ކުރީގެ ރައީސް އަދި ޕްރޮގްރެސިވް ކޮންގްރެސް ކޯލިޝަނުގެ ސްޕެޝަލް އެޑްވައިޒަރު، ޑރ. މުހައްމަދު ވަހީދު ހަސަން މަނިކު އަންގާރަ ދުވަހު ފުލުހަށް ހާޒިރުވުމަށް ޗިޓް ފޮނުވައިފި އެވެ.

"ރާއްޖެ އެމްވީ" އަށް މައުލޫމާތު ލިބިފައިވާ ގޮތުގައި ޑރ ވަހީދު ފުލުހަށް ހާޒިރުވާން އަންގާފައިވަނީ އަންގާރަ ދުވަހުގެ ހަވީރު 16:00 އަށެވެ. ހެލްތް ޕްރޮޓެކްޝަން އެޖެންސީގެ ގައިޑްލައިންތަކާ ހިލާފުވުމުގެ ސަބަބުން ޑރ. ވަހީދު ވަނީ މިދިޔަ އޮގަސްޓްމަހުގެ 30 ވަނަ ދުވަހު ފުލަހަށް ހާޒިރުކޮށްފައެވެ.

ރައީސް ވަހީދު ފުލުހަށް ހާޒިރުވާން އަންގާފައި ވަނީ އިދިކޮޅު ކޯލިޝަނުން ބޭއްވި މުޒާހަރާގައި އެޗްޕީއޭގެ މިންގަނޑުތަކާ ހިލާފުވުމުގެ ސަބަބުންނެވެ. އެ އެއްވުމުގައި އިސްކޮށް ހަރަކާތްތެރިވި ގިނަ އަދަދެއްގެ ބަޔަކުވަނީ މާސްކު ނާޅައި މުޒާހަރާކޮށްފައެވެ. އަދި މި އެއްވުމުގައި ގައިދުރުކަން އިސްކޮށްފައެއްވެސް ނުވެއެވެ. އެހެންކަމުން އެދުވަހު ބޭއްވި އެއްވުން ބަލައި ފިޔަވަޅުއަޅާނެ ކަމަށް ފުލުހުންވަނީ ބުނެފައެވެ.

އިދިކޮޅު ޕީޕީއެމް ޕީއެންސީ ކޯލިޝަނުން ހުކުރު ދުވަހު ބޭއްވި އެއްވުމަކީ ކޮވިޑް-19 އާއި ގުޅިގެން މާލެ ސަރަހައްދުގައި ބަލި ފެތުރުން އިންތިހާއަށް އިތުރުވެ ބަލީގެ ނުރައްކާ ބޮޑުވެފައިވަނިކޮށް ބޭއްވި އެއްވުމެކެވެ. މިމުޒާހަރާގައި ޑރ. ވަހީދު ފެނިގެން ގޮސްފައިވަނީ މާސްކް އެޅުއްވުމެއް، ގައިދުރުކަން ބެހެއްޓުމެއް ނެތި އުޅުއްވި މަންޒަރެވެ.

އެކަމާއި ގުޅިގެން ޑރ ވަހީދު ފުލަހަށް ހާޒިރުވެ ވަޑައިގެންނެވުމަށްފަހު މީޑިޔާ އާ ވާހަކަ ދައްކަވަމުން ވިދާޅުވެފައިވަނީ ރައްޔިތުންގެ ހިތްތައް ކެކިއެރުމުން މަގުމައްޗަށް ނުކުންނާނެ ކަމަށާއި، ކުރިއަށް އޮތްތަނުގައި ބޮޑު މަންޒަރު ސަރުކާރަށް ދައްކާނެކަމަށެވެ.

މީގެއިތުރުން ޑރ ވަހީދު ވިދާޅުވީ އެޗްޕީއޭގެ އެންގުންތަކާ ހިލާފު ވާގޮތަށް އަމަލު ކޮށްފައިވާ ކަމަށް ބުނެ ފުލުހުން ސުވާލު ކުރި ކަމަށެވެ. ނަމަވެސް މައްސަލައާ ގުޅިގެން ކުރިއަށްދާން ނިންމީ ގާނޫނީ ވަކީލެއް ކަނޑައެޅުމަށްފަހު ކަމަށްވާތީ އެއްވެސް ޖަވާބެއް ދީފައިނުވާނެ ކަމަށް ޑރ ވަހީދު ވިދާޅުވިއެވެ.

ރައީސް ވަހީދު ވިދާޅުވީ، އިހުތިޖާޖުގައި މާސްކު ތިރިކޮށް ލެއްވީ ވާހަކަފުޅުދައްކަވަން ފަސޭހަފުޅަށް ކަމަށާއި ފުލުހަށް ހާޒިރުކުރީ ސިޔާސީ ބޭނުމެއްގައި ކަމަށް ގަބޫލުކުރައްވާ ކަމަށެވެ.