ޓޫރިޒަމް މިނިސްޓްރީގައި އޮތީ ވަރަށް ފުރިހަމަ ޓީމެއް ކަމަށާއި، ދިޔަ ފުރަތަމަ ދުވަހު ވެސް ހައިރާންވި ކަމަށް ދާދި ފަހުން ޓުއަރިޒަމް މިނިސްޓަރު ކަމާ ހަވާލުވެވަޑައިގެންނެވި ޑރ. އަބްދުﷲ މައުސޫމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މިނިސްޓަރު މައުސޫމް ވިދާޅުވީ ފުރަތަމަ މިނިސްޓަރު ކަމާއި ހަވާލުވުމުގެ ކުރިން މިނިސްޓްރީގެ ޓީމާ ބެހޭ ގޮތުން ތަފާތު މެސެޖްތައް ލިބުނު ކަމަށެވެ. ނަމަވެސް މިނިސްޓްރީގެ ޓީމް ރަނގަޅު ނޫން ކަމަށް ލިބުނު މައުލޫމާތަކީ ދޮގެއް ކަމަށާއި، މިނިސްޓްރީ އަށް ދިޔަ ފުރަތަމަ ދުވަހު ވެސް ޓީމްގެ މަސައްކަތްތައް ފުރިހަމަކަމުން ހައިރާންވި ކަމަށް މިނިސްޓަރު މައުސޫމް ވިދާޅުވިއެވެ.
މިނިސްޓަރު މައުސޫމް ވިދާޅުވީ ޓޫރިޒަމް މިނިސްޓްރީގައި އޮތީ ވަރަށް ބަރާބަރު ޓީމެއް ކަމަށާއި، އެ ޓީމު ރަނގަޅަށް ކުޅެން ފެށުމުން ނަތީޖާ ވަރަށް ބޮޑުތަނުން ރަނގަޅުވެ ނަމޫނާ މިނިސްޓްރީއަކަށް ބަދަލު ވެގެންދާނެ ކަމުގެ ފުރިހަމަ ޔަގީންކަން އެބަ އޮތް ކަމަށެވެ.
އެގޮތުގައި ތި ވިދާޅުވި ގޮތަށް ތަފާތު ކަންތަކާ ހެދި ޓޫރިޒަމް މިނިސްޓްރީއާ ދޭތެރޭގައި ރައްޔިތުން ދެކޭ ގޮތް ކޮންމެވެސް ވަރަކަށް ބަދަލުވެފައި އޮތް ދުވަސްވަރެއްގައި އަޅުގަނޑު ހަވާލުވާން މިޖެހުނީ. ދެން އަޅުގަނޑަށް ވަރަށް ޔަގީންކަން އެބަ އޮތް އިރާދަކުރެއްވިއްޔާ ޓޫރިޒަމްގެ ޓީމާއެކު އަޅުގަނޑުމެންނަށް ކުރިއަށް ދެވޭނެކަން. ދެން އޮފީހެއްގައި ތިބޭ މުއައްޒަފުން، އަދި ކުންފުންޏެއްގައި މި މުއައްޒަފުން މި ވަރަށް މޮޅު ބައެއް. އެހެންވީމަ ޖެހޭނެ އެބޭފުޅުންނަށް އެއްވެސް ކަހަލަ އެބޭފުޅުންގެ ޕާފޯމަންސް ގެޕެއް އިދެއްޖެއްޔާ އެގެޕް ފިލްކޮށްލަން ޓްރެއިންކޮށް ތަމްރީންކޮށް ކޯޗު ކޮށްދޭން އެނގޭތޯ.ޓުއަރިޒަމް މިނިސްޓަރު ޑރ. އަބްދުﷲ މައުސޫމް
މިނިސްޓަރު މައުސޫމް ވިދާޅުވީ މަގާމާ ހަވާލުވެވަޑައިގެންނެވީ މިނިސްޓްރީގެ ކިލަނބުކަން ފިލުވާލަދިނުމަށް ކަމަށާއި، އެއީ ރައްޔިތުން ކުރަމުންދާ އުންމީދު ކަމަށެވެ. އަދި ވަރަށް އަވަހަށް ރައްޔިތުންނަށް ނަތީޖާ ފެންނާނެ ކަމަށް މިނިސްޓަރު ވިދާޅުވިއެވެ.
އެގޮތުން ކުރަންޖެހޭ މަސައްކަތްތައް ކުރަމުންދާ ކަމަށާއި، އެތެރޭގެ ނިޒާމަށް ގެންނަން ޖެހޭ ބަދަލުތައް ގެންނާނެ ކަމަށް މިނިސްޓަރު މައުސޫމް ވިދާޅުވިއެވެ. އަދި ވިދާޅުވީ ރާއްޖޭގައި ގާނޫނީ ގަވާއިދުތައް ހެދިފައިވާ ކަމަށާއި، އަމާޒަކީ ގާނޫނާ ގަވާއިދުގައި ލިޔެފައި ހުންނަ ވަރަށްވުރެ ވެސް ފުރިހަމައަށް މަސައްކަތްތައް ކުރުން ކަމަށެވެ.
ޖިންސީ ގޯނާތަކުގެ ތުހުމަތުތަކެއް ކުރެވި ޓޫރިޒަމް މިނިސްޓަރު ކަމުން އަލީ ވަހީދު ވަކިކޮށްފައިވާ މައްސަލަ ފެންމަތިވެފައިވަނިކޮށް މިނިސްޓްރީގެ މުވައްޒަފުންނާ ބެހޭ ގޮތުން ވެސް ބޭ އަދަބީ އެތަކެއް ވާހަކަތަކެއް ފެންމަތިވެގެން ދިޔައެވެ.
އެގޮތުން މިނިސްޓްރީގެ މުވައްޒަފުން ލޮކްޑައުން ވެގެން ތިބި މާގިރި ހޮޓެލްގެ ތެރޭގައި މުވައްޒަފުން އުޅުނު ގޮތުގެ ސީސީޓީވީ ފޫޓޭޖް ލިބުނު ކަމަށް ބުނެ މީޑިއާއަކުން ވަނީ ރިޕޯޓްކޮށްފައެވެ. އެތަނުގައި ތިބި އަންހެން މުވައްޒަފުން ފިރިހެން މުވައްޒަފުންގެ ކޮޓަރި އަށް ވަންނަ ތަނުގެ މަންޒަރު ފެންނަ ކަމަށް އެ ނޫހުން ވަނީ ރިޕޯޓްކޮށްފައެވެ. ނަމަވެސް ހޮޓަލުގެ ސީސީޓީވީ ފޫޓޭޖް އެއްވެސް ބަޔަކަށް ނުދޭ ކަމަށް މާގިރި ހޮޓެލް އިން ވަނީ ބުނެފައެވެ.
