ކޮވިޑް-19 އަށް ޕޮޒިޓިވްވެ ކުރީގެ ރައީސް މައުމޫން އަބްދުލްގައްޔޫމް ދަރުމަވަންތަ ހޮސްޕިޓަލުގައި އެޑްމިޓްކޮށް ފަރުވާ ދޭން ފަށައިފިއެވެ.
ރައީސް މައުމޫނުގެ އާއިލާގެ ބޭފުޅަކު ވަނީ މިކަން "ރާއްޖެ އެމްވީ" އަށް ކަށަވަރުކޮށްދެއްވާފަ އެވެ.
ރައީސް މައުމޫނު އެޑްމިޓް ކޮށްފައި މިވަނީ އެމަނިކުފާނު ބައްޔަށް ޕޮޒިޓިވްވިކަން ހާމަކުރެއްވިތާ މާގިނައިރުތަކެއް ނުވަނީސްއެވެ. "ރާއްޖެ އެމްވީ" އަށް މައުލޫމާތު ލިބުނު ގޮތުގައި ރައީސް މައުމޫނު އެޑްމިޓް ކުރެއްވީ ހައި ރިސްކް ކެޓަގަރީގައި ހިމެނިވަޑައިގަންނަވާތީ އެވެ.
ރައީސް މައުމޫންގެ އުމުރުފުޅަކީ 83 އަހަރު އެވެ. އެ އުމުރު ފުރާއަކީ ކޮވިޑް-19ގެ ހައި ރިސްކް ކެޓަގަރީ އެވެ.
ރައީސް މައުމޫން ކޮވިޑަށް ޕޮޒިޓިވްވި ހަބަރާއި އެކު ގިނަ ބަޔަކު ދަނީ އެމަނިކުފާނަށް އަވަސް ޝިފާއަށް އެދެމުންނެވެ. މީގެ ތެރޭގައި ނައިބު ރައީސް ފައިސަލް ނަސީމާއި، ސިޔާސީ އިސްފަރާތްތަކުން ވެސް އަންނަނީ އެމަނިކުފާނަށް އަވަސް ޝިފާއަށް އެދެމުންނެވެ.
ރައީސް މައުމޫން ކޮވިޑަށް ޕޮޒިޓިވްވެފައިވާއިރު އެމަނިކުފާނު އަނބިކަނބަލުން ނަސްރީނާ އިބްރާހިމް ވަނީ މީގެ ކުރިން ކޮވިޑަށް ޓެސްޓު ކުރައްވާފައެވެ. އެކަމަނާ ވަނީ ކޮވިޑަށް ނެގެޓިވްވެފައެވެ.
