މަޖިލީހަށް ދާނީ ވަގުން ހިފަން ކަމަށް ވިދާޅުވެ މަޖިލިސް އިންތިހާބުގައި ކުރެއްވި ވައުދު ފުއްދޭތީ އުފާކުރައްވާ ކަމަށް ދާންދޫ ދާއިރާގެ މެމްބަރު ޔައުގޫބް އަބްދުﷲ ވިދާޅުވެއްޖެއެވެ.

ހެލްތު މިނިސްޓްރީގެ ކޮރޕްޝަންގެ ބޮޑެތި މައްސަލަތަކެއް އޮޑިޓު ރިޕޯޓަކުން ފެންމަތިވުމާއި ގުޅިގެން މަޖިލިސް އިންތިހާބުގައި ޔައުގޫބް ކުރެއްވި ވައުދަށް ގިނަ ބަޔަކު ފާޑުކިޔަމުން އަންނަ ދަނޑިވަޅެއްގައި، އޭނާ ވިދާޅުވީ އޭނާ ތައުލީމް ހާސިލު ކުރެއްވީ އޮޑިޓިންގެ ދާއިރާ އިން ކަމަށެވެ. އަދި ކިޔެވީ ވަގުހިފަން ކަމަށް ވިދާޅުވެ، އޭނާ ވަނީ އަބަދުވެސް ކުރަމުން އައީ އެ މަސައްކަތް ކަމަށް ވިދާޅުވެފައެވެ.

ޔައުގޫބް ވިދާޅުވީ ކުރީ ސަރުކާރެއް ވިޔަސް، މި ސަރުކާރު ވިޔަސް، އަދި އާއިލާގެ މީހެއްގެ ފަރާތުން އެފަދަ މައްސަލައެއް ފާހަގަކުރެވިއްޖެ ނަމަ އެއްވެސް ތަފާތު ކުރުމެއް ނެތި އެފަދަ މައްސަލަތައް ބައްލަވާނެ ކަމަށެވެ. އަދި އެއްވެސް ބިރަކަށް، ފަހަތަށް ނުޖެހޭނެ ކަމަށް އޭނާ ވިދާޅުވިއެވެ.

ޔައުގޫބް ވިދާޅުވީ ހެލްތު މިނިސްޓްރީއާއި ޓުއަރިޒަމް މިނިސްޓްރީގެ ކޮރަޕްޝަންގެ މައްސަލަތައް ފެންމަތިވިއިރު މަޑުމަޑުން ތިބީ ކީއްވެގެންތޯ ގިނަ ބަޔަކު ސުވާލު ކުރަމުންދާ ކަމަށެވެ. ޔައުގޫބް ވިދާޅުވީ މިފަހަރު މަޑުން ހުންނެވީ އެންޓި ކޮރަޕްޝަން ކޮމިޝަން (އޭސީސީ)ން ނެރުނު ރިޕޯޓާއި ގުޅިގެން ކަމަށެވެ. އަދި ހެލްތު މިނިސްޓަރ އަބްދުﷲ އަމީން މަޖިލީހުގައި ވެސް، އަދި އެހެނިހެން ފޯރަމްތަކުގައި މިއީ ދުނިޔޭގެ ސިއްހަތު ޖަމިއްޔާއާއި ގުޅިގެން ކުރި މަސައްކަތެއް ކަމަށް ވިދާޅުވަމުން ގެންދެވިއިރު އެފަދަ ބޮޑު ވައްކަމަކަށް މަގުފަހިވެދާނެ ކަމެއް ކުރައްވާނެ ކަމަށް ގަބޫލު ނުކުރައްވާ ކަމަށް ޔައުގޫބް ވިދާޅުވިއެވެ.

އެހެންނަމަވެސް، މި ފަދަ މައްސައެއް އުޅެދާނެ ކަމުގެ ޝައްކު އޮތުމުން އެމްޑީޕީގެ މެމްބަރުން އަމިއްލަ އަށް ހުށައަޅުއްވައިގެން، ހެދި އޮޑިޓުން އެކަން ސާބިތު ވުމަކީ 'ވަގު ހިފުން' ކަމަށް އޭނާ ވިދާޅުވިއެވެ. އަދި ރައްޔިތުންގެ މަޖިލީހަށް ކުރިމަތި ލެއްވިއިރު، 'ވަގު ހިފަން' ކުރެއްވި ވައުދު ފުއްދޭތީ ވަރަށް ބޮޑަށް އުފާކުރައްވާ ކަމަށް އޭނާ ވިދާޅުވިއެވެ. އަދި މިގޮތުގައި ކުރިއަށް ގެންދަވާނެ ކަމަށް އޭނާ ވިދާޅުވިއެވެ.