ވެންޓިލޭޓަރުތަކުގެ މައްސަލާގައި ބޮޑެތި އޮޅުވާލުންތަކާއި، ރައްޔިތުންގެ މަޖިލީހުގައި އިތުރުފުޅު ހައްދަވާ ވާހަކަ ދައްކަވާފައިވާތީ، ހެލްތް މިނިސްޓަރ އަބްދުﷲ އަމީންގެ މައްސަލަ ބެލުމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު މަޖިލީހުގެ އިމްތިޔާޒު ކޮމެޓީގައި އެދިވަޑައިގަންނަވައިފި އެވެ.

ބުދަ ދުވަހުގެ ޖަލްސާގައި، މަޖިލީހުގެ ރައީސް، ރައީސް ނަޝީދު ވިދާޅުވީ، ވެންޓިލޭޓަރު ގަންނަން ދުބާއީގެ އެގްޒެކިއުޓާރސް ޖެނެރަލް ޓްރޭޑިން ކުންފުންޏާ ހަވާލުކުރި މައްސަލައިގައި ހެލްތު މިނިސްޓަރު އަބްދުﷲ އަމީން ރައްޔިތުންގެ މަޖިލީހުގައި ދެއްކެވި ވާހަކަ އާއި އޮޑިޓާ ޖެނެރަލްގެ ރިޕޯޓްގައިވާ މައުލޫމާތު ދިމާނުވާ ކަމަށެވެ. އެހެންކަމުން އަމީން އިތުރުފުޅު ހައްދަވާފައިވާކަން ބެލެވޭތީ އެ މައްސަލަ މަޖިޖިލީހުގެ އިމްތިޔާޒު ކޮމިޓީން ބެލުމަށް މަޖިލީހުގެ ރައީސް ވަނީ އެދިވަޑައިގެންނެވި އެވެ.

ހެލްތް މިނިސްޓަރު އަމީން ވަނީ، 75 ވެންޓިލޭޓަރު ގެންނަން ދުބާއީގެ އެގްޒެކިއުޓާރސް ޖެނަރެލް ޓްރޭޑިންއާ ހަވާލުކުރީ، ޑަބްލިޔުއެޗްއޯގެ ރާއްޖޭގެ ކަންޓްރީ ރެޕްރެޒެންޓިވް އާއި ދުބާއީގެ ކަންޓްރީ ރެޕްރެޒެންޓެޓެވިވްއާ ވާހަކަ ދައްކައިގެން، އަގު ބައްލަވާފައިވާ ކަމަށް ވިދާޅުވެ ރައްޔިތުންގެ މަޖިލީހަށް ދޮގު މައުލޫމާތި ދެއްވާފަ އެވެ. ނަމަވެސް ހެލްތް މިނިސްޓްރީގެ، ކޮވިޑް-19 އާ ގުޅޭ ޚަރަދުތަކުގެ ކޮމްޕްލަޔަންސް އޮޑިޓް ރިޕޯޓުގައި ވަރަށް ސާފުކޮށް، އެގްޒެކިއުޓާރސް ޖެނެރަލް ޓްރޭޑިން އަކީ ވެންޓިލޭޓަރު ގެންނަ ކުންފުންޏެއްގެ ގޮތުގައި ޑަބްލިއުއެޗްއޯ އިން ހެލްތު މިިނިސްޓްރީ އަށް މައުލޫމާތު ދީފައި ނުވާކަން ވަނީ ހާމަވެފައެވެ.

މީގެއިތުރުން އޮޑިޓަރ ޖެނެރަލް ހަސަން ޒިޔަތާއި އެޑިޓް އޮފީހުގެ އިސްވެރިން އަންގާރަ ދުވަހު މަޖިލީހުގެ މާލިއްޔަތު ކޮމެޓީގައި ވަނީ ހެލްތް މިނިސްޓްރީގެ އޮޑިޓް ރިޕޯޓާ ގުޅޭ ވަރަށް ގިނަ ތަފްސީލީ މައުލޫމާތު ހިއްސާ ކޮށްދެއްވާފަ އެވެ. އެގޮތުން، ވެންޓިލޭޓަރުތައް ގަތުމަށް ހެލްތް މިނިސްޓްރީގެ ބިޑް ކޮމެޓީގެ ބައްދަލުވުމަށް އައިއިރު ވެސް އޮތީ، ވެންޓިލޭޓަރުތައް ގެނައުމަށް ދުބާއީގެ އެގްޒެކިއުޓާރސް ޖެނެރަލް ޓްރޭޑިންއަށް ހަވާލުކުރުމަށް ނިންމާފައިކަން އެނގެންކަމަށް އޮޑިޓަރ ޖެނެރަލް ވިދާޅުވި އެވެ. އަދި ފިނޭންސް މިނިސްޓްރީއަށް "ސިންގަލް ސޯސް" ހުއްދައަށް އެދި، ހުށަހެޅިއިރުވެސް، އެގްޒެކިއުޓާރސް ޖެނެރަލް ޓްރޭޑިންގ ކުންފުންޏާ ހަވާލުކުރަން ނިންމާފައިވާކަން، އޮޑިޓް ރިޕޯޓުން އެނގެއެވެ.

އޮޑިޓް އޮފީހުން ބުނެފައިވަނީ، ވެންޓިލޭޓަރު ގެންނަން ދުބާއީގެ އެގްޒެކިއުޓާރސް ޖެނެރަލް ޓްރޭޑިންގ ހޮވީ ހެލްތް މިނިސްޓަރު އަމީނާއި ރާއްޖޭގައި ހުންނަވާ ޑަބްލިއުއެޗްއޯގެ މަންދޫބު ޑރ. އަރްވިންދު މާތުރު މަޝްވަރާ ކުރައްވައިގެން ކަމަށް އެނގިފައިވާ ކަމަށެވެ. ނަމަވެސް މިކަމުގައި ޑަބްލިއުއެޗްއޯއާ އެކު ރަސްމީ އެއްވެސް މުއާމަލާތެއް ނުހިނގާ ކަމަށް އޮޑިޓް އޮފީހުން ބުނެއެވެ.

އެގްޒެކިއުޓާރސް ޖެނެރަލް ޓްރޭޑިންއަކީ، ވެންޓިލޭޓަރު ގެންނަން ހަވާލުކުރި ތިން ކުންފުނީގެ ތެރެއިން ސަރުކާރުން އެޑްވާންސްކޮށް ފައިސާ ދޫކުރި ހަމައެކަނި ކުންފުންޏެވެ. އެމީހުން ރާއްޖެއަށް ވެންޓިލޭޓަރެއް ފޯރުކޮށްދޭނެ އަގެއް ކަމަށް ބުނެފައިވަނީ، 32،500 ޑޮލަރަށެވެ. އެ ކުންފުންޏާ މަސައްކަތް ހަވާލުކުރީ 34 މިލިއަން ރުފިޔާ އަށް ކަމަށްވާއިރު އަގުގެ 90 ޕަސެންޓަށްވާ 30.9 މިލިއަން ރުފިޔާ ސަރުކާރުން ވަނީ ދައްކައިފައެވެ.

މިދިޔަ އޭޕްރީލް މަހުގެ ދެވަނަ ދުވަހު، ވެންޓިލޭޓަރުތައް ގެނައުމުގެ އެގްރީމަންޓްގައި ސޮއިކޮށްފައިވާއިރު، އެޑްވާންސަށް 30.9 މިލިއަން ރުފިޔާވެސް ވަނީ ދައްކާފައެވެ. އެގްރީމަންޓްގައި 14 ދުވަހުގެ ތެރޭގައި ވެންޓިލޭޓަރުތައް ރާއްޖެ ގެނެވޭނެ ކަމަށް ބުނެފައިވާއިރު، މިހާތަނަށް އެ ވެންޓިލޭޓަރުތައް ލިބިފައެއް ނުވެއެވެ.