މުޅި ދުނިޔޭގައި މިހާރު އެންމެ ގަދައަށް ގުގުމަމުން ދަނީ ވެކްސިންގެ ވާހަކައެވެ. ފެބްރުއަރީ މަހުގެ އެއްވަނަ ދުވަހު ރާއްޖޭގައިވެސް ވެކްސިން ދޭން ފެށުމާއެކު އިތުރަށް މިވާހަކަތަކުގެ އަޑު ގަދަވެގެން ދިޔައެވެ. މުޅި ސޯޝަލް މީޑިއާގައި ވެސް އޮތީ ވެކްސިންއެވެ. ވެކްސިންއާ ގުޅިގެން ތަފާތު ވާހަކަތައް ދެކެވެމުންދާއިރު ގިނަ ބަޔަކު އުފެއްދި ސުވާލަކީ އެންމެ ފުރަތަމަ ރާއްޖެއިން ވެކްސިން ޖެއްސެވުމުގެ ފުރުސަތު ޑރ. ޝިރާނީ އަބްދުއްރަހީމަށް ލިބިވަޑައިގަތީ ކީއްވެގެންތޯއެވެ.؟ ޑރ.ޝިރާނީ އެސުވާލުގެ ޖަވާބު ވަރަށް ފުރިހަމައަށް ވަނީ ދެއްވާފައެވެ.
ވެކްސިނޭޝަން ޕްރޮގްރާމް ފެށި ދުވަހު ސޯޝަލް ސެންޓަރުގައި ގައުމުގެ ދެ ރައީސުންނާއެކު ނަގާފައިވާ ފޮޓޯއެއް ހިއްސާކުރައްވަމުން ޑރ.ޝިރާނީ ވަނީ އިހުސާސުތައް ބަންޑުންކޮށްލައްވައިފައެވެ. ފުން މާނަތަކެއް އެކުލެވިފައިވާ އެ މެސެޖުން، ކުރިއަށްދާން ބޭނުންވާ އިތުރު އަންހެނުންނަށް ހިތްވަރު ލިބޭއިރު، އަންހެނުންގެ ގާބިލްކަމާމެދު ސުވާލު އުފައްދައި ހިތްވަރު އެލުވާލުމަށް މަސައްކަތް ކުރި މީހުން ލަދުން އިސްޖަހަން މަޖް\ުބޫރު ވާނެއެވެ.
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދުއާއެކު ހިންގަވާފައި ވަޑައިގަންނަވާ އެފޮޓޯއަށް ގިނަ ބައެއްގެ ސަމާލުކަން ލިބިފައިވާއިރު، ޑރ.ޝިރާނީ ވަނީ ލިބެން ޖެހޭ ހައްގު އަތުން ނިގުޅައިގަނެ ބޮޑު ގޮނޑީގައި ތިބި މީހުންނަށް ބަހުގެ ހަމަލާތަކެއް އަމާޒު ކުރައްވާފައެވެ.
މީގެ އިތުރުން އަންހެނަކަށްވީތީ ތަފާތު ކުރުންތައް ގެންގުޅުނު ފިރިހެނުންނަށާއި، ޝަޚުސިއްޔަތެއް ބިނާކޮށް މަގާމު ދައްކުވައިދޭން މަސައްކަތް ކުރި ފަރާތްތަކަށް ޑރ.ޝިރާނީގެ މެސެޖްގައި އަލިއަޅުވާލައްވާފައިވެއެވެ.
މިމެސެޖަކީ ކުރިއަށް ދިއުމަށް އަހަންނަށް ލިބެން ޖެހޭ ހައްގު އަހަރެންގެ އަތުން ނިގުޅައިގަތް ބޮޑު ގޮނޑީގައި ތިބި މީހުންނަށް ދޭ މެސެޖެއް، މިމެސެޖަކީ އަހަރެން އަންހެނަކަށް ވާތީ ތަފާތު ކުރުން ގެންގުޅުނު ފިރިހެނުންނަށް އޮތް މެސެޖެއް. އަހަރެންނަށް އަހަރެންގެ މަގާމު ދައްކުވައިދޭން މަސައްކަތް ކުރި މީހުންނަށް ދޭ މެސެޖެއް. މިމެސަ\ެޖަކީ ބައެއްގެ ނިންމުންތަކުގެ ސަބަބުން އަހަރެންގެ މަންމަ އަދި ދެ އަންހެން ކޮއްކޮގެ ދިރިއުޅުމުގެ ކަންކަން ޖަޖްކޮށް ފަރުވާ ކުޑަ ކުރި މީހުންނަށް ދޭ މެސެޖެއް.ޑރ. ޝިރާނީ އަބްދުއްރަހީމް
ރާއްޖޭގެ ހުރިހާ އަންހެނުންނަށް އަމާޒުކުރައްވައި ޑރ.ޝިރާނީ ހިތްވަރުގެ މެސެޖުތައް ދެއްވިއިރު އަންހެނުންނާމެދު ގެންގުޅެމުންދާ ތަފާތު ކުރުމުގެ މައްސަލަ ބޮޑުކަން ހިތަށް ވެސް ގެނައުމަށް އުނދަގޫވިއެވެ. މުޖުތަމައުގައި ބޮޑު މައްސަލައެއް ނަމަވެސް ހައްލެއް ލިބިފައިނުވާ މައްސަލައެއްކަން ހާމަވެގެންދެއެވެ. ނަމަވެސް އަނިޔާގެ ޝިކާރައަކަށްވެ، ހިތްވަރު އެލުވާލާފައި ތިބި ޒުވާނުންނަށް ބޮޑު އުންމީދެއް ޑރ.ޝިރާނީ މެސެޖުތަކުން ލިބޭނެކަމީ ޝައްކެއް އޮތް ކަމެއް ނޫނެއެވެ.
ޑރ.ޝިރާނީގެ މެސެޖުގައި މަންމައަށް ޚާއްސަ ޝުކުރެއް އަދާކޮށް، ކާމިޔާބީއާ ހަމައަށް ވާސިލްވުމަށް އަމިއްލަ ނަފުސަށް އިތުބާރު ކުރުމަށް އެދިވަޑައިގެންފައިވެއެވެ.
މި މެސެޖަކީ އަހަރެންގެ ގާބިލްކަން ހުރި ނަމަވެސް އަންހެން ކުދިންނަކީ ގާބިލް ބައެއް ނޫން ކަމަށް ހީކޮށްދިން އަންހެނުންނަށް ދިން މެސެޖެއް. ހުވަފެންތަކެއް ދެކި ކާމިޔާބު ކުރުމަށް ޖެހިލުން ވެފައި ތިބި އަންހެން ކުދިންނަށް އޮތް މެސެޖެއް. ބުރުސޫރައަށް ބަލާފައި ރީތި ނުވުމުން ކަންކަން މަހުރޫމް ކޮށްފައި ތިބި އަންހެން ކުދިންނަށް އަމިއްލަ ނަފްސަށް އިތުބާރު ކުރަން ޖެހިލުން ވެފައި ތިބި ކުދިންނަށް އޮތް މެސެޖެއް. ފިރިހެނުންގެ އަނިޔާގެ ޝިކާރައަކަށްވެ ބަސްބުނަން ނުކެރިފައި ތިބި އަންހެނުންނަށް، ފިރިހެނުންގެ ސަބަބުން ކުރިއަށްދާން އުނދަގޫވެފައި ތިބި އަންހެނުންނަށް، މަތީ ފަންތީގައި މީހުންނަށް އިސްކަން ދީ، ދެރަ ނިކަމެތިންނަކީ ދަށު ދަރަޖައިގެ ބައެއް ކަމަށް ދައްކަން މަސައްކަތް ކުރި މީހުންނަށް ދޭ މެސެޖެއް.ޑރ. ޝިރާނީ އަބްދުއްރަހީމް
ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދުއާއެކު ޑރ ޝިރާނީ ހިންގަވާފައި ވަޑައިގަންނަވާ މަންޒަރު ފެންނަ އެފޮޓޯ އިން ގިނަ މެސެޖްތައް ލިބޭއިރު، ދެ ރައީސުންގެ ހިތްތިރިކަމާއި މިސަރުކާރުން އަންހެނުން ބާރުވެރިކުރުވުމަށް ބޭނުންވާ މިންވަރު ހާމަވަގެންދެއެވެ. ގައުމުގެ ދެރައީސުން ދެއްކެވި ނަމޫނާއިން، އެހެންވެސް އިސްފަރާތްތަކުން ނަމޫނާ ނަގާނަމަ މި މުޖުތަމައުގެ އުދަރެހުން ޖާގަ ހޯދާނެ ގިނަ އަންހެނުންތަކެއް ތިބޭނެއެވެ.
މުއްސަންދި މީހުންގެ ދަރިންނަށާއި، ބޮޑުންގެ ދަރިންނަށް މޮޅު ގޮތް ހެދި ޒަމާން ފާއިތުވެ މާޒީގެ ތެރެއަށް ދާއިރު ތައުލީމާއި ގާބިލް މީހުންނަށް ފުރުސަތު ލިބެމުންދާކަން މިކަމުން ހާމަވަގެންދެއެވެ. ކުރިއަރައިގެން ދިއުމަކީ އުނދަގޫ ކަމެއްކަމާއި ގިނަބަޔަކު ގައު އުކާނެ ކަމެއްކަމުގައިވީ ނަމަވެސް ހިތްވަރާއެކު މަސައްކަތް ކުރުމަކީ ކާމިޔާބީއާއި ހަމައަށް ވާސިލްވުމުގެ ތަޅުދަނޑިކަން ކަށަވަރެވެ.
