ކްރިމިނަލް ކޯޓަށް ހޯދާ ފަނޑިޔާރުންގެ އަދަދު އިތުރުކޮށްފިއެވެ.
ކްރިމިނަލް ކޯޓަށް ފަނޑިޔާރަކު ހޯދަން ޖުޑީޝަލް ސަރވިސް ކޮމިޝަން (ޖޭއެސްސީ) އިން އިއުލާންކޮށްފައިވަނީ މި މަހުގެ ހަވަނަ ދުވަހުއެވެ. އެ އިއުލާނާ ހަވާލާދީ ޖޭއެސްސީން އާދިއްތަ ދުވަހު ބުނީ، ކްރިމިނަލް ކޯޓުގެ ފަނޑިޔާރުކަމުގެ މަގާމަށް ބޭނުންވާ އަދަދު ދޭކަށް އިތުރުކޮށްފައިވާ ކަމަށެވެ.
ކްރިމިނަލް ކޯޓުގެފަނޑިޔާރު ކަމަށް ކުރިމަތިލާ ފަރާތުގެ ހުންނަ ޖެހޭ ޝަރުުތުތަކުގެ ތެރޭގައި ފަނޑިޔާރު ކަމުގައި ނުވަތަ ގާނޫނީ ވަކީލުކަން ކުރުމުގައި ނުވަތަ އެ ދެކަމުގައި މަދުވެގެން ދެ އަހަރު ދުވަހުގެ ތަޖުރިބާ ލިބިފައިވުމާއި، އިސްލާމީ ޝަރީއާ ނުވަތަ ގާނޫނު ނުވަތަ ގާނޫނާއި އިސްލާމީ ޝަރީއާގެ ރޮނގުން ފުރަތަމަ ޑިގްރީ ހާސިލުކޮށްފައިވުން ހިމެނެއެވެ.
ފަނޑިޔާރު ކަމަށް ކުރިމަތިލާ މީހާގެ ޝަރުތުތަކުގެ ތެރޭގައި ސިޔާސީ މަގާމެއް ފުރަމުންދާ މީހަކު ކަމުގައި ނުވުމާއި، ސިޔާސީ ޕާޓީއެއްގެ މެންބަރަކު ކަމުގައި ނުވަތަ ސިޔާސީ ޕާޓީއެއްގައި ހަރަކާތްތެރިވާ މީހަކު ކަމުގައި ނުވުން ހިމެނެއެވެ. މުސާރަ އާއި އެލަވަންސްއާ އެއްކޮށް ކްރިމިނަލް ކޯޓުގެ ގާޒީއަކަށް 48،300 ރުފިޔާ ލިބޭނެ ކަމަށް ޖޭއެސްސީގެ އިއުލާނުގައި ބުނެއެވެ. ޖޭއެސްސީން ވަނީ ހައިކޯޓަށް ފަނޑިޔާރަކު ހޯދަންވެސް އިއުލާންކޮށްފައެވެ.