ކޮވިޑް-19 އަށް ޓެސްޓު ކުރުމުގެ ކެޕޭސިޓީ އަތޮޅުތަކުގައި އިތުރުކުރުމަށް ބޭނުންވާ ކަމަށާއި އެގޮތުން ހަތަރު ސަރަހައްދަކަށް ބޭނުންވާ މެޝީން ލިބިފައިވާ ކަމަށް ހެލްތް އިމަޖެންސީ އޮޕަރޭޝަން ސެންޓަރު (އެޗްއީއޯސީ)އިން ބުނެފިއެވެ.

އެޗްއީއޯސީން ބުދަ ދުވަހުގެރޭ ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަމުން އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ، ރާއްޖޭގެ އިތުރު 4 ސަރަަޙައްދެއްގައި ޖީން-އެކްސްޕާޓް މެޝިންތައް އިންސްޓޯލްކޮށް ޓެސްޓިންގ ކެޕޭސިޓީ އިތުރުކުރުމުގެ މަސައްކަތް ކުރަމުންދާކަމަށެވެ. އެގޮތުން، ޑަބްލިއުއެޗްއޯގެ އެހީއާއެކު ލިބިފައިހުރި ޖީން-އެކްސްޕާޓް މެޝިންތައް އިންސްޓޯލްކޮށް ޓެސްޓްކުރުމުގެ މަސައްކަތް ވަރަށް އަވަހަށް ފެށޭނެކަމަށާއި އެމެޝީންތައް އިންސްޓޯލްކުރާނީ، ށ. ފުނަދޫ، ޅ. ނައިފަރު ގއ. ވިލިނގިލި އަދި ފުވައްމުލައް ސިޓީގައި ކަމަށެވެ. އަދި އެމެޝީންތައް މިހާރު ރާއްޖެއަށް އައިސްފައިވާ ކަމަށްވެސް ޑރ. ނަޒްލާ ވިދާޅުވިއެވެ.

ޑރ، ނަޒްލާ ވިދާޅުވީ، ކޮވިޑް-19 ޖެހިފައިވާ މީހުން ދެނެގަތުމަށްޓަކާ މުޅި ރާއްޖެ އެކި ޒޯންތަކަކަށް ބަހާލައިގެން، ޓެސްޓިންގ ކެޕޭސިޓީ އިތުރުކުރުމުގެ މަސައްކަތް ކުރަމުންދާކަމަށެވެ. އެގޮތުން ރާއްޖޭގެ އެންމެ އުތުރުން ހއ، ހދ، އަދި ށ، އަތޮޅު ހިމެނޭ ޒޯނުގައި، ދުވާލެއްގެ މައްޗަށް ޓެސްޓް ކުރެވޭ ކެޕޭސިޓީ މިވަގުތު 60 ގައި ހުރިއިރު، އެ އަދަދު 200 އަށް އިތުރުކުރަން ނިންމާފައިވާކަމަށް ޑރ. ނަޒްލާ ވިދާޅުވިއެވެ.

ގްރޭޓަރ މާލޭ ސަރަހައްދުގައި 3 ތަނެއްގައި ޕީ.ސީ.އާރް ޓެސްޓް ކުރެވޭނެ އިންތިޒާމް މިހާރުވެސް ހަމަޖެހިފައިވާއިރު، މާދަމާ ހުޅުމާލޭ ހޮސްޕިޓަލުގައިވެސް ޕީސީ.އާރް ޓެސްޓިންގ ފަށާނެކަމަށް ޑރ. ނަޒްލާ ވިދާޅުވިއެވެ. އަދި ޑަބްލިޔު.އެޗް.އޯގެ އެހީގައި ރާއްޖޭގެ 4 ސަރަޙައްދެއްގައި ޖީން-އެކްސްޕާޓް މެޝިންތައް އިންސްޓޯލްކުރުމުގެ މަސައްކަތްވެސް ވަރަށް އަވަހަށް ފެށިގެންދާނެކަމަށް ޑރ. ނަޒްލާ ވިދާޅުވިއެވެ.

"އަޅުގަނޑުމެން އަދި މިހާރު ޑަބްލިއު.އެޗް.އޯގެ އެހީއާއެކު ލިބިފައިހުރި ޖީން-އެކްސްޕާޓް މެޝިންތައް އިންސްޓޯލްކޮށް ޓެސްޓްކުރުމުގެ މަސައްކަތް ވަރަށް އަވަހަށް ފެށޭނެ. ށ. ފުނަދޫ، ޅ. ނައިފަރު ގއ. ވިލިނގިލި އަދި ފުވައްމުލައް ސިޓީގައި. މިކަމަށް ބޭނުންވާ މެޝިންތައް މިހާރު އަޅުގަނޑުމެންނަށް ވަނީ ލިބިފައި" ޑރ. ނަޒްލާ ވިދާޅުވިއެވެ.

ޑރ. ނަޒްލާ ވިދާޅުވީ، އެކްޓިވް ސަރވައިލަންސް ކަންކަން ވެސް ކުރިއަށްދާނެ ކަމަށާއި އެކަންކުރަމުން ދަނީ މުޅި ރާއްޖެ ކަވަރވާގޮތަށް ޒޯންތަކަކަށް ބަހާލައިގެން ގައިޑްލައިނެއް ހަދައިގެން އޭގެ ދަށުން ކަމަށާއި ޓެސްޓްކުރުމުގެ ކަންކަން ވެސް ކުރެވެމުންދާ ކަމަށެވެ.

މާލޭ ސަރަޙައްދުގެ އިތުރުން ކޮވިޑް-19ގެ ޕީސީއާރް ޓެސްޓް ކުރެވޭނެ އިންތިޒާމް މިވަގުތު ހަމަޖެހިފައިވަނީ ކުޅުދުއްފުށި ސިޓީއާއި، ނ. މާފަރުގެ އިތުރުން އައްޑޫ ސިޓީގައެވެ. އަދި ބ. އޭދަފުށްޓާއި، ރ. އުނގޫފާރާއި، ގދ. ތިނަދޫ އަދި ލ. ގަމުގައި ޖީން-އެކްސްޕާޓް ކާޓްރީޖް ބޭނުންކޮށްގެން ކޮވިޑް-19 އަށް ޓެސްޓް ކުރެވޭނެ އިންތިޒާމް ވަނީ ހަމަޖައްސާފައެވެ.

އެޗްއީއޯސީން ބުނެފައިވާ ގޮތުގައި، ކޮވިޑް-19ގެ ޕީސީއާރް ޓެސްޓް ހެދުމަށް ބޭނުންވާ 45 ހާސް ކިޓް މިހާރު ވެސް ސްޓޮކުގައި އެބަހުއްޓެވެ. އަދި ޖީން-އެކްސްޕާޓް ކާޓްރީޖްގެ 11،000 ކާޓްރީޖް މިވަގުތު އެބަހުރިކަމަށްވެސް އެސެންޓަރުން މައުލޫމާތު ދީފައި ވެއެވެ.

މިހާތަނަށް ރާއްޖެއިން 8834 މީހަކަށް ކޮވިޑް-19 ޖެހިފައި ވެއެވެ. އަދި މިބައްޔަށް ޕޮޒިޓިވްވި 31 މީހަކު ރާއްޖެއިން މަރުވެފައި ވެއެވެ. މިބައްޔަށް ޕޮޒިޓިވްވި މީހުންގެ ތެރެއިން 2509 މީހަކަށް ފަރުވާ ދެމުންދާއިރު އޭގެތެރެއިން 127 މީހަކަށް ހޮސްޕިޓަލުގައި އެޑްމިޓްކޮށްގެން ފަރުވާ ދެމުންދެއެވެ.