ކުރީގެ ނައިބު ރައީސް އަޙްމަދު އަދީބާ ގުޅިގެން، އެމްއެމްޕީއާރުސީ ޚިޔާނާތުގެ މައްސަލައިގައި މަޖިލިސް މެންބަރުންތަކެއް ފްރޭމް ކުރުމަށް އެމްޑީޕީ ތެރެއިން މަސައްކަތް ކުރަމުންދާ ކަަމަށް މަރަދޫ ދާއިރާ އެމްޑީޕީގެ މެންބަރު އިބްރާހިމް ޝަރީފު ވިދާޅުވެއްޖެ އެވެ.

ޝަރީފު މި މޭރުމުން ވާހަކަ ދެއްކެވީ އަންގާރަ ދުވަހު ކުރިޔަށްދިޔަ މާލިއްޔަތު ކޮމިޓީގެ ބައްދަލުވުމުގައި އެމްއެމްޕީއާރުސީގެ މައްސަލައިގެ އޮޑިޓް ރިޕޯޓުގެ މައްސަލަ ކުރިޔަށް ގެންދާނެ ގޮތަކާއި ގުޅޭގޮތުން ކޮމިޓީގައި ކުރިޔަށްދިޔަ މަޝްވަރާގެ ތެރޭގަ އެވެ. މިކަމާއި ގުޅޭގޮތުން ވާހަކަ ދައްކަވަމުން ޝަރީފު ވިދާޅުވީ، އެމްއެމްޕީއާރުސީގެ ޚިޔާނާތުގެ މައްސަލައިގައި ތަޙުޤީޤު އިދާރާތަކުން ކުރައްވަމުން ގެންދަވާ ތަޙުޤީޤު ނުނިމި، ދިގުލައިގެން ދިޔުމަކީ ކަންބޮޑުވުމެއް ކަމަށެވެ. އަދި އޮޑިޓް ރިޕޯޓުގައި ފާހަގަކޮށްފައި ހުރި ކަންކަން ރަނގަޅުކޮށް އެކަން ކުރުން އެދިވަޑައިގަންނަވާ ކަމަށް ޝަރީފު ވިދާޅުވި އެވެ.

މީގެއިތުރުން މިކަމުގައި ބަޔަކު ރާވައިގެން ވަކި ބަޔަކު ފްރޭމް ކުރުމަށް މަޖިލިސް ތެރެއިން ވެސް މަސައްކަތް ކުރަމުންދާ ކަމަށް ޝަރީފު ތުހުމަތު ކުރެއްވި އެވެ.

ޝަރީފު ވިދާޅުވީ މިކަމާ ސީދާ ގުޅޭ މީހުން އޭނާއަށް ފޯނުކުރައްވައި އެ މަޢުލޫމާތު އޭނާއަށް ދެއްވާފައިވާ ކަމަށެވެ. ޝަރީފު ވިދާޅުވީ އޭނާ އެދެނީ ވީހާވެސް އަވަހަކަށް ތަޙުޤީޤީ އިދާރާތަކުން މައްސަލަ ނިންމާ ދަޢުވާ ކުރަން ޖެހޭ މީހުންނަށް ދަޢުވާ ކުރުން ކަމަށެވެ. އަދި މައްސަލަ ނުނިމި އެކި މީހުންނަށް ތުހުމަތު ކުރެވުމަކީ އެދޭ ކަމެއް ނޫން ކަމަށް ޝަރީފު ވިދާޅުވި އެވެ. އަދި މިކަން ނުނިމި އޮތުގުމުގެ ސަބަބުން މަޞްލަޙަތު ވަރަށް ބޮޑަށް ގެއްލޭ ކަމަށާއި އެހެންކަމުން ކޮންމެ މެންބަރަކު ވިޔަސް ހެކި ހުރިނަމަ ޝަރީޢަތަށް ފޮނުވަންވީ ކަމަށް ޝަރީފު ވިދާޅުވި އެވެ. އަދި މިކަމުގައި ތުހުމަތު ކޮށްގެން އިނގިލި ދިއްކުރުމުގެ މާނައެއް ނެތް ކަމަށް ޝަރީފު ވިދާޅުވި އެވެ.

ކޮމިޓީ ބައްދަލުވުމުގެ ތެރެއިން ޝަރީފު ވަނީ ހުޅުދޫ ދާއިރާ މެންބަރު އިލްޔާސް ލަބީބަށްވެސް ރައްދު ދެއްވާ ވާހަކަ ދައްކަވާފަ އެވެ. އެގޮތުން މި މައްސަލާގައި އޭނާ ތަނާޒުލްވާން ޖެހޭ ސަބަބެއް ނެތް ކަމަށާއި އޭނާއަކީ އެމްއެމްޕީއާރުސީގެ ފައިސާ ނެގި މީހެއް ނޫން ކަމަށް ޝަރީފު ވިދާޅުވި އެވެ. އެހެންނަމަވެސް ވަރޗުއަލްކޮށް ބޭއްވި އެ ބައްދަލުވުމުގައި އިލްޔާސް ލަބީބު، ޝަރީފަށް ނިޞްބަތްކޮށް އެމޭރެމުން ވާހަކަ ދެއްކެވި އަޑެއް ނީވެއެވެ.

ޝަރީފު ދެއްކެވި ވާހަކަ ތަކާ ގުޅިގެން ތިމަރަފުށީ ދާއިރާގެ މެންބަރު ޢަބްދުﷲ ރިޔާޒު ވިދާޅުވީ މެންބަރުން ފްރޭމް ކުރުން އެއީ ސީރިއަސް މައްސަލައެއް ކަމަށާއި ޝަރީފަށް އެފަދަ މަޢުލޫމާތެއް ލިބިފައިވާނަމަ އެކަން ތަޙުޤީޤު އިދާރާތަކާ ހިއްސާކުރެއްވުމަށް އެދޭ ކަމަށެވެ.

ފުލުހުންނާއި އެންޓިކޮރަޕްޝަން ކޮމިޝަން އަދި އެސެޓް ރިކަވަރީ ކޮމިޝަނުން މިދިޔަ އޮކްޓޫބަރު މަހު ބޭއްވި ނޫސްވެރިންގެ ބައްދަލުވުމުގައި ބުނެފައި ވަނީ 19 ވަނަ ރައްޔިތުންގެ މަޖިލީހުގެ 16 މެންބަރަކާއި 18 ވަނަ ރައްޔިތުންގެ މަޖިލީހުގެ 42 މެންބަރަކު ޚިޔާނާތުގެ ފައިސާގައި ޖެހުނު ކަމަށް ތުހުމަތު ކުރެވޭ ކަމަށެވެ. ނަމަވެސް އެއީ ކޮން މެންބަރުންނެއް ކަމެއް މިހާތަނަށް ހާމަކޮށްފައެއް ނުވެއެވެ.