ކޮވިޑް-19 އާ ގުޅިގެން އިސްސަފުގައި މަސައްކަތްކުރާ މީހުންގެ ތެރެއިން އެންމެ ގިނައިން ޕޮޒިޓިވް ވެފައިވަނީ އެއަރޕޯޓްގައި މަސައްކަތްކުރާ މުވައްޒަފުން ކަމަށް ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބުނެފި އެވެ.

ހޮނިހިރު ދުވަހުގެ ރޭ އެޗްއީއޯސީން ބޭއްވި ނޫސްވެރިންގެ ބައްދަލުވުމުގައި މައުލޫމާތުދެއްވަމުން ޑރ. އިބްރާހީމް އަފްޒަލް ވިދާޅުވީ، ކޮވިޑް-19 އާއި ގުޅިގެން މާލެ ސަރަހައްދު ފުރަބަންދުކުރި އިރުގެ ހާލަތާއި ފުރަބަންދަށް ލުއިތަކެއް ދިނުމުން މިހާރުގެ ޙާލަތާއި އަޅާބަލާއިރު، ބަލި ފެތުރޭގޮތުގެ ޓްރެންޑަށް ވަރަށް ބޮޑެތި ބަދަލުތަކެއް އައިސްފައިވާ ކަމަށެވެ.

ޑރ. އަފްޒަލް ވިދާޅުވީ، ފުރަބަންދަށް ލުއިދިންފަހުން ފްރަންޓްލައިންގައި މަސައްކަތް ކުރާ މީހުން މި ބަލީގެ ނުރައްކަލަށް ހުށެހެޅޭ މިންވަރުވެސް ވަރަށް ބޮޑަށް އިތުރުވެފައިވާކަމަށެވެ. އެގޮތުން އެއަރޕޯޓުގައި މަސައްކަތްކުރާ ސްޓާފުންނާއި، ޞިއްޙީ ޚިދުމަތްތެރިންނާއި، ސިފައިންނާއި ފުލުހުންނަށް ބަލިޖެހޭ މިންވަރު އިތުރުވެފައިވާކަން އޭނާ ފާހަގަކުރެއްވިއެވެ.

މީގެއިތުރުން، ހައި ރިސްކް ކެޓެގަރީގައި ހިމެނޭ އެހެނިހެން ބޮޑެތި ބަލިތަކަށް ފަރުވާ ހޯދާ މީހުންނަށްވެސް ބަލިޖެހޭ ޢަދަދު ރާއްޖޭގައި އިތުރުވާން ފަށާފައިވާކަމަށާއި ވަކިން ޚާއްސަގޮތެއްގައި ހިތުގެ ބަލިތަކާއި، ފުއްޕާމޭގެ ބަލިތަކާއި، ހަކުރު ބައްޔާއި ކެންސަރު ބަލީގެ މީހުންނަށް ކޯވިޑް-19 ޖެހިގެން ރިޕޯޓްކުރާ މިންވަރު އިތުރުވެފައިވާކަމަށް ޑރ. އަފްޒަލް ވިދާޅުވިއެވެ. އަދި ރާއްޖޭގައި މި ބަލި އެންމެ ފުރަތަމަ ފެނުނު ދުވަސްވަރާއި އަޅާބަލާއިރު، މާބަނޑު މީހުންނަށްވެސް މި ބަލިޖެހޭ މިންވަރު އިތުރުވަމުންދާކަން ތަފާސް ހިސާބުތަކުން ހާމަވެފައިވާކަމަށް ޑރ. އަފްޒަލް ވިދާޅުވިއެވެ.

ޑރ. އަފްޒަލް ވިދާޅުވީ ފުރަބަންދުކުރުމާއެކު ބައްޔަށް ޕޮޒިޓިވްވާ ބިދޭސީން ޢަދަދު އިތުރުވި ނަމަވެސް، މިހާރު ބައްޔަށް ޕޮޒިޓިވްވާ ބިދޭސީންގެ ޢަދަދު އެއްވަރެއްގައި ހިފެހެއްޓިފައިވާ ކަމަށެވެ. އެހެންނަމަވެސް ފުރަބަންދުގެ ފިޔަވަޅުތަކަށް ލުއިދިންފަހުން ބައްޔަށް ޕޮޒިޓިވްވާ ދިވެހިންގެ ޢަދަދު ކަންބޮޑުވާހާ މިންވަރަކަށް އިތުރުވެފައިވާކަމަށް އޭނާ ވިދާޅުވިއެވެ. އަދި ރާއްޖޭގައި މި ބައްޔަށް ޕޮޒިޓިވްވާ މީހުންގެ ތެރޭގައި ގިނައީ ޢުމުރުން 18 އަހަރާއި 40 އަހަރާ ދެމެދުގެ މީހުންކަމަށާއި، ބަލިޖެހޭ މީހުންގެ ތެރޭގައި އަންހެނުންނަށްވުރެ ފިރިހެނުންގެ ނިސްބަތް އިތުރުކަމަށް ޑރ. އަފްޒަލް ވިދާޅުވި އެވެ. އަދި މިދިޔަ ޖުލައިމަހާ އަޅާބަލާއިރު މި ހިނގާ އޯގަސްޓްމަހު ބައްޔަށް ޕޮޒިޓިވްވާ މީހުންގެ އަދަދު ވަރަށް ބޮޑުތަން އިތުރުވެފައިވާކަމަށާއި ފަހަކަށް އައިސް ބައްޔަށް ޕޮޒިޓިވްވާ މީހުންގެ ތެރޭގައި ގިނައީ ފްރަންޓްލައިންގައި މަސައްކަތް ކުރާ މީހުންގެ އިތުރުން ވަޒީފާގައި ނޫޅޭ މީހުންކަމަށާއި އަދި ސްކޫލާއި ކޮލެޖްތަކުގައި ކިޔަވާ ކުދިންނާއި ޓީޗަރުން ޕޮޒިޓިވްވާ ޢަދަދުވެސް އިތުރުވަމުންދާކަން ޑރ. އަފްޒަލް ފާހަގަކުރެއްވިއެވެ.

އަފްޒަލް ވިދާޅުވީ، ސްކޫލްތަކާއި ކޮލެޖްތައް ބަންދުކޮށްފައިވާއިރުވެސް، ދަރިވަރުންނާއި ޓީޗަރުން ޕޮޒިޓިވްވަމުން ދަނީ ބޭރުތެރޭގައި މިބަލި ފެތުރިފަވާލެއް ބޮޑުކަމުންކަން ފާހަގަ ކުރެވޭ ކަމަށެވެ.

މާލެ ސަރަހައްދު ފުރަބަންދުކުރުމާއި ގުޅިގެން، މިދިއަ މާރޗް މަހުގެ 27 ވަނަ ދުވަހުން ފެށިގެން ރާއްޖޭގެ ބޯޑަރުވެސް ބަންދުކުރި އެވެ. ނަމަވެސް ފުރަބަންދަށް ލުއިތައް ދެމުންގޮސް، މިދިއަ ޖުލައި މަހުގެ 15 ވަނަ ދުވަހުން ފެށިގެން ރާއްޖޭގެ ބޯޑަރު ވަނީ އަލުން ހުޅުވާލާފަ އެވެ.