މާލެ ސިޓީގެ މޭޔަރު ޝިފާ މުހައްމަދުގެ އިތުބާރު ނެތްކަމުގެ ވޯޓު ނުނެގޭނެ ކަމަށް ކައުންސިލްގެ ބެލެނިވެރި ފަރާތް ކަމަށްވާ ލޯކަލް ގަވަރމެންޓް އޮތޯރިޓީ (އެލްޖީއޭ) ބުނެފައިވާތީ، ވިލިމާލެ ދާއިރާގެ މެމްބަރު އަހުމަދު އުޝާމް ފާޑު ވިދާޅުވެއްޖެއެވެ.
މޭޔަރު ޝިފާގެ އިތުބާރު ނެތް ކަމުގެ މައްސަލަ ކުރިޔަށް ނުގެންދެވޭނެ ކަމަށް އެލްޖީއޭގެ ސީއީއޯ އަފްޝަން ލަތީފް ސޮއިކުރައްވާ ފޮނުއްވެވި ސިޓީގައި ވިދާޅުވީ، އެ އޮތޯރިޓީން އެ މައްސަލައިގެ އިންކުއަރީ އެއް ކުރިޔަށް ގެންދާ ދަނޑިވަޅުގައި ޝިފާގެ އިތުބާރު ނެތްކަމުގެ ވޯޓު ނެގެން ނެތް ކަމަށެވެ.
އެ މައްސަލައާއި ގުޅިގެން މެމްބަރު އުޝާމް ކުރެއްވި ޓްވީޓެއްގައި ވިދާޅުވީ، ސިޓީ ކައުންސިލަށް މިނިވަންކަމާއެކު ވޯޓެއް ނެގުމުގެ ފުރުސަތު ވެސް މިއަދު ނެތް ކަމަށެވެ. އަދި ކުރީ ސަރުކާރުގައި ކައުންސިލްތަކުގެ ބާރުތައް ކަނޑުވާލިކަމަށް ބުނެ އެވާހަަކަ ދެއްކި ބޭފުޅުންގެ މަގާމު ގެއްލިދާނެހެން ހީވީމަ، އެލްޖީއޭ އިން ގާނޫނާ ހިލާފަށް މިއަދު ކުރާ ކަންކަންވެސް ރަނގަޅުވެފައި އޮތް ކަމަށެވެ.
މައުލޫމާތު ލިބިފައިވާ ގޮތުން މޭޔަރު ޝިފާ އަދި ޑެޕިއުޓީ މޭޔަރު ޝަމާއު ޝަރީފްގެ އިތުބާރު ނެތް ކަމުގެ މައްސަލަ ހުށައެޅުއްވީ މާފަންނު އުތުރު ދާއިރާގެ ކައުންސިލް މެމްބަރު މުހައްމަދު ފަޒީނެވެ. އެމްޑީޕީގެ މެޖޯރިޓީ އޮންނަ މާލެ ސިޓީ ކައުންސިލް އަށް ޝިފާއާ ދެކޮޅަށް 39 މައްސަލަ އެއް ހުށައެޅިއެވެ. ޝިފާގެ އިތުބާރު ނެތް ކަމުގެ މައްސަލާގައި ސިޓީ ކައުންސިލްގެ މެމްބަރުން އެމްޑީޕީން ވަކިކުރާނެ ކަމުގެ އިންޒާރުދީފައިވާ ކަމަށް އެ ޕާޓީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވި ކަމުގެ އަޑުތަކެއް ވަނީ ފެތުރިފައެވެ. ނަމަވެސް އެކަން ދޮގުކޮށް ސިޓީ ކައުންސިލުން ނެރުނު ބަޔާނެއްގައި ބުނީ، އެއީ އެއްވެސް ހަގީގަތެއް ނެތް ވާހަކަތަކެއް ކަމަށެވެ. އަދި ސިޓީ ކައުންސިލް މެމްބަރުންނާ ނަޝީދު ބައްދަލު ކުރެއްވީ ޕާޓީގެ ރައީސްގެ ހައިސިއްޔަތުން، ޕާޓީގެ ލީޑާޝިޕާއި ގުޅިގެން ކުރެވެން ހުރި މަސައްކަތްތަކާއި ގުޅޭ ގޮތުން މަޝްވަރާ ކުރެއްވުމަށް ކަމަށެވެ.
