ދެތިން ރައްޔިތުންގެ މަޖިލިސް މެމްބަރުން ވަޒީރުންނަށް ބިރު ދެއްކާ ސަރުކާރުގެ ތެރެ ހަލާކުކޮށްލަން މަސައްކަތް ކުރާ ކަމަށް ޔޫތު މިނިސްޓަރު އަހްމަދު މަހްލޫފު ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މިނިސްޓަރު މަހުލޫފު ވިދާޅުވީ ރައްޔިތުން މަޖިލީހުގެ ދެތިން މެމްބަރަކު ވަޒީރުންނަށް ބިރު ދެއްކުމަށް މަސައްކަތް ކުރާ ކަމަށާއި، އެމްޑީޕީގެ ޕާލަމެންޓްރީ ގްރޫޕްގެ ލީޑަރު އަލީ އާޒިމާއި އެކު ދެތިން މެންބަރުން އުޅެނީ ސަރުކާރު ހަލާކު ކޮށްލަން ކަމަށެވެ.
އިކޮނޮމިކް މިނިސްޓަރު ފައްޔާޒް އިސްމާއިލްގެ އިތުބާރުނެތް ކަމުގެ މައްސަލައަކީ ވެސް އެ މަސައްކަތުގެ ތެރެއިން ކުރާ ކަމެއްގެ ގޮތުގައި މިނިސްޓަރު މަހުލޫފު ސިފަކުރެއްވިއެވެ.
މިނިސްޓަރު މަހުލޫފު ވިދާޅުވީ އެމްޑީޕީގެ ވަޒީރުންނަކީ ރައްޔިތުންގެ މަޖިލީހުގެ ގިނަ މެމްބަރުންނާ ގާތްގުޅުމެއް އޮންނަ އަދި ގުޅިގެން މަސައްކަތް ކުރާ ވަޒީރުން ކަމަށެވެ. ގިނަ މަސައްކަތްތަކެއް މަޖިލިސްގެ ތެރެއިން ވެސް ކުރަމުންދާއިރު، ދާއިރާގެ ކަންކަން ނުވުމަކީ މެމްބަރުންގެ ކަންބޮޑުވުމަކަށް ވާނެކަން ގަބޫލުކުރާ ކަމަށާއި، ނަމަވެސް ސިޔާސީ ވަކި ކަމެއް ހާސިލް ކުރުމަށް ކުރާކަން ހާސިލްނުވާނެ ކަމަށް މިނިސްޓަރު މަހުލޫފު ވިދާޅުވިއެވެ.
ދެން ސިޔާސީއޭ މިދަންނަވަނީ އަޅުގަނޑުގެ ފަހުން އައިސް ރައްޔިތުންގެ މަޖިލިސްގެ ތެރެއިން އަޅުގަނޑު ބޭރުކޯށްލެވޭތޯ ބެލުން. އިތުރު އެއްވެސް ކަމެއް ނޫން އެނގޭތޯ. ހަމަ އެކަމަށް އަލީ އާޒިމް މަސައްކަތް ކުރެއްވި. އިތުބާރު ނެތްކަމުގެ ވޯޓެއް ނެގުމަށްޓަކައި އަޅުގަނޑު ބޭރުކުރުމަށްޓަކައި ސޮއި ހޯދާ ތާއީދު ހޯދުމުގެ ގޮތުން މަސައްކަތް ކުރި. އެއްވެސް ހާލަތެއް ގައި މިއުޅެނީ އަޅުގަނޑު އެއްވެސް ކަމެއް ގޯސްކޮށް ކޮށްގެން ނޫން. ހަމައެކަނި އަޅުގަނޑު މިހުރި މަގާމުން އަޅުގަނޑު ވަކި ކުރުމަށް. އެވިސްނުމުގައި ކުރެވެމުންދާ މަސައްކަތެއް. އަޅުގަނޑު އަލީ އާޒިމްއަށް ވެސް ދަންނަވަން އޮތީ އަލީ އާޒިމްއަކީ އެންމެ ރަނގަޅަށް އެކަން އެނގެންޖެހޭނެ އެއް ބޭފުޅާ.ޔޫތު މިނިސްޓަރު އަހްމަދު މަހްލޫފު
އަލީ އާޒިމްއަށް ބޮޑެތި ފާޑުކިޔުންތަކެއް އަމާޒުކުރައްވާ މިނިސްޓަރު މަހުލޫފު ވިދާޅުވީ ގަވާއިދާ ހިލާފަށް ގިނަ މަސައްކަތްތަކެއް ކުރާކަމަށް ތުހުމަތުކޮށް ވަޒީރުކަމުން ދުރުކުރުމަށް މަސައްކަތް ކުރި ނަމަވެސް އަލީ އާޒިމް ވިދާޅުވެގެން ކުޅިވަރުގެ ދާއިރާ ހަލާކުކޮށްލުމަށް މަސައްކަތް ނުކުރާނެ ކަމަށާއި، މަގާމު ގެއްލިދާނެތީ ބިރު ނުގަންނަ ކަމަށެވެ. އަދި ވިދާޅުވިހާ ގޮތަކަށް އަމަލުނުކުރާނެ ކަމަށް ވެސް މިނިސްޓަރު ވިދާޅުވިއެވެ.
މިނިސްޓަރު މަހުލޫފު ވިދާޅުވީ އަލީ އާޒިމް ހިތްހަމަޖެހިވަޑައިނުގެންނެވީ އެފްއޭއެމްގެ ރައީސް ބައްސާމް އަދީލް ޖަލީލް މަގާމުގައި ހުންނެވުމުން ކަމަށެވެ. ނަމަވެސް އަބަދު އެފްއެމްއޭ ތަޅަން ނުހުރެވޭނެ ކަމަށާއި، ކުޅިވަރުގެ ދާއިރާ ކުރިއެރުވުމަށް މަސައްކަތް ކުރަން ޖެހޭ ކަމަށެވެ.
އަޅުގަނޑަކީ އަޅުގަނޑު ކާރިއަށް ސެކިއުރިޓީ ލައިގެން އުޅޭ މީހެއް ނޫން. އަޅުގަނޑަކީ ވަރަށް އާދައިކޮށް ރައްޔިތުންނާ އެކު ބޭރަށް ބޭނުންއިރަކު ގޮސް ކުޅިލައި މީހުންނާއެކު ކޮފީ ބޯލަން ގޮސް މިހެން އުޅޭ މީހެއް. އެހެންވީމަ އަޅުގަނޑުގެ މިމާގު ގެއްލި ދާނެތީ ބިރުން އަލީ އާޒިމް ދައްކާ ބިރުގަ ޖެހިގެން ކަމެއް ކޮށްފާނެ ހެން ހީވުމަކީ އެއީ ވަރަށް ބޮޑު ގޯހެއް. އަޅުގަނޑަކީ ރައީސުލްޖުމްހޫރިއްޔާ އައްޔަންކޮށްފައިވާ މީހެއް. ރައީސް މިއަދު ވެސް އަޅުގަނޑު ގާތުގަ ވިދާޅުވެއްޖެއްޔާ އަޅުގަނޑު ދާގޮތަށް ގޮސް އެފްއޭމްގަ ގޮސް ތަޅުވެސް އަޅުވާނަން. އެކަމަކު އަލީ އާޒިމް ބުނެގެން އަޅުގަނޑު ނުކުރާނަން. އެހެންވީމަ އެހެންމެ ރައީސް އަށް ވެސް ވަރަށް ސާފުކޮށް އެނގިވަޑައިގަންނަވާނެ އަޅުގަނޑު ގާނޫނާ ހިލާފަށް އެއްވެސް ކަމެއް ނުކުރާނެ.ޔޫތު މިނިސްޓަރު އަހްމަދު މަހްލޫފު
މިނިސްޓަރު މަހުލޫފު ވިދާޅުވީ މި ސަރުކާރު ވެރިކަމަށް އައުމުގައި ކުޅިވަރު ދާއިރާ ސިޔާސީ ނުކުރުމަށް ސިޔާސަތު ކަނޑައެޅި ކަމަށެވެ. އެހެންކަމުން ކުޅިވަރުގެ ދާއިރާއަށް ސިޔާސީ ކަންކަން ނުވައްދާ މަޝްވަރާގެ ތެރެއިން އަބަދު ވެސް ކަންކަން އިމްތިޒާމްކުރާކަން މިނިސްޓަރު މަހުލޫފު ފާހަގަކުރެއްވިއެވެ. އަދި މިހާތަނަށް އެއްވެސް އެސޯސިއޭޝަނެއްގައި ސިޔާސީ ކަމަކަށް އެދިފައި ނޯންނާނެ ކަމަށާއި، ޖަލްސާއަކަށް މީހަކު ފޮނުވަން ނުވަތަ ސިޔާސީ ވާހަކައެއް ވެސް އެފަދަ ބޭފުޅަކާ ދައްކާފައި ނުވާނެކަމުގެ ޔަގީންކަން މިނިސްޓަރު މަހުލޫފު ދެއްވިއެވެ.
