ހޮސްޕިޓަލުގައި ފަރުވާ ހޯއްދަވަމުން ގެންދެވި ނައިބް ރައީސް ފައިސަލް ނަސީމް ހޮސްޕިޓަލުން ދޫކޮށްލައިފިއެވެ.
ރައީސް އޮފީހުގެ ތަރުޖަމާނު މަބްރޫކް އަޒީޒު ވިދާޅުވީ ހޮސްޕިޓަލުން ދޫކޮށްލާފައިވާ ކަމަށާއި، އެމަނިކުފާނުގެ ހާލުކޮޅު ރަނގަޅު ކަމަށެވެ.
ނައިބްރައީސް އެޑްމިޓްކޮށް ފަރުވާދެއްވަން ފެށީ މި ހަފްތާގެ އަންގާރަ ދުވަހުއެވެ. އެކަމާއި ގުޅިގެން މަބްރޫކް ވިދާޅުވެފައިވަނީ ނައިބް ރައީސް އެޑްމިޓްކޮށް ފަރުވާ ދެއްވާފައިވަނީ އަންގާރަ ދުވަހުގެ ވަގުތެއްގައި ކަމަށާއި ފަރުވާގެ ކަންކަން ކުރިއަށް ގެންދިޔައީ ދަރުމަވަންތަ ހޮސްޕިޓަލުގައި ކަމަށެވެ.
ނައިބް ރައީސްގެ ސިއްހީ ހާލުކޮޅާ ގުޅޭ ގޮތުން މަބްރޫކް ވިދާޅުވީ އެމަނިކުފާނު އެޑްމިޓްކުރެއްވީ ހުން ގަދަވެގެން ކަމަށެވެ. އަދި ކޮވިޑް-19އަށް ޓެސްޓް ކުރެވުނު ކަމަށާއި، ނަތީޖާ ނެގެޓިވް ކަމަށެވެ.
ހޮސްޕިޓަލުން ނުކުމެވަޑައިގެން ނައިބް ރައީސް ފައިސަލް ކުރެއްވި ޓްވީޓެއްގައި ވަނީ ހާލު ބެއްލެވި ހުރިހާ ފަރާތްތަކަށް ޝުކުރު އަދާކުރައްވާފައެވެ.
