ދިވެހިރާއްޖޭގެ ހެލްތްގެ ދާއިރާގައި ކޮންމެހެން ތިއްބަވަންޖެހޭ މަގާމަކަށް ބޭފުޅުން މިހާތަނަށް އައްޔަން ކުރައްވާފައިނުވާތީ އެކަމުގެ ކަންބޮޑުވުން ފާޅުކޮށްފި އެވެ.

ރައްޔިތުންގެ މަޖިލީހުގެ އިޖުތިމާއި ކޮމެޓީން ހޮނިހިރު ދުވަހު ބޭއްވި ބައްދަލުވުމަށް ސިއްހީ ދާއިރާގައި މަސައްކަތް ކުރައްވާ ބައެއް ބޭފުޅުން ވަޑައިގެން މިކަމުގެ ކަންބޮޑުވުން ފާޅު ކުރައްވާފައި މިވަނީ، ރާއްޖޭގެ ސިއްހީ ދާއިރާ ދުވަހަކަށްވުރެ ދުވަހެއް ގޯސްވަމުންދާ ކަމަށްބުނެ، ރައްޔިތުންގެ މަޖިލީހުގެ ރައީސަށާއި މަޖިލީހުގެ ސަމާލުކަމަށް އެބޭފުޅުން އެ މައްސަލަ ގެންނެވުމުން ބޭއްވި އިޖުތިމާއީ ކޮމެޓީގެ ބައްދަލުވުމުގަ އެވެ. މި ބައްދަލުވުމުގައި ސިއްހީ ދާއިރާގެ ބޭފުޅުންގެ ތެރެއިން ބައިވެރިވެވަޑައިގެންނެވީ، ޑރ. ހުސައިން މާހިރު، ޑރ. އިސްހާޤް ޝަފީޤް، ޑރ. މުހައްމަދު ޝާފީ މުނީރު، ޕްބަލިކް ހެލްތުގެ ދާއިރާގައި ގިނަ ދުވަހު ހިދްމަތް ކުރެއްވި ހަފީޒާ އަލީ އަދި ހަދީޖާ އަބްދުޞަމަދު އަބްދުﷲ އެވެ.

ރާއްޖޭގެ ސިއްހީ ދާއިރާގެ ހުރި ގިނަ މައްސަލަތައް އެ ބޭފުޅުން ފާހަގަކުރެއްވިއިރު، މުހިއްމު ބައެެއް މަގާމުތަކަށް ބޭފުޅުން އައްޔަންކުރައްވާފައިނުވާތީ ވެސް އެބޭފުޅުންގެ ކަންބޮޑުވުން ވަނީ ހިއްސާ ކުރައްވާފަ އެވެ. އެގޮތުން، ހެލްތު މިނިސްޓްރީގެ ލީޑަރޝިޕްގެ ދަށުގައި ތިއްބާ 5 މަގާމެއް އެބޭފުޅުން ފާހަގަކުރެއްވިއިރު، ޕަބްލިކް ހެލްތް ސަރވިސަސްގެ މަގާމަކީ ހެލްތް މިނިސްޓަރަކު ހުންނެވި ނަމަވެސް، އިންޓަރނޭޝަނަލް ލެވެލްގައި ހުރިހާ ގައުމެއްގައި އޮންނަ މަގާމެކެވެ.

ހަފީޒާ ވިދާޅުވީ، މީގެކުރީން އެމަގާމުގައި ބޭފުޅަކު ހުންނެވި ކަމަށެވެ. ނަމަވެސް މިސަރުކާރު އައިފަހުން އެމަގާމުގައި ހުސްކޮށް އޮތްތަނުގައި އެމަގާމުގެ މަސްއޫލިއްތު އެއްގޮތަކަށް ވެސް ނުހިނގާ ކަމަށެވެ.

ހަފީޒާ ވިދާޅުވީ ޓެކްނިކަލް ހުރިހާ މަސައްކަތުގެ ނިންމުންތައް ނިންމުމާއި ލަފާ ދިނުމާއި މަޝްވަރާދިނުމާއި އެހުރިހާ ކަމެއްކުރާ މީހަކީ ޕަބްލިކް ހެލްތް ސަރވިސަސްގެ މަގާމުގައި ހުންނަ މީހާގެ މަސްއޫލިއްޔަތެއް ކަމަށެވެ. އަދި އެމަގާމުގައި ހުންނަވަން ޖެހެނީވެސް ވަރަށް ސްޕެސަލައިޒް ޑޮކްޓަރެއް ކަމަށްވެސް ހަފީޒާ ވިދާޅުވި އެވެ.

ހަފީޒާ ވިދާޅުވީ އެމަގާމަށް ކުރިމަތިލުމުގައިވެސް ބައެއް ގޮންޖެހުންތައް އެބަހުރި ކަމަށެވެ. ހަފީޒާ ވިދާޅުވީ އެއި ސިވިލް ސަރވިސް މަގާމެއް ކަމަށްވެފައި، މުސާރަ ހިނގާނީ، ސިވިލް ސަރވިސްގެ އޮނިގަނޑުގެ ދަށުން ކަމަށްވާތީ، މުސާރަ ދައްވުން ވެސް ހިމެނޭ ކަމަށެވެ.

މީގެއިތުރުން، މޯލްޑިވްސް ފުުޑް އެންޑް ޑްރަގް އޮތޯރިޓީގެ އިސްވެރިޔާ، ޑިރެކްޓަރ ޖެނެރަލްގެ މަގާމާއި، ތެލެސީމިއާ ސެންޓަރުގެ އިސްވެރިޔާ، ޑިރެކްޓަރ ޖެނެރަލް އޮފް ނޭޝަނަލް ބްލަޑް ސަރވިސަސް، ގާނޫނު ލާޒިމު ކުރާ، ކޮމިޝަނަރ ޖެރެނަލް އޮފް ކޮލިޓީ އެސުއަރރެންސް މަގާމުގައި ވެސް ބޭފުޅަކު ނެތް ކަމަށާއި އަދި ލޭ އެޅުމާއި އަދި ލެއާ ގުޅުންހުރި މައްސަލަތަކުގައި ފަރުވާ ދިނުމުގެ ޒިންމާ ނަގަން ހުންނަ ހިމަޓޮލަޖިސްޓްގެ މަގާމުގައި ވެސް ބޭފުޅަކު ނެތް ކަމަށް ހަފީޒާ ވިދާޅުވި އެވެ.

ކޮމެޓީގެ ބައިވެރިވި ވަޑައިގެންނެވި ސިއްހީ ހިދްމަތްތެރިން ވަނީ އެ މަގާމުތަކަކީ، ސިއްހީ ނިޒާމު ފުރިހަމަ ކުރުމަށް މުހިއްމު މަގާމުތަކެއް ކަމަށާއި، ރާއްޖޭގެ ސިއްހީ ނިޒާމު ހަރުދަނާކޮށް ރަނގަޅު ކުރެވޭނީ އެމަގާމުތަކަށް އެކަށީގެންވާ، ރަނގަޅު ބޭފުޅުން އައްޔަން ކުރެވިގެން ކަމަށެވެ.