އަންނަ އަހަރަށް ލަފާކުރާ ދައުލަތުގެ ބަޖެޓަކީ އިގްތިޞާދީ ހަރަކާތްތައް މިހާރަށްވުރެ ބޮަޑަށް ފުޅާވާނެ ގޮތަކަށް އަދި ސަރުކާރު ހިއްސާވާ ކުންފުނިތަކުން ލިބޭ ފައިދާ އިތުރުވާނެ ގޮތަކަށް ބައްޓަން ކުރެވިގެންދާނެ ބަޖެޓެއް ކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.
ރާއްޖެ ޓީވީގެ "ފަލަ ސުރުޚީ" ޕްރޮގްރާމްގައި އަންނަ އަހަރަށް ލަފާ ކުރާ ދައުލަތުގެ ބަޖެޓްގެ އަމާޒުތަކާއި ބަޖެޓް ބައްޓަން ކުރައްވާނެ ގޮތާއި ގުޅޭގޮތުން ދެންނެވުނު ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ކޮވިޑް-19 ގެ ހާލަތާއި ގުޅިގެން ނޭޝަނަލް ޓާސްކް ފޯހެއް ހެދި އިގްތިޞާދު އަލުން ބިނާކޮށް ރީއޮރިއެންޓް ކުރުމުގެ މަސައްކަތް ކުރިޔަށްދާ ކަމަށެވެ. އެގޮތުން ހަމައެކަނި ފަތުރުވެރިކަމުގެ ސިނާއަތަށް ބަރޯސާނުވެ ރާއްޖޭގައި އިތުރު ސިނާއަތްތައް ކުރިއެރުވުމަށްޓަކައި މަސައްކަތްތަކެއް އެބަ ކުރެވޭ ކަމަށް މިނިސްޓަރ ވިދާޅުވިއެވެ.
އެގޮތުގެ މަތިން ތަރައްޤީ ކުރާނެ ސެކްޓަރތައް ކަނޑައަޅާ އެ މަގުން މަސައްކަތްތަކެއް ކުރެވެމުންދާ ކަމަށް މިނިސްޓަރ ވިދާޅުވިއެވެ. މަސްވެރިކާއި، ދަނޑުވެރިކަން އަދި އިޔާދަ ކުރަނިވި ހަކަތަ ތަރައްޤީ ކުރުމަށް އިތުރު މަސައްކަތްތަކެއް އަންނަ އަހަރު ކުރެވިގެންދާނެ ކަމަށް މިނިސްޓަރ ވިދާޅުވިއެވެ.
އޭގެތެރޭގައި މަސްވެރިކަން އިތުރަށް ފުޅާކުރުމަށް ސައުދީ ފަންޑުގެ އެހީ އާއި އަދި އިންޑިޔަމް އެކްޒިމް ބޭންކް އެލްއޯސީގެ ކްރެޑިޓް ފެސިލިޓީގެ ތެރެއިން ސްޓޯރޭޖް ކެޕޭސިޓީއެއް އަދި ރާއްޖޭގައި ވެލިޔު އެޑްކޮށް އެކްސްޕޯޓް ކުރެވޭނެ މެކޭނިޒަމެއް އިތުރަށް ތަރައްޤީކުރުމަށް ރާވާފައިވޭ. އަދި އޭގެއިތުރުން ދަނޑުވެރިކަން ތަރައްގީކުރުމަކީ ވައުދެއް. އެގޮތުން އެގްރިކަލްޗަރ ކުންފުނީގެ ތެރެއެިން މަސައްކަތްކުރަން ފެށިފައިވަނީ. ސަރުކާރު ކުންފުނީގެ ތެރެއިން މިބަލަނީ ދަނޑުވެރިކަން އިތުރު ހަރަފަތަކަށް ކުރިޔަށް ގެންދެވޭނެކަމަށް. މީގެއިތުރުން މުޅިން އިޔާދަކުރަނިވި ހަކަތައަށް އެބަޖެހޭ ދާން. އެހެންކަމުން އެމަސައްކަތަށް އިތުރު ސޯލަރ އެނަރޖީ ޕްރޮޖެކްޓްތަކަށްވެސް އަދި އިތުރު ޓަރގެޓް ކޮށްގެން ޑައިވިސިފިކޭޝަން މަސައްކަތެއް 2021 ވަނަ އަހަރު ފެންނާނެ.ފިނޭންސް މިނިސްޓަރ އިބްރާހީމް އަމީރު
މިނިސްޓަރ ވިދާޅުވީ އަންނަ އަހަރުގެ ބަޖެޓް ހުށަހަޅާއިރު ގަސްތުކޮށްފައި ވަނީ ސަރުކާރު ހިއްސާވާ ކުންފުނިތައް ޕްރައިވަޓައިޒް ކޮށްގެން އިތުރަށް ފައިދާ ލިބޭނެ ކުންފުނިތަކަކީ ކޮބައިތޯ ބަލައިގެން ކުރިޔަށް ދާންކަމަށެވެ. އެގޮތުން އޭގެ ދިރާސާތަކެއް ކުރެވި 2021 ވަނަ އަހަރު ޕްރައިވަޓައިޒޭޝަންގެ ހަރަކާތްތައް ކުރިޔަށް ގެންދާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ކޮވިޑް-19 ގެ ހާލަތާއި ގުޅިގެން އިގްތިޞާދީ ދުވެލި މަޑުޖެހިފައި ވީނަމަވެސް މިހާރު ބެލެވެނީ އަންނަ އަހަރު އިގްތިޞާދު ރީބައުންޑް ވެގެންދާނެ ކަމަށް ކަމަށެވެ. އެގޮތުން 11 އިންސައްތަ އާއި 17 އިންސައްތައިގަ އިގްތިޞާދީ ދުވެލި ހުންނާނެ ކަމަށް ލަފާކުރެވޭ ކަމަށް މިނިސްޓަރ ވިދާޅުވިއެވެ.
މިއަހަރުގެ ބަޖެޓްގައި އަންދާޒާ ކޮށްފައިވަނީ ގައުމީ އުފެއްދުންތެރިކަން 7.5 އިންސައްތައިގައި ހުންނާނެ ކަމަށެވެ. އެހެންނަމަވެސް ކޮވިޑްގެ ހާލަތާއި ގުޅިގެން 11.5 އިންސައްތަ އިގްތިޞާދު ދަށަށް ގޮސްފައިވާ ކަމަށް މިނިސްޓަރ ވިދާޅުވިއެވެ. ނަމަވެސް 2021 ވަނަ އަހަރު ޔޫ ޝޭޕް ރިކަވަރީއަކަށް އިގްތިޞާދު ދާނެ ކަމަށް ލަފާކުރެވޭ ކަމަށް މިނިސްޓަރ ވިދާޅުވިއެވެ.
