ކ. އަތޮޅުން ފެށިގެން އައްޑޫ ސިޓީއަށް އުދަ އަރާނެކަމަށް ލަފާކޮށް އެ ސަރަހައްދަށް ވައިޓް އެލަރޓް ނެރެފިއެވެ.

މޫސުމާއި ބެހޭ ގައުމީ އިދާރާ އިން ވައިޓް އެލަރޓް ނެރެފައިވަނީ ހުކުރު ދުވަހުގެ މެންދުރު 14:45ން ފެށިގެން 18:00 އާ ހަމައަށެވެ.

މެޓް އޮފީހުން ބުނީ ކުރިޔަށް އޮތް 24 ގަޑިއިރުގެ ތެރޭގައި ރާއްޖޭގެ މޫސުން އާންމު ގޮތެއްގައި ރަނގަޅުވާނެ ކަމަށާއި، އެކަމަކު ރާއްޖޭގެ ބައެއް ސަރަހައްދުތަކަށް އުދަ އެރުން އެކަށީގެންވާ ކަމަށެވެ.

ރާއްޖޭގެ ކަނޑުތައް އާންމު ގޮތެއްގައި ރަނގަޅުވާނެ ކަމަށާއި، އެކަމަކު ކުރިޔަށް އޮތް 24 ގަޑިއިރު ދިޔަވަރު ބޮޑުވާ ގަޑީގައި އުދަ އަރާނެ ކަމަށް ލަފާކުރެވޭ ކަމަށެވެ. މެދު ރާއްޖޭގެ އަތޮޅުތަކަށް ދިޔަވަރު ބޮޑު ވާނީ 14:40 ހާއިރުއެވެ. އަދި ދެކުނުގެ އަތޮޅުތަކަށް ދިޔަވަރު ބޮޑުވާނެ ކަމަށް ލަފާކޮށްފައިވަނީ މެންދުރު 15:22 ހާއިރުއެވެ.

ވައި ޖެހޭނީ އާއްމު ގޮތެއްގައި މަޑުން، އުތުރުގެ އަތޮޅުތަކުގައި ހުޅަނގު އުތުރާއި އުތުރުން އަދި އެހެން ހިސާބުތަކަށް އިރުއުތުރާއި އިރުން ގަޑިއަކު 3 މޭލާއި 10 މޭލާ ދެމެދުގެ ބާރު މިނެއްގައި ކަމަށް ވެސް އެ އިދާރާއިން ވަނީ ބުނެފައެވެ.