މާލެ ރަށްވެހިންނަށް ގެދޮރަކީ ހަމަ އެކަނި ދިރިއުޅެން ބޭނުން ކުރާތަނެއް ނޫން ކަމަށާއި، ދިރިއުޅުން ސަސްޓެއިން ކުރުމަށް ލިބޭ ފްލެޓް ކުއްޔަށް ދޫކުރުން މުޅިން ގޯސް ނޫން ކަމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރއިން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މިނިސްޓްރީގެ، ޑެޕިއުޓީ މިނިސްޓަރު ފާތިމަތު ނިއުމާ ވިދާޅުވީ ގެދޮރަކީ ވަރަށް ބޮޑަށް އާމްދަނީއަށް ހޯދުމަށް ބޭނުން ކުރެވޭ އެއްޗެއް ކަމަށާއި، މިހާރުގެ ހާލަތުގައި ވަޒީފާއިން ލިބޭ މުސާރައިން އެކަނި ފުއްދާ ނުލެވޭ ކަމަށެވެ.
އޭނާ ވިދާޅުވީ މާލޭގައި ދިރިއުޅުމުގެ އަގު އިންތިހާއަށް މަތިވާއިރު، މާލޭގެ ރަށްވެހިންގެ ތެރެއިން ސޯޝަލް ހައުސިން ލިބޭ ފަރާތްތަކުގެ ތެރެއިން އިތުރު ގޮތެއް ފެންނަ ފަރާތްތަކުން ކުއްޔަށް ދިނުން މުޅިން ގޯސް ނޫން ކަމަށެވެ. ނަމަވެސް ހައުސިން ޔުނިޓް ކުއްޔަށް ދިނުމަކީ ގެދޮރުވެރިކަން ބޭނުންވާ މީހުންގެ ހައްގަށް ލިބޭ އުނިކަމެއްކަން ފާހަގަކުރައްވައި ނިއުމާ ވިދާޅުވީ ސަރުކާރު މިހިންގާ މަޝްރޫއުތަކުން ފްލެޓް ލިބޭ ފަރާތްތަކުން އެފްލެޓްތައް އެންމެ ހެޔޮ ގޮތުގައި ބޭނުން ކުރުމަށް އެދޭ ކަމަށެވެ.
ތިވިދާޅުވިހެން ފްލެޓެއް ލިބިފައި، ފްލެޓް މިހާރު މިސާލަކަށް މިދައްކަން ޖެހެނީ މަހަކު 7000 ރުފިޔާ.7000 ރުފިޔާގެ މައްޗަށް އޭގެ ތިން ގުނައަށް އެފްލެޓް ކުއްޔަށް ދެވޭ ކަމަށްވަންޏާ އާމްދަނީއަށް އެބަ އިތުރު އެތިކޮޅެއް ލިބޭ ކޮންމެ މަހަކު ވެސް. އެހެންވީމަ ކޮލިޓީ އޮފް ލައިފް ކުއްޔަށްދީފައި އެހެންތަނެއްގައި ހުރީމަ އެބަ އިމްޕޫރްވެއޭ އެއަރޖިއުމެންޓް އަޅުގަނޑުމެންނަށް މޭކް ކުރެވިދާނެ އެބޭފުޅުން ކުއްޔަށް ދެނީ ކީއްވެގެންތޯ. އެކަމަކު އެހެން ހެދީމަ މިވާ ގޮތަކީ ހަމަ މާލެއިން ދެން އަނެއްކާ ކުއްޔަށް ބޭނުންވާ ގެދޮރުވެރިކަން ބޭނުންވާ އެހެންމީހާ ގެ ހައްގެއް އެނިގުޅައި ގަނެވެނީ. އެހެންވީމަ އަޅުގަނޑުމެން އެދެނީ ޚާއްސަކޮށް ސަރުކާރު މިހިންގާ މަޝްރޫއުތަކުން ފްލެޓް ލިބޭ ފަރާތްތަކުން އެފްލެޓްތަކުގެ ބޭނުން އެގޮތުގައި ކުރުން.ޑެޕިއުޓީ މިނިސްޓަރު ފާތިމަތު ނިއުމާ
ފްލެޓް ލިބޭ މީހުން އެފްލެޓްތަކުގައި ދިރިނޫޅި ކުއްޔަށް ދޭ މައްސަލައަށް އަލިއަޅުއްވާލައްވާ ނިއުމާ ވިދާޅުވީ މިނިސްޓްރީއަށް ކޮންމެ ހަފްތާއަކު ނުވަތަ ކޮންމެ މަހަކު އެއްފަހަރު ގޮސް އެފްލެޓްތަކުގައި ދިރިއުޅެނީ ފްލެޓް ލިބުނު މީހުންތޯ މޮނިޓަރ ކުރުމަކީ ވަރަށް އުދަނގޫ ކަމެއް ކަމަށާއި، އެގޮތަށް އެމަސައްކަތް ނުކުރެވޭނެ ކަމަށެވެ. ނަމަވެސް ހައުސިން ޑިމާންޓްމެންޓުން ކޮންމެވެސް ވަރަކަށް މޮނިޓަރިންތައް ކުރިއަށް ގެންދާ ކަމަށް އޭނާ ވިދާޅުވިއެވެ. އަދި ވިދާޅުވީ ކުރިއަށް އޮތްތަނުގައި ފަހި ދިރިއުޅުން ކޯޕްރޭޝަން މެދުވެރިކޮށް ވެސް މޮނިޓަރިންގެ މަސައްކަތްތައް ކުރިއަށް ގެންދާނެ ކަމަށެވެ.
މިނިސްޓްރީގެ ސީނިއަރ އެގްޒެކެޓިވް ޑިރެކްޓަރ އަހުމަދު އާމިރު ވިދާޅުވީ ފްލެޓް ލިބޭ ފަރާތްތަކުން ކުއްޔަށް ދޫކުރަނީ ދިރިއުޅުމަށް ކުރިމަތިވާ އެކިއެކި ސަބަބުތަކާ ގުޅިގެން ކަމަށެވެ. އެގޮތުން ގަބޫލުކުރެވޭ އުޒުރުތަކުގައި ވެސް ކުއްޔަށް ދޫކުރާ ފަރާތްތަކުން އުޅޭކަމަށް އާމިރު ވިދާޅުވިއެވެ.
އަޅުގަނޑަށް ގަބޫލު ކުރެވޭ ގޮތުގައި މި މައިގަނޑު ދެކަމެއް އަޅުގަނޑު ފާހަގަކުރާނަން. މިސާލަކަށް މާލޭގެ ގޯއްޗެއް ނޫނީ 600 ނުނީ 700 އަކަފޫޓުގެ ގޯއްޗެއް އެހެން އޮތް ބަޔަކު ސޯޝަލް ހައުސިންއަށް ލައިގެން ސޯޝަލް ހައުސިންގެ ތެރެއިން ހުޅުމާލެއިން ތިން ކޮޓަރީގެ ފްލެޓެއް ލިބުނީ. އެހެންވީމަ އެބޭފުޅުން ކޮންމެހެން ބޭނުމެއް ނުވާނެ ތެދެއްތޯ ކޮންމެހެން އެތަނަށް މޫވް ކުރާކަށް. މާލޭގައި އޯލް ރެޑީ އެމީހުންނަށް ލިބިފައި އިންތަނުގަ މިގޮތަށް އެބަހުރި އަޅުގަނޑުމެންނަށް ފާހަގަކުރެވިފައި. މާލޭގައި އެމީހުންގެ އޯލްރެޑީ އެމީހުންގެ 600 ނުވަތަ 700 އަކަފޫޓުގައި ދިރިއުޅެމުން ހުޅުމާލެ ސޯޝަލް ހައުސިންގެ ތެރެއިން އެމީހުންނަށް ސެކަންޑް ހޯމްގެ ގޮތުގައި ލިބުނުތަން ހަމަ ކުއްޔަށް ދީގެން އެންޖޯއީ ކުރަމުންދާ ފަރާތްތަކެއް މީގައި ފާހަގަކުރެވޭ.ސީނިއަރ އެގްޒެކެޓިވް ޑިރެކްޓަރ އަހުމަދު އާމިރު
އާމިރު ވިދާޅުވީ ފްލެޓްތައް ދިނުމުގައި ސްކީމްތައް އެކުލަވާލާއިރު މިހާރަށް ވުރެ ހަރުދަނާ ކުރަން ޖެހޭ ކަމަށެވެ. އެގޮތުން ފްލެޓް ލިބެނީ އެންމެ ހައްގު ފަރާތްތަކަށް ކަމަށްވާނަމަ ކުއްޔަށް ދޫކުރާ މައްސަލަ ކުރިމަތިނުވާނެ ކަމަށް އާމިރު ވިދާޅުވިއެވެ.
