އައްޑޫ ސިޓީއަށް އަސްތަކެއް ގެނެސް، އަސް ދުއްވުމުގެ ވިޔަފާރިއެއް ފަށަން އުޅޭ ކަމުގެ މައުލޫމާތު ލިބިފައިވާ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިކަމާއި ގުޅޭގޮތުން ހޯމަ ދުވަހުގެ ޖަލްސާގައި ވާހަކަ ދައްކަވަމުން ނަޝީދު ވިދާޅުވީ އައްޑޫ އަތޮޅަށް ފަސް އަސް ގެނެސްގެން، އަސް ދުއްވުމުގެ ވިޔަފާރިއެއް ފެށުމަށް ޒުވާނަކު މަސައްކަތް ކުރަމުންދާ ކަމަށެވެ. އެގޮތުން، މި އަސްތަކާއި ގުޅޭ ސެޓްފިކެޓްތައް މިނިސްޓްރީ އޮފް ފިޝަރީޒް އެންޑް އެގްރިކަލްޗަރ އިން ހަދާ ނިންމާލާފައިވާ ކަމަށް ވެސް ވިދާޅުވިއެވެ.
އެމަނިކުފާނު އިތުރަށް ވިދާޅުވީ މި އަސްތައް ބޭނުން ކުރެވޭނީ 'ރެކްރިއޭޝަނަލް' ބޭނުންތަކަށް ކަމަށެވެ.
އައްޑު އަތޮޅަށް ޒުވާނަކު ގެނެވުމަށް މަސައްކަތްކުރާ ފަސް އަސް، .. މިއަހާއި ގުޅޭ ހުރިހާ ސެޓްފިކެޓެއް މިހާރު ވަނީ އެގްރިކަލްޗަރ މިނިސްޓްރީން ހައްދަވާ ނިންމަވާފަ. އަދި އިރާދަކުރެއްވިއްޔާ މި އަހުގެ ހިދުމަތް އައްޑުއިން ހުރިހާ ރައްޔިތުންނަށް ވެސް އަދި ފަތުރުވެރިންނަށްވެސް ލިބިގެންދާނެ ކަމަށް އަޅުގަނޑު ދެކެން. ޚިދުމަތޭ އަޅުގަނޑު މި ދެންނެވީ 'ރެކްރިއޭޝަން' އަށް ދުއްވޭނެ. ކުޅިވަރަށް ދުއްވޭނެ. އަދި މި މަސައްކަތުގައި އުޅުއްވާ އައްޑޫ ސިޓީގެ ދެތިން ކުދިން އަޅުގަނޑަށް ވަރަށް ތަފްސީލުކޮށް މުޅި ޕްރޮޖެކްޓް އޮތް ކިޔާދިން.ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ނަޝީދު ވިދާޅުވީ މިއީ ވަރަށް ޝައުގުވެރި ޕްރޮޖެކްޓަކަށް ވާނެ ކަމަށާއި މިއީ އަޖުމަ ބަލާލަން ރަނގަޅު ޚިދުމަތެއް ކަމަށެވެ.
