ފަހުގެ ތާރީހެއްގައި މާލެސިޓީގައި ހިނގި އެންމެ ބޮޑު އަލިފާނުގެ ހާދިސާއާ ގުޅިގެން ސަރުކާރުގެ ވަގުތީ ބޯހިޔާވަހިކަމުގައި ތިބި މީހުންނަށް އިތުރު ތިން މަސް ދުވަސް ދިނުމަށް ސަރުކާރުން ނިންމައިފިއެވެ.

ނެޝަނަލް ޑިޒާސްޓަރ މެނޭޖްމަންޓް އޮތޯރިޓީން ބުނީ ހ. ތިލަފުށިގޭގައި ހިނގި އަލިފާނުގެ ހާދިސާ އާއި ގުޅިގެން އެއޮތޯރިޓީއިން ވަގުތީ ހިޔާ ފޯރުކޮށް ދެމުން ގެންދާ އާއިލާތަކަށް ދީފައިވާ މުއްދަތު މި މަހުގެ ނިޔަލަށް ހަމަވާނެ ކަމަށެވެ. ނަމަވެސް މިހާރުގެ ހާލަތަށް ބަލައި އެ މުއްދަތު ސަރުކާރުން އިތުރު ތިން މަސްދުވަހަށް އިތުރުކޮށްފައިވާ ކަމަށް ޑިޒާސްޓަރ މެނޭޖްމެންޓުން ބުނެއެވެ.

ޑިޒާސްޓަރ މެނޭޖްމެންޓުން މީގެ ކުރިން ބުނެފައިވަނީ މި ހާދިސާއާ ގުޅިގެން ވަގުތީ ބޯހިޔާވަހިކަމުގެ ދަށުގައި 29 މީހަކު ތިބި ކަމަށެވެ. އޭގެތެރެއިން ހަ ގޭބިސީއެއްގެ މީހުން ދިރިއުޅެމުން ދަނީ ގާކޮށި ފުލެޓުގައި ކަމަށާއި އަދި އަދި ވޭސްޓްސައިޑްގައި ވެސް ބައެއް އާއިލާތައް ދިރިއުޅެމުންދާ ކަމަށް އެ އޮތޯރިޓީން ބުނެއެވެ.

އަލިފާނުގެ އެ ހާދިސާ ހިނގާފައިވަނީ މިދިޔަ 2019 ވަނަ އަހަރުގެ ސެޕްޓެމްބަރު މަހުގެ 20 ވަނަ ދުވަހުގެ 19:21 ހާއިރުއެވެ. ހެންވޭރު އަބަދަށްފެހި މަގުގައި ހުރި ގެތަކުގައި ރޯވި އަލިފާންގަނޑުގެ ހާދިސާގައި ދުމުގެ އަސަރުކޮށްގެން 50ށް ވުރެ ގިނަ މީހުންނަށް ހޮސްޕިޓަލުން ފަރުވާ ދީފައިވާއިރު، އެކަކު ނިޔާވެފައިވެއެވެ. އަދި 400ށްވުރެ ގިނަ މީހުން ގެދޮރު ގެއްލިފައިވެއެވެ.