާ ފިޔަވަޅުތަކާ ދެކޮޅަށް އެގައުމުގައި ކުރިއަށް ގެންދިޔަ މުޒާހަރާގެ ތެރެއިން ދެ މީހުން ހައްޔަރުކޮށްފިއެވެ.
ބޭރުގެ ނޫސްތަކުގައި ރިޕޯޓްކޮށްފައިވާ ގޮތުގައި މިދެމީހުން ހައްޔަރުކޮށްފައި ވަނީ ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތަކާ ދެކޮޅަށް ޑެންމާކުގެ ވެރިރަށް ކޯޕަންހޭގަންގައި އާދިއްތަ ދުވަހު ކުރިއަށް ގެންދިޔަ މުޒާހަރާގެ ތެރެއިންނެވެ.
އެގޮތުން އެކަކު ހައްޔަރުކޮށްފައި ވަނީ ފުލުހުންނަށް ދިމާލަށް ހަވާ އުކުމުން ކަމަށާއި ދެވަނަ މީހާ ހައްޔަރުކޮށްފައި ވަނީ ހަމަނުޖެހުން އުފައްދަން އުޅުމުންނެވެ.
އާދިއްތަ ދުވަހު ޑެންމާކުގައި ކުރިއަށް ގެންދިޔަ މި މުޒާހަރާ އިންތިޒާމުކޮށްފައި ވަނީ "މެން އިން ބްލެކް ޑެންމާކް" ކިޔާ ގްރޫޕަކުންނެވެ. މި ގްރޫޕުން އަންނަނީ މިދިޔަ އަހަރުގެ ފަހުކޮޅުން ފެށިގެން މިފަދަ މުޒާހަރާތައް ސިލްސިލާކޮށް އިންތިޒާމުކުރަމުންނެވެ.
މުޒާހަރާގެ ބައިވެރިން ވަނީ އާދިއްތަ ދުވަހު ހަވާ އަދި އަލިފާން ޓޯޗް ބޭނުންކޮށްފައެވެ. ކޮވިޑް-19 އާ ގުޅިގެން ޑެންމާކުގައި އަޅާފައިވާ ފިޔަވަޅުތަކަކީ "ޑިކްޓޭޓަރޝިޕް" ފިޔަވަޅުތަކެއް ކަމަށް މުޒާހަރާގެ ބައިވެރިން ދެކޭއިރު، އެބައިވެރިން ގޮވާލަމުން ދިޔައީ ޑެންމާކް މިނިވަން ކުރުމަށެވެ.
މެން އިން ބެލްކް ޑެންމާކް އިން މި މުޒާހަރާ ކުރިއަށް ގެންގޮސްފައި މިވަނީ މީގެ ކުރީ މުޒާހަރާއެއްގައި ހަމަނުޖެހުން އުފައްދަން މަސައްކަތްކުރި މީހަކަށް ދެ އަހަރުގެ ޖަލު ހުކުމެއް ކުރިތާ އެއް ދުވަސް ފަހުންނެވެ.
