ބްރެޒިލްގައި މިހާރު ހަލުވިކަމާއެކު ފެތުރެމުންދާ ކޮވިޑް-19 ޖެހިގެން މިހާތަނަށް އެންމެ ގިނަ އަދަދެއްގެ މީހުން ޕޮޒިޓިވް ވި ދުވަހަކީ ބުރާސްފަތި ދުވަސް (އިއްޔެ) ކަމަށް އެގައުމުގެ ހެލްތު މިނިސްޓްރީން ބުނެފި އެވެ.

ބްރެޒިލްގެ ހެލްތު މިނިސްޓްރީއާއި ހަވާލާދީ ބައިނަލްއަގުވާމީ މީޑިއާތަށް ރިޕޯޓުކުރާ ގޮތުން، ބުރާސްފަތި ދުވަހު އެކަނި 26،417 މީހަކު ކޮވިޑް-19ށް ޕޮޒިޓިވްވެފައި ވާއިރު، މިއީ ހަލުވިކަމާއެކު އެ ގައުމުގައި ބަލި ފެތުރެން ފެށި ފަހުން ދުވާލެއްގެ މައްޗަށް އެންމެ ގިނަ މީހުން ޕޮޒިޓިވްވި ދުވަސް ކަމަށެވެ. އެއާއެކު އެ ގައުމުން ކޮވިޑް-19ށް ޖުމުލަ 438,812 (ހަތަރު ލައްކަ ތިރީސް އަށްހާސް އަށްސަތޭކަ ބާރަ) މީހަކު ވަނީ ޕޮޒިޓިވް ވެފައެވެ. މިވަގުތު ދުނިޔޭގައި އެންމެ ގިނަ އަދަދަކަށް މީހުންނަށް ވައިރަސް ޖެހިގެން ރިޕޯޓުކުރަމުން އަންނަ ގައުމުތަކުގެ ތެރޭގައި ބްރެޒިލް ހިމެނެއެވެ.

ފާއިތުވެދިޔަ 24 ގަޑި އިރު ތެރޭގައި 1،156 މީހަކު ބަލިޖެހިގެން މަރުވެ، ބަލި ޖެހިގެން ޖުމުލަ މަރުވި މީހުންގެ އަދަދު 26،754ށް އަރާފައިވާކަމަށް ވެސް އެ ގައުމުގެ ހެލްތު މިނިސްޓްރީން ވަނީ ބުނެފައެވެ.

ބްރެޒިލްގައި ހަލުވިކަމާއެކު ވައިރަސް ފެތުރެމުން ދާއިރު ވައިރަސް ކޮންޓްރޯލް ކުުރުމަށް އެ ގައުމުގެ ރައީސް ޖައި ބޮލްސޮނާރޯ ގެންގުޅުއްވާ ސިޔާސަތުތަކަށް ގިނަ ބައެއްގެ ފާޑުކިޔުން ވަނީ އަމާޒު ވެފައެވެ. ވައިރަސް ފެތުރޭ މިންވަރު ކޮންޓްރޯލް ނުވާތީ އެ ގައުމުގެ އިގްތިޞާދަށް ބޮޑެތި ގެއްލުންތަކެއް ވަމުންދާއިރު ރައީސަށް އަންނަ އިންތިޚާބު ކާމިޔާބު ވުމާމެދުވެސް މިހާރު ވަނީ ސުވާލު އުފެދިފަ އެވެ.

ބޮލްސޮނާރޯ ވަނީ ވައިރަސް އިން ރައްކާތެރިވުމަށް އަޅަންޖެހޭ ފިޔަވަޅުތައް ކަމަށްވާ އިޖުތިމާޢީ ގައިދުރުކަން ގެންގުޅުން ފަދަ ކަންކަމަށް ތަކުރާރުކޮށް ދެކޮޅު ހައްދަވާ އެކަމަށް ފާޑުވިދާޅުވެ ވާހަކަ ދައްކަވާފަ އެވެ. އަދި ސިއްހީ މާހިރުން އެ ބޭހެއް ބޭނުންކުރުން ރަނގަޅުނޫން ކަމަށް އިރުޝާދު ދެމުން ގެންދަވާ އެންޓި މެލޭރިޔާ ބޭސް ކޮވިޑް-19 ޖެހިފައިވާ މީހުންނަށް ބޭނުންކުރުމަށް ތަކުރާރުކޮށް ގެންދަވަނީ އިރުޝާދު ދެއްވާ އެމަގަށް ކަންކުރެއްވުމަށް ބާރު އަޅުއްވަމުންނެވެ.

ކޮވިޑް-19 ގެ ހާލަތު ގޯސްވެ، ސަރުކާރުން ގެންގުޅޭ ދޯހަޅި ސިޔާސަތުތަކުގެ ސަބަބުން ދުނިޔޭގައި ދެވަނަ އަށް އެންމެ ގިނަ މީހުންނަށް ވައިރަސް ޖެހުނު ގައުމަށް ބްރެޒިލް ވަނީ ވެފައެވެ.