ކޮވިޑް-19ގެ މިހާލަތުގައި އެއްގެއިން އަނެއް ގެއަށް ޒިޔާރަތް ނުކުރުމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް އިލްތިމާސް ކުރައްވައިފިއެވެ.
އަންގާރަ ދުވަހުގެ ރޭ ނޭޝަނަލް އިމަރެޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ޑރ. އަފްޒަލް ވިދާޅުވީ ކޮވިޑް-19އާ ގުޅިގެން ދިރިއުޅުމަށް ބޮޑެތި ބަދަލުތަކެއް އައިސްފައިވާ ކަމަށާއި، އެބަދަލުތަކާއެކު ދިރިއުޅެން ޖެހޭ ކަމަށެވެ. ޑރ. އަފްޒަލް ވިދާޅުވީ ސަލާމާތާ ރައްކާތެރިވުމުގެ ގޮތުން އަޅާ ފިޔަވަޅުތަކުގެ ނަތީޖާ ފެންނާނީ އެއާ އެއްގޮތަށް އާންމު ރައްޔިތުން އަމަލުކުރުމުން ކަމަށާއި، މިހާލަތުގައި އެއްގެއިން އަނެއްގެއަށް ޒިޔާރަތް ނުކުރުމަށް އެދޭ ކަމަށެވެ.
މީގެ އިތުރުން ޑރ. އަފްޒަލް ވިދާޅުވީ ސާފުތާހިރުކަމަށް އިސްކަންދޭ ފަދައިން، އެއްގެއިން އަނެއްގެއަށް މީހުން ޒިޔާރަތް ކުރާކަން ފާހަގަކުރެއްވިއްޖެނަމަ އެކަން އެހެން މީހުންވެގެންވެސް ހުއްޓުވަން ޖެހޭ ކަމަށެވެ.
ލޮކްޑައުންގެ ތެރޭގައި ހަގީގަތުގައި ގޭގެއަށް ވިޒިޓް ކުރެވިގެން ނުވާނެ. ނަމަވެސް އެހެން ކުރާ ކަމަށްވާނަމަ އެގެއެއްގެ ބަޔަކު ޖެހޭނެ އެކަން ހުއްޓުވަން. ނުވަތަ މިފަދަ ހާލަތުގަ އަޅުގަނޑުމެން ވިޒިޓް ކުރުމުގެ ކަންތައް ކުރިއަށް ގެންގޮސްގެން ނުވޭނެ.ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް
އޭޕްރީލް މަހުގެ 15ގައި މާލެ ސިޓީ ލޮކްޑައުން ކޮށްފައިވާއިރު، ލޮކްޑައުން އަށް ލުއި ދިނުމަށް ސަރުކާރުން ދަނީ ތައްޔާރުވަމުނެވެ. އަދި މިލިބޭ ފަސޭހަތަކުގެ ބޭނުންކުރަން ވާނީ ވީ އެންމެ މަދު މިންވަރަށް ކަމަށް އެންއޯއީސީގެ ޑޮކްޓަރުންގެ ޓީމުން އިލްތިމާސް ކުރައްވައެވެ.
