ކޮވިޑް-19ގެ ބަލިމަޑުކަމާއި ގުޅިގެން އަންހެނުންނާއި ކުޑަކުދިންނަށް ދިމާވާ އިޖްތިމާއީ މައްސަލަތަކަށް މުޖުތަމައު ހޭލުންތެރި ކުރުމަށް ވީޑިއޯ ކްލިޕް ތައްޔާރުކޮށްދޭނެ ފަރާތެއް ހޯދަން މޯލްޑިވްސް ޕޮލިސް ސަރވިސްއިން އިއުލާން ކޮށްފިއެވެ.
ފުލުހުން ބުނީ ކޮވިޑް-19 ގެ ބަލިމަޑުކަމާއި ގުޅިގެން އަންހެނުންނާއި ކުޑަކުދިންނަށް ދިމާވާ އިޖްތިމާއީ މައްސަލަތަކަށް މުޖުތަމައު ހޭލުންތެރި ކުރުމަށް 14 ވީޑިއޯ ކްލިޕް ތައްޔާރުކޮށްދޭނެ ފަރާތެއް ހޯދަން ބޭނުންވާ ކަމަށެވެ. މި މަސައްކަތަށް ބީލަން ހުށަހެޅުމުގެ ފުރުސަތު މިހާރު ވަނީ ހުޅުވާލާފައެވެ.
ފުލުހުން ބުނީ ބީލަމުގައި ބައިވެރިވުމަށް އެދޭ ފަރާތްތަކުން ބިޑް ރެޖިސްޓްރޭޝަން ފޯރމް އީމެއިލް މެދުވެރިކޮށް ފޮނުވުމަށް އެދޭ ކަމަށެވެ.
ފުލުހުން ބުނީ ބީލަމުގައި ރަޖިސްޓްރީ ވެވޭނެ އެންމެ ފަހު ތާރީހަކީ 18 އޮގަސްޓް 2020 ވަނަ ދުވަހުގެ 16:00 ކަމަށާއި، ބީލަމަށް ރަޖިސްޓްރީ ކުރަން ދެވިފައިވާ ގަޑީގެ ފަހުން ލިބޭ އެއްވެސް ފޯރމެއް ބަލައި ނުގަނެވޭނެ ކަމަށެވެ.
މި ޕްރޮޖެކްޓާއި ގުޅިގެން ޕްރީބިޑް ބައްދަލުވުން ނޯންނާނެ ކަމަށް ފުލުހުން ހާމަކޮށްފައިވާއިރު، ބީލަން ހުޅުވުން އޮންނާނީ 2020 އޮގަސްޓް 25 ވަނަ ދުވަހުގެ 11:00 ގައި އިސްކަންދަރު ކޮށި 01 ގައެވެ.
މީގެ އިތުރުން ފުލުހުން ބުނީ ބިޑް ހުޅުވުން އޮންނަ ބައްދަލުވުމުގައި ބައިވެރިވެވޭނީ ކަނޑައެޅިފައިވާ މުއްދަތުގައި ބީލަމަށް ރެޖިސްޓްރީ ވުމަށް އެދި ފޯރމް ހުށަހަޅައި ބީލަމުގައި ރެޖިސްޓްރީ ކުރެވިފައިވާ ކަމުގެ ސްލިޕްް ފޯރުކޮށްދެވިފައިވާ ފަރާތްތަކަށް އެކަނި ކަމަށެވެ.
