ތައިލެންޑުގެ ސަރުކާރާ ދެކޮޅަށް ބާއްވަމުން ގެންދާ އެއްވުންތަކަށް ހުރަސް އެޅުމުގެ ގޮތުން، ގިނަ މީހުން އެއްވެ އުޅުން މަނާކޮށް ގަރާރެއް ނެރެފިއެވެ.

ބުދަ ދުވަހުގެ ރޭ ތައިލެންޑުގެ ޓީވީތައް މެދުވެރިކޮށް ނެރުނު ގަރާރުގައިވާ ގޮތުގައި، އެއްވުންތަކުގެ ބައިވެރިންގެ މަގުސަދަކީ އާންމު ހަމަޖެހުން ނަގާލާ ހަމަނުޖެހުން އުފެއްދުމެވެ. އެހެންކަމުން މި ފިޔަވަޅަކީ ގައުމުގެ ހަމަޖެހުމާއި ސުލްހަ ދެމެހެއްޓުމަށް ކޮންމެހެން އަޅަން ޖެހިގެން އެޅި ފިޔަވަޅެއް ކަމަށް ވަނީ ބުނެފައެވެ.

މި ގަރާރު ނެރުނުތާ ކުޑަ ވަގުތުކޮޅެއްގެ ތެރޭގައި ރަޔަޓް ފުލުހުން ވަނީ ބޮޑުވަޒީރުގެ ރަސްމީ އޮފީސް ދޮށަށް އެއްވެ ތިބީ މީހުން އެ ސަރަހައްދުން ފޮނުވާލާފައެވެ. އެއްވުމުގެ ބައިވެރިން މިކަމަށް ދެކޮޅު ހެދި ނަމަވެސް، މާ ބޮޑު ހަމަނުޖެހުންތަކެއް ނުހިނގާ އެ މީހުން ވަނީ އެތަނުން ދުރަށް ޖައްސާފައެވެ. އެއްވުމުގެ ބައިވެރިން ފޮނުވާލުމަށް ފަހު ވެސް މަގުތަކުގައި ގިނަ އަދަދެއްގެ ފުލުހުން ހަރަކާތްތެރިވި ކަމަށް ބޭރުގެ މީޑިއާތަކުން ރިޕޯޓްކޮށްފައި ވެއެވެ.

މި ގާރާރުގެ ދަށުން އަޅާފައިވާ ފިޔަވަޅުތަކުގެ ތެރޭގައި ހަތަރު މީހުންނަށް ވުރެ ގިނައިން މީހުން އެއްވެ އުޅުން ވަނީ މަނާކޮށްފައެވެ. އަދި މީޑިއާގައި "ގަސްތުގައި މައުލޫމާތު އޮޅުވާލައިގެން، އާންމުންގެ ތެރޭގައި ނުތަނަވަސްކަން ނުވަތަ ބިރުވެރިކަން އުފެދޭނެހެން، ގައުމުގެ ސުލްހަ މަސަލަސް ކަމަށް ބުރޫއަރާ ފަދަ އެއްވެސް ހަބަރެއް" ޝާއިއުކުރުން ވަނީ މަނާކޮށްފައެވެ. އޭގެ އިތުރުން، ކަމާބެހޭ ފަރާތްތަކުން ކަނޑައަޅާ ސަރަހައްދުތަކަށް މީހުން ވަނުން މަނާ ކުރުމުގެ ބާރު ވެސް ވަނީ ދީފައެވެ.

ތައިލެންޑުގެ ކިޔަވާ ކުދިން އިސްވެ ބާއްވަމުން ގެންދާ އެއްވުންތަކުގައި މައިގަނޑު ގޮތެއްގައި ގޮވާލާފައި ވަނީ މިހާރުގެ ބޮޑުވަޒީރު ޕްރަޔުތް ޗަން-އޯޗާގެ އިސްތިއުފާއަށެވެ. ބޮޑުވަޒީރާއި ސަރުކާރުގެ އިތުރުން، އެއްވުމުގެ ބައިވެރިން ވަނީ ތައިލެންޑުގެ ރަސްކަމަށް ވެސް ފާޑުކިޔާފައެވެ. މިއީ މީގެ ކުރިން އެ ގައުމުގައި އެއްވެސް ބަޔަކު މިހާ ފާޅުގައި ކޮށްފައިވާ ކަމެއް ނޫނެވެ.