ޓެރަރިސްޓު ޖަމާއަތެއް ކަމަށްވާ އަލްގައިދާގެ ސެކަންޑް ޗީފް ކޮމާންޑަރު ކަމަށް ގަބޫލު ކުރެވޭ މީހަކު މަރާލާފައިވާ ކަމަށް އަފްޣާނިސްތާނުގެ އަސްކަރިއްޔާއިން ބުނެފިއެވެ.
އެގޮތުން އަބޫ މުހުސިން އަލް މަސްރީ އަކީ އެފްބީއައިގެ މޮސްޓު ވޯންޓެޑް ލިސްޓުގައި ނަން އޮތް މީހެކެވެ.
އަފްޣާންގެ ނެޝަނަލް ޑިރެކްޓްރޭޓް އޮފް ސެކިއުރިޓީން ކޮށްފައިވާ ޓްވީޓެއްގައި ބުނީ، އޭނާ މަރާލާފައި ވަނީ އުތުރު އަފްޣާނިސްތާނުގެ ގަޒްނި ޕްރޮވިންސުގައި ހިންގި ހާއްސަ އޮޕަރޭޝަނެއްގައި ކަމަށެވެ. ޓްވިޓާގައި އިތުރަށް ބުނެފައިވާ ގޮތުން، ގަޒްނީއަކީ އަލްގައިދާގެ ދެކުނު އޭޝިޔާގެ ސުޕްރީމް ލީޑަރު ކަމަށެވެ.
އެމެރިކާއިން މަސްރީގެ މައްޗަށް ދައުވާކުރަނީ، ޓެރަރިސްޓު ޖަމާއަތަކަށް ބައިޔަތު ހިފައި ހަތިޔާރު ފޯރުކޮށް ދިން ކަމުގެ ތުހުމަތެވެ. އެފްބީއައިއިން ބުނާ ގޮތުން، ހުސާމް އަބްދުލް ރައުފްއަށް ނަން ބަދަލު ކޮށްގެން އުޅެމުންދާ މަސްރީއަކީ މިސްރުގެ ރައްޔިތެކެވެ. 2001 ވަނަ އަހަރުގެ ސެޕްޓެމްބަރު މަހު އެމެރިކާއަށް ދިން ޓެރަރިސްޓު ހަމަލާއަށް ފަހު އެ ގައުމުން އަފްޣާނިސްތާނަށް އަތްގަދަ ކޮށްގެން އުޅޭތާ 19 އަހަރުވެއްޖެއެވެ.
ރައީސް ޖޯޖް ޑަބްލިއު ބުޝްގެ ސަރުކާރުން އަފްޣާނިސްތާނަށް އަރަން ނިންމީ ވޯލްޑް ޓްރޭޑް ސެންޓަރަށް ހަމަލާ ދިނުމުގެ ފަހަތުގައި ތިބި އަލްގައިދާގެ ހަނގުރާމަވެރިން ހޯދަން ވެގެންނެވެ.
