އާދީއްތަ ދުވަހުގެ ރައްޔިތުންގެ މަޖިލީހުގެ ޖަލްސާއަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމަށް ރުހުން ދިނުމުގެ މައްސަލައާއެކު 15 ކޮމިޓީ ރިޕޯޓެއް އެޖެންޑާ ކޮށްފިއެވެ.

އާދީއްތަ ދުވަހުގެ ހެނދުނު 09:00 ޖަހާއިރު ބާއްވާ ޖަލްސާ އަކީ ޓޫރިޒަމް މިނިސްޓަރ ޑރ. އަބްދުﷲ މައުސޫމަށް ރުހުން ދިނުމުގެ މައްސަލަ ނިމެންދެން މި ދައުރު ދިގު ދައްމާލުމަށް މަޖިލީހުން ނިންމުމާއި ގުޅިގެން ބާއްވާ ޖަލްސާއެވެ. މި ޖަލްސާ ވެގެންދާނީ 2020 ވަނަ އަހަރުގެ ދެވަނަ ދައުރުގެ ފަހު ޖަލްސާގެ ބަޔަކަށެވެ.

އާދީއްތަ ދުވަހުގެ ޖަލްސާގައި އެޖެންޑާ ކުރެވިފައިވާ މުހިއްމު މަސައްކަތްތަކުގެ ތެރޭގައި ސުޕްރީމް ކޯޓުގެ ފަނޑިޔާރުކަމުގެ މަޤާމަށް ކްރިމިނަލް ކޯޓުގެ ގާޒީ ޢަލީ ރަޝީދު ޙުސައިން އާއި ޑރ. މުޙައްމަދު އިބްރާހީމް، އައްޔަނު ކުރުމާއި ގުޅޭގޮތުން ރައީސުލްޖުމްހޫރިއްޔާ ފޮނުއްވާފައިވާ މައްސަލަ ޖުޑީޝަރީ ކޮމިޓީން ދިރާސާ ކޮށް ނިންމިގޮތުގެ ރިޕޯޓަށް ބަހުސްކޮށް، ވޯޓަށް އެހުން ހިމެނެއެވެ.

މީގެ އިތުރުން، އާންމު ޞިއްޙަތުގެ ކުއްލި ނުރައްކަލުގެ ބިލު 2020 ،މަޖިލީހުގެ އިޖްތިމާޢީ ކޮމިޓީން ދިރާސާ ކޮށް ނިންމި ގޮތުގެ ރިޕޯޓަށާއި ވަޒީފާއާއި ބެހޭ ގާނޫނަށް އިސްލާހު ގެނައުމުގެ ބިލުގެ އިތުރުން ހިއުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރުސީއެމް) އަށް މެމްބަރުން އައްޔަނު ކުރުމަށް ރުހުން ދިނުން ވެސް ހިމެނެއެވެ.