ސަރުކާރުގެ ބޯހިޔާވަހިކަމުގެ ދަށުން ފުލެޓު ދިނުމުގައި ނުފޫޒު ފޯރުވައިގެން އާއިލާގެ މީހަކަށް ފުލެޓު ދީފައިވާކަމަށް ދެކެވެމުންދާ ވާހަކަތަކަކީ އެއްވެސް އަސާސެއްނެތް ވާހަކަތަކެއް ކަމަށާއި އެކަން ކުއްވެރިކުރާ ކަމަށް ހެންވޭރު ދެކުނު ދާއިރާގެ މެންބަރު ހުސެން ޝަހީމް (އަނދުން ހުސެން) ވިދާޅުވެއްޖެއެވެ.
އާއިލާގެ މީހަކަށް ފުލެޓު ދީފައިވާކަމަށް ބުނެ ބައެއް މީޑިއާތަކާއި އާންމު ފަރާތްތަކުން ދައްކަމުންދާ ވާހަކަތަކަށް ރައްދު ދެއްވަމުން ރައްޔިތުން މަޖިލީހުގެ ޑެޕިއުޓީ މެޖޯރިޓީ ލީޑަރު ހުސެން ޝަހީމް ވިދާޅުވީ ފްލެޓް ލިބޭ މީހުންގެ ލިސްޓުގައި ދާއިރާގެ ވަކި ބޭފުޅެއްގެ ނަން އޮތުމުން އެކަން ސާފުކުރުމަށްޓަކައި ބަލާފައިވާނެ ކަމަށެވެ. އަދި އެއީ 300 އަކަފޫޓޫ ހަމަނުވާ ބިންކޮޅެއް އޮތް އާއިލާއެއް ކަމަށާއި އެފަރާތުގެ ނަން ބޯހިޔާވަހިކަމުގެ ލިސްޓުގައި އެންމެ ފުރަތަމަވެސް ހިމަނާފައިވަނީ ކުރީ ސަރުކާރުން ކަމަށް ހުސެން ވިދާޅުވިއެވެ.
"ދެމަފިރިންނާއި، ތިން ދަރިންނާއި، އެ ދަރިންގެ ފިރިންނާއި، އަނބިން އަދި މާމަ ދަރިންނަށް އޮތީ ހަމައެކަނި އެމިންވަރުކަން. އެފަރާތުގެ ނަން ބޯހިޔާވަހިކަމުގެ ލިސްޓުގައި ހިމެނިފައި އޮތީ ކުރީ ސަރުކާރުގައި. މިކަން މިހެން އޮތްއިރު އަޅުގަނޑުގެ އާއިލާގެ މީހަކަށް ބޯހިޔާވަހިކަން ލިބިފައިވަނީ އަޅުގަނޑު ނުފޫޒު ބޭނުންކޮށްގެން ކަމަށް ދޭހަވާ ގޮތަށް މީޑިއާތަކާއި އާންމުން ދައްކާ ވާހަކަތައް ކުއްވެރިކުރަން."ހެންވޭރު ދެކުނު ދާއިރާގެ މެންބަރު ހުސެން ޝަހީމް
މިވާހަކަތަކަށް ރައްދު ދެއްވަމުން އަނދުން ހުސެން ވިދާޅުވީ ވަކި ފަރާތަކަށް ނުފޫޒުން ފްލެޓް ހޯދައިދިންކަމަށް ބުނެ، ހަގީގަތާ ހިލާފު ވާހަކަ ދެއްކުމަކީ ބޯހިޔާވަހިކަން ހައްގުވާ ފަރާތަށް ލިބިގެންދާނެ ނިކަމެތި ކަމެއް ކަމަށެވެ.
މެންބަރު ހުސެން ޝަހީމްގެ އާއިލާގެ މީހަކަށް ނުފޫޒުން ފްލެޓް ދިންކަމަށް ބައެއް ފަރާތްތަކުން ބުނަމުންދާއިރު ކުރީގެ ރައީސް ޔާމީން ސަރުކާރުގައި ވަނީ މަޖިލިސް މެންބަރުންނާއި އާއިލާގެ މީހުން ހިމެނޭ ގޮތަށް 73 މީހަކަށް ފްލެޓް ދީފައެވެ. މީގެ ތެރެއިންވެސް ފްލެޓް ދިނުމުގައި އިސްކަންދީފައިވަނީ ދެރަ ނިކަމެތިންނަށްވުރެ ބޮޑަށް ފޯރާ މީހުންނަށެވެ.
މިކަމާ ގުޅިގެން ރައްޔިތުންގެ މަޖިލީހުގެ ޤައުމީ ތަރައްޤީއާއި ތަރިކައިގެ ކޮމިޓީން ވަނީ ކުރީ ސަރުކާރުގެ ސިޔާސީ މަޤާމުތަކުގައި ތިއްބެވި އިސް ވެރިންނާއި، މަޖިލިސް މެމްބަރުންނަށް ޤަވާއިދާ ޚިލާފަށް ފްލެޓް ދީފައިވޭތޯ ބަލަން ނިންމާފައެވެ.
