ކޮވިޑް-19ގެ ނުރަކައްލާ ގުޅިގެން މެދުކަނޑާލި ބައިނަލްއަގުވާމީ ދަތުރުފަތުރުތައް ދެ މަސް ފަހުން ތުރުކީވިލާތުން ފަށައިފިއެވެ.

ބައިނަލްއަގުވާމީ މީޑިއާތަކުން ރިޕޯޓުކުރާ ގޮތުގައި ގައުމީ އެއާރލައިން ޓަރކިޝް އެއާރލައިނުން އެންމެ ފުރަތަމަ ދަތުރުކޮށްފައިވަނީ ބުރާސްފަތި ދުވަހުގެ ހެނދުނު ޖަރުމަނުވިލާތުގެ ޑަސަލްޑޯރފްއަށެވެ. އެއާއެކު އިތުރު ފްލައިޓްތަކެއް އިނގިރޭސިވިލާތުގެ ލަންޑަނާއި ނެދަރލޭންޑްސްގެ އެމްސަޓަރޑެމްއަށް ދަތުރުކޮށްފައިވާ ކަމަށް ރިޕޯޓުތައް ބުނެއެވެ. އެއާރޕޯޓްތައް ބަންދުކޮށް ތުރުކީވިލާތުން ހުރިހާ ފްލައިޓްތަކެއް ހުއްޓާލީ އެ ގައުމުގައި ކޮވިޑް-19 ހަލުވިކަމާއި އެކު ފެތުރެމުން ދިއުމާއި ގުޅިގެން މާރޗް މަހުގެ 24ގައެވެ.

ޖޫން މަހުގެ 10 ވަނަ ދުވަހުން ޓަރކިޝް އެއާރލައިނުން ބައިނަލްއަގުވާމީ ދަތުރުތައް ފެށުމަށް އިއުލާންކޮށްފައިވާއިރު، އެއް ދުވަސް ލަސްވި ސަބަބެއް މީޑިއާތަކުގައި ހާމަކޮށްފައެއް ނުވެއެވެ. އަދި ކުރިޔަށް އޮތް ދުވަސްތަކުގައި އިތުރު 40 ގައުމަކަށް ދަތުރުތައް ފަށާނެކަމަށް ވަނީ އިއުލާންކޮށްފައެވެ. މީގެއިތުރުން، ތުރުކީވިލާތުގެ އެތެރޭގެ ވައިގެ ދަތުރުފަތުރުތައް ކޮންމެވެސް ވަރަކަށް ފަށާފައިވާކަމަށްވެސް މީޑިއާ ރިޕޯޓްތައް ބުނެއެވެ.

ތުރުކީވިލާތުގައި 174,023 (އެއް ލައްކަ ހަތްދިހަ ހަތަރު ހާސް ތޭވީސް) މީހަކު ކޮވިޑް-19އަށް ޕޮޒިޓިވްވެފައިވާއިރު 4،763 (ހަތަރު ހާސް ހަތް ސަތޭކަ ފަސްދޮޅަސް ތިނެއް) މީހުން ވަނީ މަރުވެފައެވެ.