އައްޑޫ ސިޓީން ފާއިތުވި 24 ގަޑިއިރުގެ ތެރޭގައި ނެގި 86 ސާމްޕަލްގެ ތެރެއިން އެކަކު ޕޮޒިޓިވްވެއްޖެއެވެ.

އައްޑޫ އެމެޖެންސީ އޮޕްރޭޝަން ސެންޓަރުން ބުނީ ހުކުރު ދުވަހުގެ އިރުއޮއްސި 6:00ށް ހޮނިހިރު ދުވަހުގެ އިރުއޮއްސި 6:00ށް ނެގި ސާމްޕަލްގެ ތެރެއިން އެކަކު ޕޮޒިޓިވްވެފައިވާ ކަމަށެވެ. އަދި މިހާތަނަށް 89 މީހަކު ޕޮޒިޓިވްވެފައިވާ ކަމަށް އެސެންޓަރުން ބުނެއެވެ.

ތަފާސްހިސާބުތަކަށް ބަލާއިރު ހިތަދޫއިން 22 މީހުން، މީދޫއިން 11 މީހުން، ފަރަދޫ-ފޭދޫއިން 4 މީހުން، ފޭދޫއިން 17 މީހުން އަދި އެމްޓީސީސީން މަސައްކަތް ކުރާ ސައިޓުން 35 މީހަކު ޕޮޒިޓިވްވެފައިވެއެވެ.

އައްޑޫ އެމެޖެންސީ އޮޕްރޭޝަން ސެންޓަރުން ބުނީ 4 މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާ ދެމުންދާ ކަމަށާއި، 53 މީހުން ބަލިން ރަނގަޅުވެފައިވާ ކަމަށެވެ.

36 އެކްޓިވް ކޭސް ހިމެނޭއިރު، މިހާތަނަށް 3119 ރެމްޑަމް ސާމްޕަލް ނަގާފައިވެއެވެ. އަދި 199 ގެއެއްވަނީ ކަރަންޓީންއަށް ލާފައެވެ.

އައްޑޫ ސިޓީން ކޮވިޑް-19ގެ ކޭސްތައް ފެނުމާއި ގުޅިގެން ޚާއްސަ ފިޔަވަޅުތަކެއް ވަނީ އަޅާފައިވެއެވެ. ބަލިން ރައްކާތެރިވުމަށް އަޅާފައިވާ ފިޔަވަޅުތަކަށް ގިނަ ރައްޔިތުން ސަމާލުކަން ދޭ ކަމަށް ވެސް އައްޑޫ ސިޓީ ކައުންސިލުން މައުލޫމާތުދެއެވެ.