ކޮވިޑް-19ގެ ހާލަތު ގޯސްވެ، ކޭސްތައް މާބޮޑަށް އިތުރުވެއްޖެ ހާލަތެއްގައި ޕޭޝަންޓުން ''ޗޫސް'' ކުރަން ޖެހިދާނެކަމުގެ އިންޒާރު ދީފިއެވެ.
ބުރާސްފަތި ދުވަހުގެ ރޭ ހެލްތް އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި މޯލްޑިވްސް މެޑިކަލް އެސޯސިއޭޝަންގެ ހެލްތް ޕްރޮމޯޝަން ކޯޑިނޭޓަރު ޑރ. ފާތިމަތު މުފްލިހާ ވިދާޅުވީ ކޮވިޑް-19ގެ ތިން ވަނަ ރާޅާއެކު ހާލަތު ވަރަށް ގޯސްވެފައިވާ ކަމަށާއި، އެޑްމިޓްކުރަން ޖެހޭ މީހުންގެ އަދަދު ގިނަވަމުންދާ ކަމަށެވެ.
ރާއްޖޭގައި ހެލްތް ނިޒާމަށް ހިފަހައްޓާނުލެވޭ ވަރަށް މީހުން ބަލިވެ އެޑްމިޓްކުރަން ޖެހޭ ހާލަތެއް އަތުވެއްޖެނަމަ ޕޭޝަންޓުން ޗޫސް ކުރަންޖެހިދާނެ ކަމުގެ އިންޒާރު އޭނާ ދެއްވިއެވެ. އަދި ވިދާޅުވީ ކޮވިޑް-19ގެ ހާލަތާ ގުޅިގެން ސިއްހީ ޚިދުމަތްތެރިން ކެނޑިނޭޅި މަސައްކަތް ކުރަމުންދާ ކަމަށާއި، ޗުއްޓީތަކުން ވެސް މަހުރޫމް ވެފައިވާ ކަަމަށެވެ. އެގޮތުން ކޭސްތައް ދަށް ކުރުމަށް ހުރިހާ ރައްޔިތުން އެއްބާރުލުން ދިނުމަށް ޑރ. މުފްލިހާ އިލްތިމާސްކުރެއްވިއެވެ.
މިހެން ނަންބަރުތައް މަތިވަމުންދާ ކަމަށްވަނަމަ އަޅުގަނޑުމެން ވަކި ހިސާބަކުން ފުރިހަމަ ސިއްހީ ޚިދުމަތް ދިނުން މެދުކަނޑާލަން ޖެހިދާނެ. ސިއްހީ ޚިދުމަތް ދޭން ބޭނުންވިކަމުގައި ވިޔަސް އަޅުގަނޑުމެންނަށް ޗޫސް ކުރަން މެދުވެރިވާ ކަހަލަ ހާލަތެއް ވެސް އަތުވެދާނެ. މިއީ ވަރަށް ބޮޑަށް ޑޮކްޓަރުން ދައްކަމުންދާ އެއް ވާހަކަ. ކޭސްތައް އިތުރުވަމުންދާއިރު.ޑރ. ފާތިމަތު މުފްލިހާ
ރާއްޖެއިން ކޮވިޑް-19ގެ ޕެންޑަމިކްގައި އުޅޭތާ އެއްއަހަރުވާން ކައިރިވެފައިވާތީ މާސް އެވެއަރނަސް މޫވްމަންޓެއް ކުރިއަށް ގެންދަން ނިންމާފައިވާކަން ފާހަގަކުރައްވައި ޑރ. މުފްލިހާ ވިދާޅުވީ މިމޫވްމަންޓްގައި އާއްމު ރައްޔިތުންގެ ފުރިހަމަ އެއްބާރުލުން ބޭނުންވާ ކަމަށެވެ. ނިއު ނޯރމަލްގައި ދިރިއުޅުމުގެ އެންމެހައި ކަންކަން ކުރިއަށް ގެންދާއިރު، ސިއްހީ ޚިދުމަތްތެރިން ތިބީ ރައްޔިތުންނާއެކުކަން އަންގައިދިނުމަކީ ވަރަށް ބޮޑު މަގުސަދެއް ކަމަށް ޑރ. މުފްލިހާ ވިދާޅުވިއެވެ.
