ނެޝަނަލް އިމަރޖެންސީ އޮޕަރޭޝަން ސެންޓަރު (އެންއީއޯސީ) މި ވަގުތު ނެތް ނަމަވެސް ކޮވިޑް-19 ރާއްޖެއިން ނައްތާލުމަށް ކުރަމުންދާ މަސައްކަތްތަކަށް ބަދަލެއް ނާންނަ ކަމަށް ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ގެ ތަރުޖަމާނު ޑރ. ނަޒްލާ ރަފީގު ވިދާޅުވެއްޖެއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި ޑރ. ނަޒްލާ ވިދާޅުވީ، އެންއީއޯސީގައި މަސައްކަތް ކުރި ވަރަށްވުރެ ކޭސްތައް މިހާރު ގިނަވެފައިވީ ނަމަވެސް މަސައްކަތްތަކަށް މާބޮޑު ބަދަލެއް ނާންނަ ކަމަށެވެ.
ޑރ. ނަޒްލާ ވިދާޅުވީ މި އޮޕަރޭޝަންގެ އެންމެ މުހިންމު އެއް މަސައްކަތަކީ ކޮންޓެކްޓް ޓްރޭސިންގެ މަސައްކަތްތައް ކަމަށާއި، އެމަސައްކަތްތައް މިހާރު ވެސް ވަރަށް ހަރުދަނާ އުސޫލެއްގެ ދަށުން ކުރިއަށް ގެންދާ ކަމަށެވެ. އަދި ވިދާޅުވީ މި މަސައްކަތުގައި އިތުރު މީހުން ބޭނުންވާ ހާލަތްތަކުގައި އިތުރު މީހުން ހޯދައިގެން ވެސް މަސައްކަތްތައް ކުރިއަށް ގެންދާ ކަމަށެވެ.
އަޅުގަނޑު އިއްޔެގަ ވެސް ބަލާލިއިރުގަ ރޭގަ ބަލާލިއިރުގަ އިއްޔެގެ ކޭސްތަކުގެ ތެރެއިން އޭރުގަ ކޮންޓެކްޓު ޓްރޭސިންގެ ނުނިމި އިނީ ހަތަރު ކޭސްގެ އޭގެ ތެރެއިން ދެކޭސް ހަމަ އޮންގޮއިން. އަދި ދޭ ކޭސްގެ މަސައްކަތް ކުރުމަށް ކޮންޓެކްޓު ކުރުމުގެ މަސައްކަތް ކުރިއަށް ދަނީ. ކޮންޓެކްޓު ޓްރޭސިންގެ މަސައްކަތްތައް އެބަ ކުރިއަށްދޭ. ނަމަވެސް ބައެއް ފަހަރު ވާ ގޮތަކީ ބައެއް ބޭފުޅުންނަށް ގުޅާގެން އެވަގުތު ނުގުޅިއްޖެއްޔާ ނޫނިއްޔާ އިތުރު މައުލޫމާތު ހޯދަން ވެސް ގުޅައިގެން ނުގުޅިއްޖެއްޔާ ބައެއް ފަހަރު ހުރެދާނެ އެމައުލޫމާތު އަވަހަށް އަޅުގަނޑުމެންނަށް ނުލިބި.ޑރ.ނަޒްލާ ރަފީގު
ޑރ.ނަޒްލާ ވިދާޅުވީ ކޭސްތައް ގިނަވާ ވަރަކަށް މެނުއަލީ ކުރަން ޖެހޭ މަސައްކަތްތައް ވެސް ބޮޑަށް އޮޓަމޭޓް ކުރަމުން ގެންދާ ކަމަށެވެ. އެގޮތުން ކަރަންޓީން ހަމަވާ މުއްދަތާއި، ނަތީޖާ ވެސް މެސެޖަކުން ފޯރުކޮށްދޭކަން ޑރ. ނަޒްލާ ފާހަގަކުރެއްވިއެވެ. އަދިވެސް އިތުރު ކަންކަން ސިސްޓަމް މެދުވެރިކޮށް އާންމުންނަށް އެންގޭނެ އިންތިޒާމް ހަމަޖެއްސުމުގެ މަސައްކަތް ކުރަމުންދާ ކަމަށް ޑރ. ނަޒްލާ ވިދާޅުވިއެވެ.
މީގެ އިތުރުން ޑރ. ނަޒްލާ ވިދާޅުވީ ގިނަ ކޭސްތަކެއް ފެންނަމުންދާތީ އާންމުން ކަންބޮޑުވާނެކަން ގަބޫލުކުރާ ކަމަށެވެ. ނަމަވެސް އެޗްއީއޯސީގައި މަސައްކަތް ކުރަމުންދަނީ ހަމައެކަނި ހެލްތް ޕްރޮޓެކްޝަން އެޖެންސީ (އެޗްޕީއޭ) މުއައްޒަފުން ނޫން ކަމަށާއި، އެންއީއޯސީ މިވަގުތު ނެތް ކަމުގައި ވިޔަސް ގިނަ އެޖެންސީތަކާ މުއައްސަސާތަކުގެ އެއްބާރުލުން ލިބޭކަން ޑރ. ނަޒްލާ ފާހަގަކުރެއްވިއެވެ.
އެޗްއީއޯސީގެ ބައެއް މަސައްކަތްތައް ލަސްވާ ސަބަބުތަކަށް އަލިއަޅުއްވާލައްވާ ޑރ. ނަޒްލާ ވިދާޅުވީ މިހާރު ބޯޑަރުތައް ހުޅުވާ، ފަތުރުވެރިކަމުގެ ސިނާއަތް ހުޅުވާލާފައިވާތީ ކުރިން ރިސޯޓުތައް ފެސިލިޓީގެ ގޮތުގައި ބޭނުން ކުރުމަށް ވަރަށް ފަސޭހައިން ލިބޭ ކަމަށާއި، މިހާރު ރިސޯޓުތައް ހޯދުމަށް ދަތިވާކަމަށެވެ. ނަމަވެސް ކުރެވޭ މަސައްކަތުގެ ތެރެއިން މިހާރު ވެސް އައިސޮލޭޝަން ފެސިޓީގެ ގޮތުގައި ބައެއް ގެސްޓްހައުސްތަކާއި، ބައެއް ރިސޯޓުތައް ލިބޭކަމަށް ޑރ. ނަޒްލާ ވިދާޅުވިއެވެ.
މީގެ ޗެލަންޖަކީ އަޅުގަނޑުމެން ބޭނުންވާހާ މާލެއާ ކައިރީގަ ސަރަހައްދުން ފަހަރެއްގަ އެހާ ފަސޭހައިން ގިނަ ފެސިލިޓީތައް ނުލިބިދާނެ. ދުރުގަ ހުންނަ ފެސިލިޓީއެއް ވެއްޖެއްޔާ ދުރުގަ ހުންނަ ތަންތަނަށް މީހުން ގެންދިއުމުގަ ލަސްތަކެއް އުޅޭނެ. އަޅުގަނޑުމެންނަށް ދަތިވާނެ. އަޅުގަނޑުމެން ފާހަގަކުރެވޭ. މިސާލަކަށް ސީޕްލޭންގަ ގެންދަންޏާ ފަހަރަކު 12 މީހުން މިގެންދެވެނީ. އެއެކަލަ އޮޕަރޭޝަނަލް އިޝޫ އުޅޭނެ ކޭސްތައް އިތުރުވާ ކަމަށްވަންޏާ. އެހެންވީމަ ބައެއް ކަންކަން މިލަސްވަނީ.ޑރ.ނަޒްލާ ރަފީގު
ޑރ. ނަޒްލާ ވިދާޅުވީ ކޮވިޑް-19 އަށް މީހަކު ޕޮޒިޓިވްކަން އެގުމާއެކު އެންމެ ފުރަތަމަ ވެސް ގުޅާނީ ޕޮޒިޓިވްވި މީހާއަށް ކަމަށާއި، އެމީހާ މެދުވެރިކޮށް ކޮންޓެކްޓް ޓްރޭސިންގެ މަސައްކަތް ކުރާ ކަމަށެވެ. އަދި ވިދާޅުވީ ޕޮޒިޓިވްވި ޕޭޝަންޓު އޭނާއާ ދިމާވި މީހުންގެ ސައްހަ މައުލޫމާތު ނުވަތަ ހަނދާން ނެތިގެން ވެސް މީހެއްގެ ނަން ނުދެވިވާނަމަ ވަކި މީހަކީ ކޮންޓެކްޓެއްގެ ގޮތުގައި ފާހަގަނުކުރެވި ހިނގާދާނެ ކަމަށެވެ.
މަސައްކަތުގައި މާހައުލުގެ ތެރެއިން ޕޮޒިޓިވްވި ފަރާތްތައް ބެލުމަށް ގުޅަނީ އެ އޮފީހަކަށް ކަމަށާއި، މި މަސައްކަތުގައި އެންމެންގެ އެއްބާރުލުން ދިނުމަކީ ވަރަށް މުހިންމު ކަމެއްގެ ގޮތުގައި ޑރ. ނަޒްލާ ސިފަކުރެއްވިއެވެ.
