ދެކުނު ކޮރެއާގައި ފްލޫ ވެކްސިން ޖެހި ނުވަ މީހުން މަރުވެފައިވާ ކަމަށް އެ ގައުމުގެ މީޑިއާތަކުން ރިޕޯޓް ކޮށްފިއެވެ.
އެގޮތުން މިދިޔަ ހަފްތާގައި އެކަނި ވެސް ފްލޫ ވެކްސިން ޖެހި ނުވަ މީހަކު ވަނީ މަރުވެފައެވެ. އަދި ވެކްސިންގެ ރައްކާތެރިކަމާއި މެދު ސުވާލު އުފެދިފައި ވާއިރު، ކޮރެއާގެ ކަމާއި ބެހޭ ފަރާތްތަކުން މި ވެކްސިން ހުއްޓާލުމުގެ ވިސްނުމެއް ނުގެންގުޅޭ ކަަމަށް ވެސް ބައެއް މީޑިއާތަކުން ވަނީ ރިޕޯޓް ކޮށްފައެވެ.
ބުދަ ދުވަހު އެކަނި ވެސް ވެކްސިން ޖެހި ފަސް މީހުން މަރުވެފައި ވާއިރު، އެ ގައުމުގެ ކަމާ ބެހޭ އިދާރާތަކުން ބުނީ މީހުން މަރުވާ ސަބަބު ތަހުގީގު ކުރަމުން އަންނަ ކަމަށެވެ. އަދި ތަހުގީގު މިހާރު ކުރިޔަށް ގޮސްފައިވާ ހިސާބަށް ބަލާއިރު މީހުން މަރުވުމަށް ދިމާ ވަނީ ވެކްސިންގެ ސަބަބުން ނޫން ކަމަށް ބުނެވި ދާނެ ކަމަށް ވަނީ ހާމަކޮށްފައެވެ.
ކޮރެއާގެ ހެލްތު އޮފިސަރެއް ކަމުގައިވާ ކިމް ޔޫންގް ޔޮން ވިދާޅުވީ މިހާރު ކުރެވެމުން އަންނަ ތަހުގީގުން ވެކްސިން ޖެހި މީހުންގެ ތެރެއިން ބަޔަކު މަރުވެފައި ވަނީ ވެކްސިންގެ ސަބަބުން ކަމަށް ނުބެލެވޭ ކަމަށާއި، މިކަމާއި ގުޅިގެން ބަލަންޖެހޭ އިތުރު ކަންކަން ބަލަމުން އަންނަ ކަމަށެވެ.
ކޮރެއާގެ ސިއްހަތާއި ބެހޭ ވުޒާރާގެ އޮފިޝަލަކު ބުނީ އޮކްޓޯބަރ މަހުގެ 13 ވަނަ ދުވަހު ވެކްސިން ޖެހުމުގެ ހުއްދަ ދިނުމާއި އެކު މިހާތަނަށް 8.36 މިލިއަން މީހުންނަށް ވެކްސިން ދީފައިވާ ކަމަށެވެ.
