"އޮތެންޓިކް މޯލްޑިވްސް" އިން ހުޅުމާލޭގައި ހުޅުވި ފިހާރައިގައި ކުޑަކުދިންގެ އުފެއްދުންތަކަށް ހާއްސަ ކޯނަރއެއް ހަދައިފިއެވެ.

'ކިޑްސް ކޯނަރ' ގެ ނަމުން ނަން ދީފައިވާ މި ކޯނަރގެ ބޭނުމަކީ ދިވެހި އަމިއްލަ އުފެއްދުންތަކަށް ކުޑަކުދިންގެ ހިތްޖައްސައި، އެ ކުދިންނަށް މި ވިޔަފާރީގެ ދާއިރާއިން ކުރިއަށް ދެވޭނެ މަގުފަހި ކޮށްދިނުން ކަމަށް އޮތެންޓިކް މޯލްޑިވްސްއިިން ބުނެއެވެ.

އޮތެންޓިކް މޯލްޑިވްސްގެ ކަންތައްތައް ހިންގާ ބިޒްނަސް ސެންޓަރ ކޯޕަރޭޝަން (ބީސީސީ) ގެ ޕްރޮޖެކްޓް ޑިރެކްޓަރ، ސާމިހް އާދަމް ރާއްޖެޓީވީއަށް ދެއްވި ހާއްސަ އިންޓަވިއުގައި ވިދާޅުވީ، މިއީ ކުޑަކުދިންގެ އުފެއްދުންތައް އިތުރުކޮށް މިދާއިރާއިން އެކުދިންނަށް ތަޖުރިބާ ދިނުމުގެ ގޮތުން ބީސީސީން ކުރަން ނިންމި ކަމެއް ކަމަށެވެ.

އެގޮތުން ބީސީސީ އާއި އެކުދިންގެ ބެލެނިވެރިންނާއި ދެމެދު ވެވޭ އެއްބަސްވުމެއްގެ ދަށުން އެ ކުދިންގެ އުފެއްދުންތައް ސަޕްލައި ކުރުމުގެ ފުރުސަތު ލިބިގެންދާނެ ކަަމަށާއި، މިގޮތަށް އުފެއްދުންތައް ސަޕްލައި ކުރާއިރު، އެ ކުދިންނަކީ ރެގިއުލަރ ސަޕްލަޔަރުންނަށް ވާން ނުޖެހޭނެ ކަމަށް ސާމިހް ފާހަގަކުރިއެވެ. އެހެންކަމުން އެ ކުދިންގެ ހުސްވަގުތުތަކުގައި ތައްޔާރުކުރާ އުފެއްދުންތައް ފިހާރަައިގައި ޝޯކޭސް ކޮށްލެވޭނެ ކަމަށް ސާމިހް ފާހަގަކުރިއެވެ.

އޮތެންޓިކް މޯލްޑިވްސްއިން ވަނީ އެ ފިހާރައަށް އުފެއްދުންތައް ސަޕްލައި ކުރާ ކުދިންނަށް އެ ފިހާރައިގެ ފަރާތުން ބިޒްނަސް ކާޑްތައް ވެސް ތައްޔާރުކޮށްދީފައެވެ. އަދި މިހާރުވެސް އެފިހާރައަށް އުފެއްދުންތައް ލުމުގެ ފުރުސަތު ހުޅުވާލާފައިވާއިރު، އޮތެންޓިކް މޯލްޑިވްސް މެދުވެރިކޮށް ގިނަ އަދަދެއްގެ ޒުވާނުން ހާއްސަކޮށް އަންހެނުންގެ އުފެއްދުންތައް މާކެޓަށް ނެރެވޭ ކަމަށާއި މި ފުރުސަތުގެ ސަބަބުން ފިހާރައަށް ސަޕްލައިކުރާ ފަރާތްތަކުގެ އުފެއްދުންތެރިކަން އިތުރުވެގެން ގޮސްފައިވާ ކަމަށް ސާމިހް ފާހަގަކުރެއްވިއެވެ.

ރާއްޖޭގައި އުފައްދާ އުފެއްދުންތަކުގެ ތެރެއިން މަދުވެގެން 30 އިންސައްތަ ރާއްޖޭގެ އޮތެންޓިސިޓީ އޮންނަ އުފެއްދުންތަކަށް އޮތެންޓިކް މޯލްޑިވްސް ފިހާރައަށް އުފެއްދުންތައް ލުމުގެ ފުރުސަތު ލިބިގެންދާއިރު، ޖާގައިގެ ތަނަވަސްކަން ހުރި ވަރަކުން ޝަރުތުހަމަވާ ފަރާތްތަކަށް ފުރުސަތު ދޭނެ ކަމަށް ބީސީސީން ފާހަގަކުރެއެވެ.

އޮތެންޓިކް މޯލްޑިވްސްގެ ފުރަތަމަ ފިހާރަ މި އަހަރުގެ ޖެނުއަރީ މަހު ވެލާނާ އިންޓަނޭޝަނަލް އެއަރޕޯޓްގެ ޑިއުޓީ ފްރީގައި ހުޅުވާލާފައިވާއިރު، އޮތެންޓިކް މޯލްޑިވްސްގެ ފިހާރައެއް ހުޅުމާލޭގައި ހުޅުވީ ނޮވެމްބަރ 12 ވަނަ ދުވަހުއެވެ. މި ފިހާރަ ހުޅުވާލާފައި ވަނީ ފަތުރުވެރިންގެ އިތުރުން ދިވެހިންނަށް ރާއްޖެގެ އުފެއްދުންތައް މާކެޓްކުރުމުގެ މަގްސަދުގައެވެ.