ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ހުސްވެފައިވާ މެންބަރުންގެ މަޤާމުތަކަށް އައްޔަނުކުރުމަށް ތިން ބޭފުޅަކަށް ރުހުންދޭން ފެންނަކަމަށް މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ނިންމައިފިއެވެ.

ކޮމިޓީން ވަނީ އެޗްއާރުސީއެމްގެ ހުސްވެފައިވާ ހަތަރު މެންބަރުކަމުގެ މަޤާމަށް މީހުން ޢައްޔަނުކުރުމަށްޓަކައި، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު މަޖިލީހަށް ނަން ފޮނުއްވާފައިވާ ފަރާތްތަކާ ވަކިވަކިން އިންޓަރވިއުކޮށްފައެވެ. މި މަގާމަށް ކުރިމަތިލެއްވި 8 ބޭފުޅެއްގެ ނަން ކޮމިޓީއަށް ފޮނުވާފައިވާއިރު، އެ ފަރާތްތަކާއި އިންޓަރވިއު ކުރުމަށްފަހު ކޮމިޓީން ނިންމީ ތިން ބޭފުޅަކަށް ރުހުންދިނުމަށެވެ.

އެއީ އާމިނަތު ޝަފާޢަތު ޢަބްދުއްރައްޒާޤާއި, މުއުމިނާ ވަޙީދުގެ އިތުރުން ޑރ. އަޙްމަދު އަދުހަމް ޢަބްދުﷲ އަށެވެ. މި ބޭފުޅުންނަށް ރުހުންދީފައިވަނީ ކޮމިޓީ ބައްދަލުވުމަށް ހާޒިރުވެ ވޯޓުގައި ބައިވެރިވި މެންބަރުންގެ 3/2 (ތިންބައިކުޅަ ދެބައި) އަގުލަބިއްޔަތުންނެވެ.

ކޮމިޓީން ބުނީ މި ތިން ބޭފުޅުންނާއި ކުރެވުނު އިންޓަރވިއުތަކަށާއި ތަޢުލީމާއި ތަޖުރިބާއަށް ރިޢާޔަތްކުރާއިރު، މި ތިން ބޭފުޅުންނަކީ މި މަޤާމުގެ މަސްއޫލިއްޔަތު އެންމެ ފުރިހަމަ ގޮތުގައި އަދާކުރެވޭނެ ބޭފުޅުން ކަން ކޮމިޓީއަށް ގަބޫލުކުރެވޭ ކަމަށެވެ.

ހިއުމަން ރައިޓްސް ކޮމިޝަން އޮފް ދަ މޯލްޑިވްސްގެ ހުސްވެފައިވާ މެންބަރުންގެ މަޤާމުތަކަށް ބޭފުޅުން ޢައްޔަންކުރެއްވުމަށްޓަކައި ރައްޔިތުންގެ މަޖިލީހަށް ނަންތައް ހުށަހަޅުއްވާފައި ވަނީ އެ ކޮމިޝަނުގެ 3 މެންބަރުން އިސްތިޢުފާ ދެއްވާފައިވާތީ އެވެ. އަދި އެ ކޮމިޝަންގެ މެންބަރެއްގެ މެންބަރުކަމުގެ މުއްދަތު، 12 ސެޕްޓެންބަރު 2020 ގެ ނިޔަލަށް ހަމަވާތީ، އެ މަޤާމުތަކަށް މެންބަރުން ޢައްޔަންކުރެއްވުމަށްޓަކައެވެ.

ކޮމިޝަންގެ މެމްބަރުކަމުން އިސްތިއުފާ ދެއްވާފައިވަނީ ކޮމިޝަންގެ ރައީސްގެ މަޤާމުގައި ހުންނެވި އައިމިނަތު އީނާސްގެ އިތުރުން އައިޝަތު އަފްރީން އެވެ. އަދި ކޮމިޝަނުގެ މެންބަރު މޫސާ ޢަލީ ކަލޭފާނެ އެވެ. 3 މެމްބަރުންވެސް މަޤާމުން އިސްތިއުފާ ދެއްވާފައިވަނީ އިތުބާރު ނެތްކަމުގެ މައްސަލަ ރައްޔިތުންގެ މަޖިލީހުން ކުރިއަށްގެންދަން ފެށުމުންނެވެ.

އޭގެއިތުރުން ކޮމިޝަނުގެ ނާއިބު ރައީސް މުހައްމަދު ޒާހިދު މަޤާމުން ވަކިކުރުމަށް ފާސްކޮށްފައިވެއެވެ. އެގޮތަށް ފާސްކޮށްފައިވަނީ ޖުލައި މަހުގެ 22 ވަނަ ދުވަހު އެވެ.