ރާއްޖޭގެ ރިސޯޓްތަކުން 26 މީހަކު ކޮވިޑް-19 އަށް ޕޮޒިޓިވްވެފައިވާ ކަމަށް ހެލްތު ޕްރޮޓެކްޝަން އެޖެންސީ އިން ބުނެފިއެވެ.

އެޗްޕީއޭ އިން ބުނީ 15 ރިސޯޓަކުން މިހާރު ކޮވިޑް-19 ގެ ކޭސްތައް ފެނިފައިވާކަމަށެވެ. އެގޮތުން 11 ފަތުރުވެރިންނާއި 15 ސްޓާފުން މިވަގުތު ބައްޔަށް ފަރުވާ ހޯދަމުންދާ ކަމަށް އެޗްޕީއޭއިން ބުނެއެވެ.

ރާއްޖޭގެ ރިސޯޓްތަކުން ކޮވިޑްގެ ކޭސްތައް ފެންނަން ފަށާފައިވާ އިރު، މިހާރު 64 ރިސޯޓަކުން ދަނީ ފަތުރުވެރިންނަށް ހިދުމަތްދެމުންނެވެ. ބައެއް ރިސޯޓްތަކުން ފަތުރުވެރިންނަށް ޕީސީއާރު ޓެސްޓު ހެދުމުގެ ހިދުމަތް ފޯރުކޮށްދޭ އިރު، މި ހިދުމަތް ބައެއް އެއާޕޯޓްތަކުންވެސް ފޯރުކޮށްދެއެވެ.

ފަތުރުވެރިންގެ ޕީސީއާރު ޓެސްޓު ފަސޭހައިން ހެދޭނެ ގޮތްތައް މަގުފަހި ކޮށްދިނުމުގެ ގޮތުން އެޗްޕީއޭ އިން ވަނީ ފަސް ތަނަކުން ފަތުރުވެރިންނަށް ޕީސީއާރު ޓެސްޓު ހެދޭނެ ކަމަށް ބުނެފައެވެ. އެއީ، އޭޑީކޭ ހޮސްޕިޓަލް، އައިޖީއެމް ހޮސްޕިޓަލް، އައްޑޫ އިކުއިޓޯރިއަލް ހޮސްޕިޓަލް، ކުޅުދުއްފުށީ ރީޖަނަލް ހޮސްޕިޓަލް އަދި ފުލުހުންގެ ލެބްއެވެ.

އޭގެ އިތުރުން ސަފާރީތަކުގައި ޗުއްޓީހޭދަކުރަން އަންނަ ފަތުރުވެރިންނަށް ހާއްސަ ކޮށްގެން ހުޅުމާލޭގައި ޕީސީއާރު ޓެސްޓު ހެދޭނެ އިންތިޒާމުތައްވެސް ވަނީ ހަމަޖައްސާފައެވެ.