ފުލުހުންގެ ސަރވިސް އޮޕަރޭޝަނަލް ހާލަތާއި ގުޅިގެން ޗުއްޓީ ހިފެހެއްޓުމަކީ ފުލުހުން އަބަދުވެސް އަމަލު ކުރަމުން ގެންދާ އުސޫލެއް ކަމަށް ފުލުހުން ބުނެފިއެވެ.
އަހަރީ ޗުއްޓީ ނުދޭ މައްސަލައިގައި ފުލުހުންގެ މެދުގައި ބޮޑެތި ހިންހަމަނުޖެހުންތައް އޮތް ކަމަށް މައުލޫމާތު ލިބޭ ކަމަށް ބުނެ ކުރި ސުވާލަކާއި ގުޅިގެން ފުލުހުން ބުނީ ފުލުހުންގެ ސަރވިސް އޮޕަރޭޝަނަލް ހާލަތާއި ގުޅިގެން ޗުއްޓީ ހިފެހެއްޓުމަކީ ފުލުހުން އަބަދުވެސް އަމަލު ކުރަމުން ގެންދާ އުސޫލެއް ކަމަށާއި އެގޮތުން ކޮވިޑް-19ގެ ހާލަތު ގޯސްވުމާއި ގުޅިގެން ފުލުހުންގެ އޮޕަރޭޝަނަލް ލެވެލް، ލެވެލް 2ށް މަތިކުރެވި އަހަރީ ޗުއްޓީ ދިނުން ހުއްޓާލާފައިވާ ކަމަށެވެ.
ނަމަވެސް މުވައްޒަފުންނާއި އާއިލާގެ މެންބަރުންނަށް ދިމާވާ އިމަރޖެންސީ ކަންކަމާއި ގުޅިގެން އަދި ކައިވެނި ކުރުންފަދަ މުހިންމު ކަންކަމާއި ގުޅިގެން މިހާރު ވެސް ޗުއްޓީ ދެމުން ދާކަމަށް ބުނެ ފުލުހުން ބުނީ މިގޮތުގެ މަތިން ޗުއްޓީ ދެމުން ގެންދާތީ އެކަމާއި ގުޅިގެން މިހާތަނަށް އެއްވެސް މުވައްޒަފަކު ޝަކުވާ ހުށައަޅާފައި ނުވާ ކަމަށެވެ.
ރާއްޖޭގެ ކޮވިޑް-19ގެ އައުޓްބްރޭކްގައި މިހާތަނަށް އެއްހަފްތާއެއްގެ ތެރޭގައި ކޭސްތައް ނުފެންނަ މިންވަރަށް މިދިޔަ ހަފްތާގައި ކޭސްތައް ފެނިފައިވާތީ ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ވެސް ކަންބޮޑުވުން ފާޅު ކޮށްފައިވާއިރު ބުރާސްފަތި ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި އެސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ މާލެ ސިޓީން ކޮވިޑް-19ގެ ކޭސްއެއް ފުރަތަމަ ރިޕޯޓު ކުރެވިގެންދިޔައީ 2020 ވަނަ އަހަރުގެ އޭޕްރީލް މަހުގެ 15 ވަނަ ދުވަހު ކަމަށެވެ. އެގޮތުން މިހާތަނަށް ކޭސްތައް ނުފެންނަ މިންވަރަށް ތިން ވަނަ ރާޅާއެކު ކޭސްތައް ފެންނަމުންދާ ކަމަށް ޑރ. ނަޒްލާ ވިދާޅުވިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން ހުކުރު ދުވަހު ޕޮޒިޓިވްވި 118 މީހުންގެ ތެރެއިން 95 މީހުންނަކީ މާލެ ސަރަހައްދުން ޕޮޒިޓިވްވި މީހުންނެވެ. އަދި ރިސޯޓުތަކުން 19 ކޭސްފެނިފައިވާއިރު އަތޮޅުތެރެއިން ރިޕޯޓްކޮށްފައި ވަނީ ހަތަރު ކޭސްއެވެ.
ހުކުރު ދުވަހު ޕޮޒިޓިވްވި 118 މީހުން ޕޮޒިޓިވްވީ ބުރާސްފަތި ދުވަހުގެ އިރުއޮއްސި ހަޔަކުން ފެށިގެން ހުކުރު ދުވަހުގެ އިރުއޮއްސި ހަޔަކާ ދެމެދު ނެގި 2،964 ސާމްޕަލްގެ ތެރެއިންނެވެ. މިއާއެކު މުޅި ރާއްޖެއިން ޕޮޒިޓިވްވި ކޭސްތަކުގެ އަދަދު މި ވަނީ 20،565ށް އަރާފައެވެ. އަދި މިހާރު ފަރުވާދެމުން އަންނަނީ ޖުމްލަ 2،658 މީހުންނަށެވެ. އޭގެ ތެރެއިން 167 މީހުންނަށް ފަރުވާދެމުން އަންނަނީ ހޮސްޕިޓަލުގައި އެޑްމިޓްކޮށްގެންނެވެ. އަދި 17،836 މީހުން ވަނީ ރަނގަޅުވެފައެވެ. މި ބަލީގައި ރާއްޖެއިން މިހާތަނަށް 64 މީހުން ވަނީ މަރުވެފައެވެ.
