ތ. ވޭމަންޑޫއަށް ދިމާވި ކަރަންޓުގެ މައްސަލަ ހައްލުކޮށް ކަރަންޓުގެ ޚިދުމަތް ދޭން ފަށައިފިއެވެ.
ތ. ވޭމަންދޫގެ ކަރަންޓުގެ މައްސަލަ ހައްލުކޮށްފައިވަނީ، އެ އަތޮޅު ގުރައިދޫ އިން ވަނީ 360 ކިލޯވޮޓްގެ ޖެންސެޓެއް ގެންގޮސްގެންނެވެ. ވޭމަންޑޫގެ ކަރަންޓުގެ މައްސަލަ ހައްލުކޮށް ކަރަންޓުގެ ޚިދުމަތް ދޭން ފެށިކަން އެ ރަށުގައި ކަރަންޓުގެ ޚިދުމަތްދޭ ފެނަކަ ކޯޕަރޭޝަނުން ވަނީ ޓުވިޓަރ މެދުވެރިކޮށް ހާމަކޮށްފައެވެ. ފެނަކައިން ކުރި ޓުވީޓްގައި ވަނީ ވޭމަންޑޫއަށް ދިމާވި ކަރަންޓުގެ މައްސަލަ ހައްލުކޮށް 11:40 ހާއިރު ކަރަންޓުގެ ޚިދުމަތް ދޭންފަށާފައެވެ.
ފެނަކައިން ވަނީ އަލިފާނުގެ ހާދިސާގައި އިންޖީނުގޭގައި ބޭނުން ކުރަމުން އައި ތިން އިންޖީނު ވެސް ބޭނުން ނުކުރެވޭވަރަށް ހަލާކުވެފައިވާއިރު، ހާދިސާ ހިނގިތާ 33 ގަޑިއިރުގެ ތެރޭގައި މައްސަލަ ހައްލުކޮށް ކަރަންޓުގެ ޚިދުމަތް އަލުން ދޭން ފެށުމުން މިކަމުން ފެނަކައިގެ މުވައްޒަފުންގެ ހުނަރާއި ޤާބިލިއްޔަތުކަން ހާމަވާކަމަށް ބުނެފައެވެ.
ވޭމަންޑޫ އިންޖީނުގޭގައި ބުދަ ދުވަހު ހިނގި އަލިފާނުގެ ހާދިސާއެއް ހިނގައިގެން ރިޕޯޓު ކުރީ އެ ދުވަހުގެ މެންދުރު 2:30 ހާއިރުއެވެ. މި ހާދިސާއާ ގުޅިގެން ފެނަކަ ކޯޕްރޭޝަންގެ މެނޭޖިން ޑިރެކްޓަރ އަހުމަދު ސައީދު މުހައްމަދު ވިދާޅުވީ ތ. ވޭމަންޑޫ އިންޖީނުގޭގައި ހިނގި އަލިފާނުގެ ހާދިސާ ހިނގައިދިޔަ ގޮތް ބެލުމަށްޓަކައި ކުރަން ޖެހޭ އެންމެހައި މަސައްކަތްތައް ކުރަމުންދާ ކަމަށެވެ. މިހާދިސާއާ ގުޅިގެން އެއްވެސް މީހަކަށް އަނިޔާއެއް ލިބިފައި ނުވާކަން ފާހަގަކުރައްވައި އެމްޑީ ސައީދު ވިދާޅުވީ ރައްޔިތުންގެ ވަރަށް ބޮޑު އެއްބާރުލުމާއެކު އަލިފާން ނިއްވާލެވި ކަރަންޓުގެ ޚިދުމަތްދިނުމަށް ކުރަންޖެހޭ މަސައްކަތްތައް ވަރަށް ބާރަށް ކުރިއަށް ގެންދެވުނު ކަމަށެވެ. އަދި ވިދާޅުވީ މިހާދިސާ ހިނގައި ދިޔަ ސަބަބު މިހާތަނަށް ހޯދިފައިނުވާ ކަމަށާއި، އެކަން ހިނގައިދިޔަ ގޮތް ބެލުމަށްޓަކައި ކުރަން ޖެހޭ އެހެންމެހައި މަސައްކަތްތައް ކުރަމުންދާ ކަމަށެވެ. އަލިފާނުގެ ހާދިސާގައި އިންޖީނުގޭގައި ބޭނުން ކުރަމުން އައި ތިން އިންޖީނު ވެސް ބޭނުން ނުކުރެވޭވަރަށް ވަނީ އަނދާފައެވެ.
ތ. ވޭމަންޑޫއަކީ 1000ށްވުރެ ގިނަ މީހުންގެ އާބާދީއެއް ދިރިއުޅެމުންދާ ރަށެކެވެ.