ޔޫތް އެންޑް ސްޕޯޓްސް މިނިސްޓަރު އަހުމަދު މަހްލޫފް އާ ސުވާލު ކުރެއްވުމަށް ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާއަށް އެޖެންޑާކޮށްފި އެވެ.

ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގެ އެޖެންޑާގައި މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް، އަޙްމަދު މަޚްލޫފް އާ ސުވާލު ކުރައްވަން ހުށަހަޅުއްވާފައި ވަނީ، ހެންވޭރު ދެކުނު ދާއިރާގެ މެމްބަރު ހުސައިން ޝަހީމް (އަނދުން ހުސައިން) އެވެ.

ހުސައިން ޝަހީމް ވަނީ، މަހްލޫފްއާ ދެ ސުވާލެއް ކުރެއްވުމަށް ހުށަހަޅުއްވާފަ އެވެ. ފުރަތަމަ ސުވާލެއްގެ ގޮތުގައި ވަނީ، ކުޅިވަރު ޤާނޫނާއި އަދި ޤާނޫނުގެ ދަށުން ހެދިފައިވާ ގަވާއިދުތަކާ ޚިލާފަށް ޢަމަލުކުރަމުންދާ ކުޅިވަރު ޤައުމީ ޖަމްޢިއްޔާތަކާ އެއްވެސް ހައިސިއްޔަތަކުން ގުޅުންބަދަހިކޮށް އެހީތެރިކަން ފޯރުކޮށްދެވިފައިވާނެތޯ؟ އެވެ. އަދި ޤާނޫނާ ޚިލާފަށް އޮޕަރޭޓުކުރާ އެއްވެސް ކުޅިވަރު ޤައުމީ ޖަމްޢިއްޔާއަކަށް ދައުލަތުގެ ކުޅިވަރު ބިންތަކާއި އަދި އެހެނިހެން ވަސީލަތްތައް ފޯރުކޮށްދީ، ދައުލަތުގެ ބަޖެޓުން އެއްވެސް ޚަރަދެއް ކުރެވިފައިވާނެތޯ؟ އެވެ.

ހުސައިން ޝަހީމް ކުރައްވާ ދެވަނަ ދުވާލުގައި ވަނީ، 2 ޖުލައި 2020 ގައި ތާވަލްކޮށް ކުރިއަށްގެންދިއުމަށް ނިންމާފައިވާ އެފްއޭއެމްގެ އިންތިޚާބު ފަސްކުރުމަށް އެފްއޭއެމްއިން އެންގިކަމަށް މިނިސްޓަރު ވަނީ ވިދާޅުވެފައެވެ. އެހެންކަމަށްވާނަމަ އެފްއޭއެމް އިން އެ އިންތިޚާބު އެ ބޭއްވީ ވަޒީރުންގެ އެންގުމާ ޚިލާފަށްކަމަށް ޤަބޫލުކުރަންތޯ؟ އެންގުމާ ޚިލާފަށްކަމަށް ނޫންނަމަ އެއީ ކީއްވެތޯ؟ އެންގުމާ ޚިލާފަށްނަމަ އެ އިންތިޚާބު ޤަބޫލުކުރަންތޯ؟ އެވެ.

އޭގެއިތުރުން ފިނޭންސް މިނިސްޓަރު އަމީރުއާ ލިޔުން ޖަވާބު ހޯދުމަށް ސުވާލުކުރައްވާފައިވަނީ، ގަލޮޅު ދެކުނު ދާއިރާގެ މެންބަރު މީކާއީލު އަޙްމަދު ނަސީމް އެވެ. އަމީރު އާ މީކާއީލް ކުރައްވާ ސުވާލުގައި ވަނީ، 2017 ވަނަ އަހަރު ދައުލަތުން ސޮވެރިންގ ގެރެންޓީ ދީގެން ސަން ސިޔާމް ރިސޯޓްސް ޕްރައިވެޓް ލިމިޓެޑަށް ޗައިނާގެ އެގްޒިމް ބޭންކުން ދޫކޮށްފައިވާ 127 މިލިއަން ޑޮލަރުގެ ލޯނު ޑިފޯލްޓްވެފައިވޭތޯ؟ އިސްވެ ދެންނެވުނު ލޯނު ޑީފޯލްޓްވެފައިވާނަމަ ދައުލަތުން މި ލޯނަށްވާ ފައިސާ ދެއްކުމުގެ އިންތިޒާމު ހަމަޖެހިފައިވޭތޯ އަދި މި އިންތިޒާމު ހަމަޖެހިފައިވާނަމަ ފައިސ ދެއްކުމަށް ހަމަޖެހިފައިވާ މުއްދަތަކީ ކޮބައިތޯ؟ އެވެ.

އޭގެއިތުރުން ދައުލަތުގެ ފަރާތުން 2017 ވަނަ އަހަރު ދައުލަތުން ސޮވެރިންގ ގެރެންޓީ ދީގެން ސަން ސިޔާމް ރިސޯޓްސް ޕްރައިވެޓް ލިމިޓެޑަށް ޗައިނާގެ އެގްޒިމް ބޭންކުން ދޫކޮށްފައިވާ 127 މިލިއަން ޑޮލަރުގެ ލޯނު ދެއްކުމަށް އެކްސްޓެންޝަނަކަށް އެދިފައި ވާނެތޯ؟ އާއި، އެދިފައިވާނަމަ މި އެކްސްޓެންޝަން ހަމަޖައްސަނީ ޖީ-20 ޑެޓް މޮރެޓޯރިއަމްގެ ދަށުންތޯ؟ އަދި، މި ލޯނު ދެއްކުމަށް އެކްސްޓެންޝަނެއް ދޭނަމަ މި ކަމުގެ ސަބަބުން ދައުލަތުގެ މާލީ އިންތިޒާމަށް ކުރާނެ އަސަރުތަކަކީ ކޮބައިތޯ؟ އެވެ.

މީކާއީލްގެ މި ސުވާލަށް ފިނޭންސް މިނިސްޓަރު ލިޔުމުން ދެއްވާ ޖަވާބު މާދަމާގެ ޖަލްސާއަށް އެޖެންޑާކޮށްފައިވާއިރު ފިނޭންސް މިނިސްޓްރީ މިމަހުގެ 6 ވަނަ ދުވަހު ވަނީ ސޮވެރިންގ ގްރެންޓީއާ ގުޅޭ ނޫސްބަޔާނެއް ނެރުއްވާފަ އެވެ. އެ ނޫސްބަޔާނުގައި ބުނެފައިވާ ގޮތުގައި ސަން ސިޔާމުގެ ކުންފުނިން މިހާރު ވަނީ އެފައިސާ ޗައިނާގެ އެގްޒިމް ބޭންކަށް ދައްކާފަ އެވެ.

ރައީސް ޔާމީންގެ ވެރިކަމުގައި ސަން ސިޔާމްގެ، އޭއެސްއެޗް ކުންފުންޏަށް ޗައިނާގެ އެގްޒިމް ބޭންކުން ދޫކޮށްފައިވާ 127 މިލިއަން ޑޮލަރުގެ (ދެ ބިލިއަން ރުފިޔާ) ލޯނަކަށް ދައުލަތުން، ސޮވެރިން ގެރެންޓީ ދީފައިވާއިރު، މި ލޯނުގެ ތެރެއިން 10 މިލިއަން ޑޮލަރު ޑިފޯލްޓްވުމުން އެ ފައިސާ މި އޮގަސްޓް މަހުގެ ތެރޭގައި ދެއްކުމަށް ދިވެހި ސަރުކާރަށް ޗައިނާގެ އެގްޒިމް ބޭންކުން އަންގާފައިވެއެވެ.