ލީބިޔާގެ ސުލްހައަށް އެގައުމުގައި ޚާއްސަ އޮޕްރޭޝަންތަކެއް އިޖިޕްޓްގެ ސިފައިން ހިންގަން ޖެހިދާނެ ކަމުގެ އިންޒާރު ދީފިއެވެ.
ބޭރުގެ މީޑިއާތަކުގައި ރިޕޯޓު ކޮށްފައިވާ ގޮތުގައި ލީބިޔާގައި ހިނގަމުންދާ ހަމަނުޖެހުންތައް މާބޮޑަށް ގޯހުން ދާކަމަށްވާނަމަ އިޖްޕްޓްގެ ސިފައިން ލީބިޔާގެ ސުލްހައަށްޓަކައި އެގައުމުގައި ޚާއްސަ އޮޕްރޭޝަންތަކެއް ހިންގަން ޖެހިދާނެ އެވެ. އަދި މިކަމަށް އިޖިޕްޓްގެ ސިފައިން ތައްޔާރަށް ތިބުމަށް އެގައުމުގެ ރައީސް އަބްދުލް ފައްތާހު އަލްސީސީ ވަނީ އެގައުމުގެ ސިފައިންނަށް އަމުރު ކުރައްވާފައެވެ.
ތުރުކީގެ ސިފައިން ލީބިޔާގައި ހަރަކާތްތެރިވާތީ އެގައުމުގެ މަޝްރަހު ވަނީ ވަރަށް ބޮޑަށް ގޯސްވެފައެވެ.
ގްލޯބަލް ފަޔަރ ޕަވަރގެ 2020 ވަނަ އަހަރުގެ އިންޑެކްސް އިން ދައްކާ ގޮތުން ތުރުކީ ފަހަތަށް ޖައްސާލުމަށްފަހު އިޖިޕްޓްއިން ވަނީ މެދުއިރުމަތީގެ އެންމެ ވަރުގަދަ އަސްކަރިއްޔާގެ ލަގަބު ނަގާފައެވެ.
ލީބިޔާގެ ނޭޝަނަލް އަރމީއަށް އިޖިޕްޓްއިން ވާގިވެރިވެދޭއިރު ތުރުކީއިން ދަނީ ނޭޝަނަލް އެކޯޑްއަށް ވާގިވެރިވަމުންނެވެ. އަދި ދާދިފަހުން ލީބިޔަން ނޭޝަނަލް އަރމީގެ ބާރުގެ ދަށުގައި އޮތް ސަރަހައްދަށް ނޭޝަނަލް އެކޯޑް އިން ވަނީ އެމީހުންގެ ބާރުގެ ދަށަށް ގެނެސްފައެވެ.
އިޖިޕްޓްގެ ފޮރިން މިނިސްޓަރު ސަމެހް ޝަކްރި އާދިއްތަ ދުވަހު ވިދާޅުވީ އިޖްޕްޓް އަދި އަރަބި ގައުމުތަކުގެ ސަރަހައްދުގެ ސަލާމަތަށް އެއްވެސް ހުރަހެއް އަދި ނުރައްކަލެއް ކުރިމަތިވާނަމަ އެކަމަށް އެކަށީގެންވާ ފިޔަވަޅެއް އަޅާނެ ކަމަށެވެ.
ފޮރިން މިނިސްޓަރު ވިދާޅުވީ ތުރުކީއިން ލީބިޔާއަށް އަތްގަދަ ކުރުން އެއްގޮތަކަށް ވެސް ބަލައި ނުގަންނާނެ ކަމަށާއި، ތުރުކީއިން ސީރިޔާ، އިރާގް އަދި ލީބިޔާގައި އަތްގަދަ ކުރަމުންދާ ދިއުމަކީ އިންޓަނޭޝަނަލް ގާނޫނުތަކާ ވެސް ހިލާފަށް ކުރަމުން ގެންދާ ކަމެއް ކަމަށެވެ. އެހެންކަމުން ލީބިޔާގެ ކަންތައް ހަމަ މަގަމަށް އަޅުވަން މަސައްކަތް ކުރަންވީ ވަގުތު އައިސްފައިވާ ކަމަށް ފޮރިން މިނިސްޓަރު ވިދާޅުވެފައިވެއެވެ.
މީގެކުރިން އިޖްޕްޓްއިން އިސް ނަގައިގެން ހެދި ހަނގުރާމަ މެދުކަނޑާލި އެއްބަސްވުމަށް ނޭޝަނަލް އެކޯޑް އިން ވަނީ ބީރު ކަންފަތެއް ދީފައެވެ.
