ހިޔާ މަޝްރޫއުގެ 7،000 ފްލެޓަށް ދޭންޖެހޭ ފެނާއި ނަރުދަމާ ގާއިމުކުރަން ހަވާލުކޮށްފައިވާ، މަސައްކަތްތައް އަންނަ ފެބްރުއަރީ މަހު ނިންމާނެ ކަމަށް އެމްޑަބްލިއުއެސްސީން ބުނެފި އެވެ.

އެމްޑަބްލިޔުއެސްސީ އިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި އެމްޑަބްލިއުއެސްސީގެ މެނޭޖިންގ ޑިރެކްޓަރ ހަސަން ޝާހު ވިދާޅުވީ، ޕްލޭނިންގ އެންޑް ހައުސިންގ މިނިސްޓަރ މުހައްމަދު އަސްލަމް އާއި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)އާއެކު ޔުޓިލިޓީގެ ހިދްމަތް ދެމުންދާ ކުންފުނިތަކާއެކު ބޭއްވި މަޝްވަރާގެ މަތިން ތާވަލް ކުރެވިފައިވާ ގޮތަށް އެމްޑަބްލިއުއެސްސީއާ ހަވާލު ކުރެވިފައިވާ މަސައްކަތްތައް ކުރެވެމުންދާ ކަމަށެެވެ. އެގޮތުން ހިޔާ މަޝްރޫއުގެ ފްލެޓްތަކަށް ބޭނުންވާ ފެނާއި ނަރުދަމާގެ ހިދްމަތް ހަ މަސް ދުވަހުގެ ތެރޭގައި ފޯރުކޮށްދިނުމަށް އެއްބަސްވެފައިވާ ކަމަށެވެ.

އެހެންކަމުން، ފްލެޓްތަކަށް ބޭނުންވާ ފެނާއި ނަރުދަމާގެ ހިދުމަތް ފޯރުކޮށް ދިނުމުގެ މަސައްކަތް ތާވަލާ އެއްގޮތަށް ކުރިއަށްދާ ކަމަށާއި އަންނަ ފެބްރުއަރީ މަހު އެމަސައްކަތް އެއްކޮށް ނިންމާލެވޭނެ ކަމަށް ޝާހު ވިދާޅުވިއެވެ.

ޕްލޭނިންގ އެންޑް ހައުސިންގ މިނިސްޓަރ އަސްލަމް މިދިޔަ ޖުލައި މަހު ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައިވަނީ ކަރަންޓާއި ފެނާއި ނަރުދަމާގެ ހިދުމަތް ދިނުމަށް ސްޓެލްކޯ އާއި އެމްޑަބްލިއުއެސްސީއާ މަޝަވަރާ ކުރެވެމުންދާ ކަމަށާއި އެ މަސައްކަތް ނިންމައި ކުރިއަށް އޮތް 8 މަސް ދުވަހުގެ ތެރޭގައި އެ ފްލެޓްތަކަށް މީހުންނަށް ވަދެވޭވަރު ވާނެ ކަމަށެވެ.

ސަރުކާރުން 434 މިލިއަން ޑޮލަރުގެ ލޯނެއް ނަގައިގެން އިމާރާތް ކުރި 25 ބުރީގެ 16 ޓަވަރުގައި 6720 ފްލެޓް ހިމެނެއެވެ. އެ މަޝްރޫއު ހިންގާފައިވަނީ ޗައިނާގެ ސްޓޭޓް ކޮންސްޓްރަކްޝަން އިންޖިނިއަރިން ކޯޕަރޭޝަނުންނެވެ.