އެމްއެމްޕީއާރުސީގެ ހިޔާނާތާއި ގުޅިގެން ކުރީގެ ނައިބު ރައީސް އަހުމަދު އަދީބުގެ މައްޗަށް ދައުލަތުން އުފުލި ދައުވާތައް ކްރިމިނަލް ކޯޓުން ބޭރުކޮށްލި މައްސަލާގައި ގާނޫނީ ވަކީލެއް ހަމަޖެއްސުމަށް އަދީބު އަށް 10 ދުވަހުގެ ފުރުސަތެއް ހައިކޯޓުން ދެއްވައިފިއެވެ.

އެމްއެމްޕީއާރުސީގެ ހިޔާނާތާއި ގުޅިގެން އަދީބުގެ މައްޗަށް ދައުލަތުން އުފުލި 7 ދައުވާ ކްރިމިނަލް ކޯޓުން އެ މައްސަލަ ބެއްލެވި ގާޒީ އިސްމާއީލް ރަޝީދު ވަނީ އެމައްސަލަތައް ބާޠިލްކޮށް، ކޯޓުން ބޭރުކޮށްލާފައެވެ. އެހެންކަމުން ޕްރޮސެކިއުޓަރ ޖެނެރަލް (ޕީޖީ)ގެ އޮފީހުން ވަނީ އަދީބުގެ ދައުވާތައް ކްރިމިނަލް ކޯޓުން ބޭރުކޮށްލި މައްސަލަ ހައިކޯޓުގައި އިސްތިއުނާފު ކޮށްފައެވެ.

ހައިކޯޓުގައި ބުރާސްފަތި ދުވަހު ބޭއްވި އިސްތިއުނާފްގެ މި މައްސަލާގައި އަދީބު ވިދާޅުވީ، ބަންދާމެދު ގޮތެއް ނިންމުމަށް މަޖިލީހަށް އަދީބާއެކު ހައިކޯޓަށް ވަޑައިގެންނެވި ގާނޫނީ ވަކީލު މަހުފޫޒު ސައީދު ވަޑައިގެންނެވީ ހަމައެކަނި އެ އަޑުއެހުމަށް ކަމަށެވެ. އެހެންކަމުން، މައުލޫއީ ގޮތުން މި މައްސަލަ ކުރިއަށްދާއިރު ވެސް ގާނޫނީ ވަކީލެއްގެ އެހީތެރިކަން ބޭނުންވާ ކަމަށާއި ޖަލުގައި ހުންނަވައިގެން، ގާނޫނީ ވަކީލަކާއެކު މަޝްވަރާ ކޮށްލަން ފުރުސަތު ދެއްވުން އެދޭ ކަމަށެވެ.

އަދީބު ހުންނެވީ، ހައިކޯޓުން މި މައްސަލާގައި ވަކިގޮތެއް ނިމެންދެން ޖަލުގައި ބަންދުކޮށްފައެވެ. ހައިކޯޓުން އޭނާ ޖަލުގައި ބަންދު ކުރަން ނިންމި މައިގަނޑު ސަބަބަކީ، ކުރިން ވެސް ފިއްލަވާފައިވާ ބޭފުޅަކަށްވާތީއެވެ.

އަދީބުގެ މި މައްސަލަ ބައްލަވާ ފަނޑިޔާރުންގެ ބެންޗުގެ ރިޔާސަތު ބުރާސްފަތި ދުވަހުގެ އަޑުއެހުމުގައި ބެލެހެއްޓެވި ފަނޑިޔާރު މުހައްމަދު ނިޔާޒް ވިދާޅުވީ ސޯޝަލް ޑިސްޓެންސިންގެ މިންގަނޑު ހިފެހެއްޓޭނެ ގޮތަށް ޖަލުގައި ވަކީލުންނާ ސީދާ ބައްދަލު ކުރެވޭނެ އިންތިޒާމެއް ހަމަޖެއްސިދާނެ ކަމަށް ގަބޫލު ކުރައްވާ ކަމަށެވެ. އަދި ޕްރޮސެކިއުޓަރ ޖެނެރަލްގެ އޮފީހު ންވެސް އެކަމަށް ބާރު އަޅައިދެއްވުމަށް ފަނޑިޔާރު އިލްތިމާސް ކުރެއްވިއެވެ.

ފަނޑިޔާރު ނިިޔާޒްގެ އިތުރުން އެ މައްސަލަ ބައްލަވާ ބެންޗުގައި ދެން ތިއްބަވަނީ ފަނޑިޔާރު ޝުއައިބު ހުސައިން ޒަކަރިއްޔާ އަދި ފަނޑިޔާރު ހުސައިން މަޒީދެވެ.

އަދީބުގެ މައްޗަށް މީގެ ކުރިން ތިން ހުކުމެއްވެސް ކްރިމިނަލް ކޯޓުން އިއްވާފައިވެއެވެ. އެއީ ފިސްތޯލައެއް ގެންގުޅުނު މައްސަލައިގައި އިއްވި 10 އަހަރުގެ ހުކުމަކާއި، ކުރީގެ ރައީސް އަބްދުﷲ ޔާމީން ދަތުރުކުރެއްވި ރިޔާސީ ލޯންޗުކޮޅު "ފިނިފެންމާ" ގައި އެއްޗެއް ގޮއްވާލި މައްސަލައިގައި ޓެރެރިޒަމް ދައުވާކޮށް، އިއްވި 15 އަހަރުގެ ޖަލު ހުކުމާއި ފަޅުރަށެއް ކަމަށްވާ މާބިންހުރާގެ ޚިޔާނާތުގެ ފައިސާގެ ދައުވާއާ ގުޅިގެން އިއްވި 8 އަހަރުގެ ޖަލު ހުކުމާއެކު، ޖުމްލަ 33 އަހަރުގެ ޖަލު ހުކުމެއް އަދީބުގެ މައްޗަށް ވަނީ އިއްވާފައެވެ. ނަމަވެސް އެ މައްސަަލަތައް މަތީ މަރުހަލާގެ ކޯޓުތަކުން ވަނީ ބާތިލު ކޮށްފައެވެ.