ރާއްޖެއިން ފެންނަ ކޮވިޑް ކޭސްތަކުގެ އަދަދު ދަށަށް ދާން ފަށާފައިވީނަމަވެސް، ބަލިން ރައްކާތެރިވާން އަޅާފައިވާ ފިޔަވަޅުތަކަށް އިހުމާލު ނުވުމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން އިލްތިމާސްކޮށްފިއެވެ.
ބުދަ ދުވަހުގެ ރޭ އެ ސެންޓަރުން ބޭއްވި ނޫސްވެރިންގެ ބައްދަލުވުމުގައި. އެޗްއީއޯސީގެ ތަރުޖަމާން ޑރ. ނަޒްލާ ރަފީގު ވިދާޅުވީ ނިމިގެން ދިޔަ ހަފްތާގައި ޖުމްލަ ޕޮޒިޓިވްވި މީހުންގެ އަދަދު އޭގެ ކުރީ ހަފްތާއަށްވުރެ ކޮންމެވެސް މިންވަރަކަށް ދަށްވެފައިވާ ކަމަށެވެ. ބަލި ކޮންޓްރޯލް ކުރުމަށް ރައްޔިތުން ބޮޑު ގުރުބާނީއެއް ވަމުންދާކަން ފާހަގަކުރައްވަމުން ޑރ. ނަޒްލާ ވިދާޅުވީ، ބަލި ޖެހޭ މީހުންގެ އަދަދު ދަށަށް ދާން ފަށާފައިވަނީ ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ ގައިޑްލަންތަކަށް އެއްބާރުލުން ލިބި އެއާއެއްގޮތަށް އަމަލު ކުރަމުންދާތީ ކަމަށެވެ.
ކުރިއަށް އޮތްތަނުގައި ވެސް އަޅުގަނޑުމެން މިގޮތަށް ހިފެހެއްޓޭނީ ހަފްތާއަކަށްވުރެ ހަފްތާއެއް ޖެހޭ ކޭސްތަކުގެ މިންވަރު މަދުކުރެވޭނީ މިހާރުވެސް ހުރި ރައްކާތެރިކަމުގެ ފިޔަވަޅުތައް ހިފަހައްޓައިގެން.ޑރ ނަޒްލާ ރަފީގު - އެޗްއީއޯސީގެ ތަރުޖަމާނު
ނިމިދިޔަ މަހުގެ ތެރޭގައި ރާއްޖެއިން، ހާއްސަކޮށް ގްރޭޓަރ މާލެ ސަރަހައްދުން ފެންނަ ކޮވިޑް ކޭސްތައް އިތުރުވެ ބަލި ޖެހުނު މީހުންގެ އަދަދުތައް ވަނީ 8000 އަށް ވުރެ އިތުރުވެފައެވެ. ޕޮޒިޓިވްވި މީހުންގެ ތެރޭގައި ގިނައީ ދިވެހިންނެވެ.
އެޗްޕިއޭގެ ފަހުގެ ތަފާސްހިސާބުތައް ދައްކާގޮތުން ކޭސްތަކުގެ ޕީކް އަންނާނެ ދުވަސް ވަރަކީ ނިމިދިޔަ އޮގަސްޓް މަހުގެ ފަހުކޮޅާއި މި ހިނގާ ސެޕްޓެމްބަރު މަހުގެ ފުރަތަމަ ހަފުތާތަކެވެ. ކޮވިޑް ކޭސްތައް ކޮންޓްރޯލް ކުރުމުގެ ގޮތުން އަޅާފައިވާ ބައެއް ފިޔަވަޅުތައް އިތުރަށް ވަރުގަދަކޮށްފައިވާއިރު، އާންމު ސިއްހަތުގެ ކުއްލި ނުރައްކަލުގެ ހާލަތު ވަނީ އަންނަ މަހުގެ 6 ވަނަ ދުވަހާ ހަމައަށް އިތުރު ކޮށްފައެވެ.
