ހުކުރު ދުވަހުގެރޭ މާލޭގައި ހިނގި އަލިފާނުގެ ހާދިސާގައި ގަދަގެ މުހައްމަދުފުޅު ބިލްޑިންގައި ހިންގަމުން އަންނަ ސްޓޭޓް ބޭންކް އޮފް އިންޑިއާ (އެސްބީއައި) ގެ ބައެއް ފްލޯތަކަށް ގެއްލުންވެފައިވާ ކަމަށާއި، އެކަމަކު އާދިއްތަ ދުވަހު ހިދުމަތް ދިނުމުގެ މަސައްކަތް ކުރަމުންދާ ކަމަށް އެ ބޭންކުން ބުނެފިއެވެ.
އެސްބީއައި އިން ދަނީ ގަދަގެ މުހައްމަދުފުޅު ބިލްޑިންގައި ފަސް ފްލޯއެއް ހިންގަމުންނެވެ. އެ އިމާރާތުގެ އެންމެ މަތީ ފްލޯގައި އަލިފާން ރޯވެ އިމާރާތުގެ އެހެނިހެން ފްލޯތަކަށްވެސް އަލިފާނުގެ އަސަރުކޮށް ގެއްލުންތަކެއްވިއެވެ. އެސްބީއައިގެ އިތުރުން އުރީދޫގެވެސް އޮފީސް ހިންގަމުން އަންނަ މި އިމާރާތުގެ އެންމެ މަތީ ޓެރަސް ގައި އަލިފާނު ރޯވީ، އެ އިމާރާތާ އިންވެގެން ހުރި ކެފޭ ޓިއޯލޯ ގައި ރޯވި އަލިފާން ކޮންޓްރޯލް ނުކުރެވިގެންނެވެ.
ރާއްޖެ.އެމްވީއާ ވަހަކަ ދައްކަވަމުން ރާއްޖޭގައި ހުންނަ އެސްބީއައި ބްރާންޗްގެ ސީއީއޯ ބާރަތް މިޝްރާ ވިދާޅުވީ، އެންމެ ތިރީ ދެ ފްލޯއަށް ވަރަށް ބޮޑެތި ގެއްލުންތައް ވެފައިވާ ކަމަށެވެ. ބާރަތް ވިދާޅުވީ، އެންމެ ބޮޑަށް ގެއްލުންވީ ފަރުނީޗަރުތަކާއި، އޭސީގެ އިތުރުން ކޮމްޕިއުޓަރުތަކަށް ކަމަށެވެ. އޭނާ ވިދާޅުވީ، އާދިއްތަ ދުވަހު ހިދުމަތް ދެވޭތޯ މަސައްކަތްތައް މިހާރު ކުރަމުންދާ ކަމަށެވެ.
